MAHA FORAWE BLOG

صباح الخيراات بنات 😊 بالمناسبة انا كنت اكتر زول ما بظبط الصبغات في البيت والسبب دايما في سحب اللون او المشقر بيطلع ضارب وبالتالي اللون بيطلع باهت عشان كدا طولت من تغيير اللوك فاول شي قلت اقص الشعر واصبغ لاني مليت من اللون الأسود ولف الكعكعة 😂 صبغات مانيك بانيك لقيت ليها تجارب كتيرة للبنات ع النت وتجارب ناجحة وجميلة جدا فقررت اخوض المعمعة ياصابت ياخابت 😁 والطريقة ساهلة وواضحة جدا جدا بتلقيها في الورقة المرفقة مع الصبغة وفي الموقع بتاعهم.. اترددت كتير في اللون طبعا لكن قلنا دي الموضة وكدا 😄 صبغات مانيك بانيك الوانها حلوة وجريئة في نفس الوقت مامحتاجة صالون او زول محترف عشان يعملها ليك.. انتي لوحدك بالبيت ممكن تظبطيها بس اهم حاجة المرحلة بتاعة سحب اللون.. ودي مهمة عشان اللون يطلع ليك زي ما هو.. من #مميزاتها انها مؤقتة بتقعد في الشعر من 4 الي 6 اسابيع حسب عنايتك بشعرك وحسب الالوان وبتنزل (اصلا كل ما تغسلي شعرك بتنزل معاك) لانو اغلب الصبغات بيكون فيها نسبة من المفتح عشان اللون يدوم فترة اطول.. هي عبارة عن صبغة نباتية (vegan) خالية من اي مواد كيميائية ضارة وخالية من الامونيا...

مساء الخيراات بنات 😊 دي ايام التدوينات والبوستات الخفيفة .. بالنسبة للبنات البيعانوا من أثار حب الشباب او حتي بعض التصبغات البسيطة والنمش ممكن يستخدموا الديفرين مع الهاي كوين 2% مع بعض .. #طريقة_الاستخدام نقطي كل واحد فيهم علي وشك في نفس الوقت وامسحيهم علي كل الوش افضل من تخلطيهم مع بعض في علبة لأنو الهيدروكينون اللي في الهايكوين بيتأكسد ؛ وخليهم ٣ ساعات وغسليهم او ممكن تنومي بيهم الليل كلو اذا متعودة علي المقشرات عموما .. لو كنتي اول مرة تستخدميهم فالأفضل البداية تكون بالتدريج حبة حبة عشان اليشرة تتعود عليهم وما تتحسسي اول يوم ساعة وتاني يوم ساعتين وهكذا لغاية تقدري تنومي بيهم للصباح .. اهم حاجة بعد تغسلي وشك ترطبي كويس بمرطب قوي تحاشيا لآثار التقشير الجانبية وعشان تقللي القشرة في البداية .. ح تلاحظي للنتيجة من اسبوع او ١٠ يوم واستمري لمدة فيهو لمدة شهرين .. بعد كدا ممكن تقللي الاستخدام بحيث تحافظي علي النتيجة مرتين اسبوعيا كفاية جدا ..وما ننسي واقي الشمس يا جماعة اهم حاجة ..😊 ح تلاحظي الآثار اختفت ووشك ناير وفاتح وماف اي اثر للتصبغات وبشرتك متجددة بتقشير الدفرين وحتي ...

مساء الخير بنات ✋ من الحاجات الحلوة للعناية ببشرة الوجه هي انك تخلطي شوية من الغسول بتاعك مع شوية نشا وتغسلي بيهم وشك لمدة دقيقتين كدا وبعديها ترطبي وشك عادي .. غسول + نشا = نضارة وتفتيح عبارة عن نوورة ونضارة وتفتيح وتظبيط للمسام  ح تلاحظي ليهو  من اول مرة 😊❤ مناسب لجميع البشرات النشا بس غيري الغسول حسب نوع بشرتك طبعا .. ممكن كروتين صباحي أو مسائي يوميا .. وان شاء الله دايما نايرات  😘

ازيييكم بناات ومساء الخيير عليكم كل الاشوااق ليكم ❤ وشكرا لكل واحدة فقدتني وسألت مني وان شاء الله ماتفقدوا عزيز خلونا في البوستات الجاية نركز علي العناية بالشعر بالذات الشعر الافريقي بتاعنا ونديهو حقو بداية من المنتجات البتنفع معاهو والطريقة الح نطبقها بيهم سواء كانت منتجات طبيعية او مصنعة ودا من البوست الجاي ان شاء الله .. الليلة ح نتكلم عن بذور الكتان واستخدامها وفوائدها للشعر وكيف تعملي منها جل سهل التطبيق علي شعرك واعتقد كلكم بتعرفوها او ع الاقل سمعتو بيها بالجد الاختراع دا جميل جميل وح يغير في شعرك كتيير من حيث الكثافة والطول وعلاج التساقط وملمس الشعر نفسو بس اهم حاجة المواظبة ع الاقل اسبوعيا .. بذور الكتان بتحتوي علي كمية من العناصر المهمة لتغذية ونمو الشعر .. #بتحتوي علي :  بروتينات  واحماض دهنية  حمض الفوليك الاوميجا 3 و6 و 9 (حيث تصل نسبة الاوميجا 3 بها إلى أكثر من 60% من زيت السمك) وفيها 7 انواع من الفايتمينات ..فايتمين سي و أ و اي ب2 ب6 ب9 وفايتمين دي .. فيها كالسيوم حديد زنك بوتاسيوم مغنيسيوم فسفور مضادات اكسدة يعني ماف شي ما موجود فيه...

صباح الخير يا بنات 😊 دي اول تدوينة نبدأ بيها العام الجديد ويارب كل عام وانتو ببشرة  صحية ونضرة وبمشاكل أقل ❤ من الحاجات البتسأل منها البنات طوالي انو كيف اعالج واقفل المسامات الواسعة .. الحلول اللي ح اذكرها هنا عايزة منك تجربة وطولة بال وصبر عشان تلقي نتائج حلوة ومرضية .. مسامات البشرة مهمتها انها تسمح بخروج إفرازات الغدد الدهنية والعرقية وتهوية الجلد .. في الوضع المثالي المفروض ما تكون المسامات دي واضحة ..بمجرد انها بقت توضح وتتوسع وحجمها يكبر معناها دي مشكلة وجب حلها وغالبا بتكون نتيجة لزيادة الإفرازات الدهنية وترسب وتراكم الدهون والاوساخ .. أصحاب البشرة الدهنية والمختلطة هم أكثر عرضة طبعا يبقي كيف نحل الموضوع دا ..لو ما بشكل جذري يبقي ع الاقل نقلل المشكلة دي ونخفف منها التعرض للشمس بيساهم كتير في فتح المسام وبيضر بالكولاجين ودا بقلل من مرونة جدران قنوات المسام.. كمان البخار بتاع الفيشيال ممكن يديك نتائج عكسية لو ما حرصتي انك تقفلي المسامات كويس .. العمر كمان ليهو دور فكل ما اتقدمتي في العمر بتقل مرونة الجلد يبقي نحن محتاجين نحافظ علي المرونة دي بالكولاجين او بمحفزات...

بالنسبة للبنات اللي بيعانوا من مشكلة النحافة عموما انا بقول ليك لو قدرتي تتحصلي علي ابيتون دا وواظبتي عليهو ما بتجيك عوجة تاني وح تصلي للوزن الانتي عايزاه وبشكل صحي بدون اي مشاكل 😊 عبارة عن بدرة غنية بنسبة بروتين عالية وكذلك فايتمينات ومعادن .. بيحتوي على بروتين مصل اللبن ..  وبروتين مصل اللبن دا بيحتوي على أحماض الأمينية بتتهضم بسهولة .. كمان مدعم باللايسين ودا من الأحماض الأمينية الأساسية اللي ما بتتصنع بالجسم ..  حمض اللايسين دا بيساعد على تحسين القدرة على إكتساب الوزن من البروتين المتناول .. ومهم وضروري لنمو العظام وامتصاص الكالسيوم  كمان  بيساعد في انتاج مادة الكولاجين وإصلاح الأنسجة التالفة .. من مميزات حليب ابيتون كمان انو نسبة فعالية البروتين فيهو عالية جدا بمعدل أعلي من فول الصويا والقمح والحليب واللحوم البقرية .. سهل الهضم والامتصاص كمان .. في منو نوعين ..واحد مخصص للأطفال من سن ٣ سنوات لغاية ١٢ سنة .. وواحد للكبار من سن ١٣ .. انا جربتو يمكن قبل سنتين او اكتر شوية وبعد وصلت للوزن العايزاه وقفتو .. بيزيدك بمعدل ٣_٤ كيلو في الشهر دايما اي محتوي...

نواصل في بوستات البنية التحتية عشان الأساس بتاعنا يكون متين 😁 اعتقد  ماف واحدة ما بتعرف السودو كربم بتاع الحفاضات 😄 وتقريبا معظمكم استخدموه سواء للمنطقة الحساسة تبعكم او تبع شفعكم .. السودو كريم الحلو فيهو انو عندو كذا استخدام بيفيدك انتي كأنثي بتحبي المسوح  والاهتمام بنفسك عموما 😊 هنا ح نركز علي استخدامو للمنطقة الحساسة وهل فعلا هو بيفتح ولا دي اشاعات سااي !! السودو كريم بيحتوي علي مواد فعالة في الترطيب زي اللانولين ومادة أوكسيد الزنك مادة قابضة ومسؤولة عن الاحتفاظ بالرطوبة داخل الجلد وعندو خاصية تفتيح للبشرة .. دا غير المواد المضادة للالتهاب والحساسية والحكة والبكتريا ..وفعال في المساعدة علي التئام الجروح برضو وكمية من الفوائد والخصائص للكريم دا  ..   السودو كريم فعلا بيفتح ليك بشرتك وبالذات المناطق الحساسة من درجة لدرجتين حسب لونك ونوع بشرتك واهتمامك وتقشيرك للمنطقة عموما .. قبل كدا كتبت بوست عن المنطقة دي وكيف تهتمي بيها وتتحاشي حاجات معينة هي سبب في السواد الأعظم .. ارجعوا ليهو تاني .. طيب نشوف ح نستعملوا كيف ومع شنو ..وطبعا كل واحدة وتجربتها معاهو ...

مساء الخير بنات ❤ في البوست الفات اتكلمنا عن تقشير وتنعيم المنطقة دي .. اللي هو اهم خطوة .. اما تفتيحها او توحيد لونها مع باقي جسمك دا شئ إختياري بالنسبة ليك وغالبا بتهتم بيهو العروسات اكتر بحكم انها بتكون خايفة وعايزة تعزز ثقتها بنفسها اكتر 😁 يلا ما نكتر الكلام .. سيروم الليمون الإيطالي موجود تقريبا بمعظم الصيدليات ..من الحاجات الحلوة جدا وآمنة للتفتيح  والتقشير  والترطيب في نفس الوقت .. انا قبل كدا ذكرتو ليكم في بوست العناية باليدين لو متذكرين .. بيحتوي علي مادة KAD او  PAD اختصار ل  potassium Azeloyl Diglycinate  اللي هو مشتق من حمض الازيليك نفس المادة الموجودة في كريم الاسكينورين او الازاديرم المقشر بتاع حب الشباب .. بس الفرق انو ال KAD أكثر ثباتا وعندها خاصية ترطيب كمان وانا بلاحظ انها اقوي من حيث المفعول .. دي كلها تفاصيل علمية للعلم بالشئ او للبحث اكتر اذا حابين .. المهم في الموضوع انو ممكن تستخدمي سيروم الليمون للتفتيح او التقشير عموما سواء للمؤخرة او الجسم أو حتي للبقع واثار  حب الشباب في الوش .. آمن جدا حتي للحامل والمرضع .. بتمسحيه...

 مساء الخيير يا بنات 😊 يمكن دا بوست مكرر نوعا ما بس بصورة ابسط هنا وتذكير ليكم بس ولأنو كمية بنات سألوا عنو بالذات العروسات.. الحتة دي بالذات يا بنات ما تهملوها ..أحيانا بتكون اهم من المقدمة نفسها صدقوني هههه بداية العناية بالمؤخرة هي التقشير ثم الترطيب .. ابدا الحتة دي ما بعتبرها منطقة حساسة لأنها قاسية يااخ بالذات أصحاب المؤخرات البارزة والكبيرة .. بحس بيها مكتظة بكمية دهون وملمسها خشن بسبب الحبوب الصغيرة الفيها وما تسألوني عرفت كيف مجرد احساس هههه يمكن مؤخرة لمؤخرة تختلف  .. المهم نتفق  علي انها  محتاجة عناية واقلاها تكرشيها وتقشريها بصورة مستمرة من حين لآخر عشان يكون ملمسها زي باقي جسمك ويمكن انعم لأنها منطقة مهملة .. كل الحاجات المحتاجاها غالبا بتكون متوفرة عندك قبل كدا اتكلمت عن استخدام ملح لتقشير الجسم وبما فيهم المؤخرة والعملوا بالطريقة دي لقوا النتيجة البتمنوها بالمواظبة واتبسطوا جدا 😊 الطريقة هسة ما بتختلف كتير جيبي ملح الحليب وزيت فايتمين E مخلوط مع زبدة الكاكاو او زبدة شيا او اي كريم بيحتوي عليهم .. لأنو ترطيبهم عالي الزيت هنا لمجرد زيادة ترطي...

 صباحاااتكم بنات 😊 الاسبرين زي ماعندو فوائد علاجية عند البلع كمان عندو فوائد واستخدامات تجميلية ممكن تستفيدي منها .. الاسبرين هو نفسو حمض السالسيليك او الصفصاف الموجود في معظم المستحضرات التجميلية سواء صابون او غسول او شامبو او كريم ..المستخدمة بكثرة لعلاجات حب الشباب عبارة عن مقشر ومضاد للالتهاب .. انتي ممكن تستفيدي من حبوب الاسبرين الموجودة عندك في البيت او الصيدلية وسعرها زهيد جدا ونتائجها ممتازة وتفي بالغرض في كل الأحوال استخداماتو للبشرة كالتالي : مقشر للبشرة قابض للمسام فعال جدا لحب الشباب والبثور نضارة وتفتيح البشرة لخطوط التجاعيد الدقيقة الانتفاخ تحت العين قشرة الشعر #طريقة_استخدامو ممكن تستخدميهو كماسك او تضيفيهو لغسول الوش بتاعك اليومي  لو كنتي بتعاني من حبوب في بشرتك خصوصا لو دهنية او مختلطة .. ٣ حبات اسبرين + عسل طبيعي + كريم مرطب اهرسي حبات الاسبرين تماام واضيفي ليهم حبة عسل ومعاهم حتة صغنونة من كريمك المرطب وبكدا بتتكون معاك عجينة طبقيها علي بشرة وشك وهو نضيف .. خليهو ربع ساعة وغسليهو بغسولك عادي واهم خطوة بعد الماسك ترطبي وشك بكريمك المرطب....

ماسك بسيط جدا ومكوناتو متوفرة في اي مطبخ فعال جدا للمسام الواسعة عن طريق شد البشرة عشان كمية النشا الفيهو .. ممكن تستغني عني النشا لو ماعندك وتكتفي بالرز او العكس لأنو الاتتين عبارة عن نشا 😊 الزبادي والعسل كمية من الترطيب بالذات الناس البيعانوا من القشرة.. واصلي في الماسك دا اسبوعين بمعدل مرتين او تلاتة كل اسبوع وشوفي الفرق قبل وبعد ؛ من حيث النضارة سااي غايتو النشا دا خطيير في التفتيح ومشاكل البشرة عموما.. المهم المواظبة ❤ مناسب لكل أنواع البشرة.. ممكن تعمليهو قبل طلعاتك وقبل المكياج في كمية من الماسكات الطبيعية بالنسبة للمسام الواسعة بمختلف المكونات ح اذكرها ليكم ان شاء الله ..

صباح الخير يا بنات وليكن وحشة وحات الله ❤❤ نأسف للانقطاعة دي لظروف خاصة 😊 يلا نخش في الموضوع طوالي وهو باين من الصورة .. اعتقد كلنا سمعنا بمجموعة المكاديميا .. واعتقد كمان انها جميلة علي حسب تجارب كمية من البنات ليها بس يمكن عيبها الوحيد انها غالية.. اجمل حاجة فيها الماسك ويستاهل كل قرش وح تعجبك النتيجة لو استمريتي عليهو ع الاقل اسبوعيا.. كمان الزيت بتاعهم جميل جدا ممكن تستخدميهو كإضافة للماسك.. ماسك المكاديميا من الماسكات الجاهزة والسريعة ..مخصص لإعادة الرطوبة ولترميم الشعر بالذات للشعر الجاف والتالف المتقصف وكمان عناية للشعر المصبوغ والشعر المتعرض للحرارة سواء استشوار او مكواة .. قوامو كريمي وتقيل نوعا ما فممكن عادي تضيفي ليهو كمية قليلة من اي زيت بينفع معاك وبالتالي ح تعززي من الفايدة بتاعتو لشعرك.. إضافة الزيت لأي ماسك عموما انا بعتبرو مهم جدا وعلاج مكثف للشعر ولاعادة الرطوبة في نفس الوقت وحمايتو من التلف والجفاف والتقصف.. #مكونات_الماسك بتكون من المكاديميا وزيت الارجان وزيت البابونج والالوفيرا ودي كلها كفيلة بإنها تعيد الترطيب المفقود لشعرك بيعطي رونق كدا وملمس شبه حر...

من اجمل المجموعات اللي مرت علي واول مرة اواصل في حاجة كدا لمدة سنتين علي التوالي بدون كلل وملل.. بشرتي الدهنية كانت مطلعة زيتي الصراحة..حاليا اقدر اقول مع المجموعة دي قدرت اتخلص من كمية الزيوت والدهون بنسبة كبيرة جدا ونادرا ما تطلع حبوب أو بثور.. غير انها علاج اعتبريها وقاية في المقام الأول.. بايوديرما ليها براءة اختراع بسبب تركيبة ال ( fluidactiv  patented formula) وقبل كدا انا اتكلمت عنها في بوستات سابقة ارجعوا ليها التركيبة دي بتمنع انسداد المسام دا غير انو بتزيد سيولة الدهون بحيث تسهل اذابتها وفي نفس الوقت بيتحكموا في إفراز الدهون المسببة لكل مشاكل البشرة الدهنية والمختلطة 😊 يعني ح تحصلي علي افرازات دهنية شبيهة بما تفرزه البشرة العادية.. #الغسول Sebium gel moussant قوامو بيشبه الجل حتي ممكن يستخدم كجل للحلاقة 😄 خفيف علي البشرة وابدأ ما بيسبب جفاف مناسب للبشرة الدهنية والمختلطة بيمنع ظهور الحبوب وبينضف المسام ويمنع انسدادها خالي من الصابون والبرابين وفيهو نسبة من حمض اللاكتيك المقشر .. #المقشر Sebium gel gommant دا عبارة عن جل مقشر أو اسكراب فيهو حبيبات صغيرة...

كتير من الحوامل بتقلق من موضوع الكريمات أو اي مستحضرات تجميل أثناء مسيرة الحمل بالذات للناس العندهم مشاكل تصبغات وبقع وحبوب نتيجة للتغير الطبيعي للهرمونات.. ما ح أطول عليكم بالتفاصيل الكتيرة لكل الحاجات الممنوعة أو المسموحة بشكل عام للحامل لأنو ح نجيها في بوست لوحدو بالتفصيل ان شاء الله 😊 اليوم ح نتكلم عن تفتيح وتوحيد لون بشرة الوجه ع الخصوص للحامل وبشكل آمن جدا جدا في كل مراحل الحمل .. كريم اسكينورين وكريم الفا بلس من افالون #الاسكينورين عبارة عن مادة الازيليك اسيد Azeleic acid  الحمض دا يستخلص غالبا من الحبوب زي القمح والشعير والأرز ..هو طبعا علاج لحب الشباب وكمان مقشر وضد التصبغ ومضاد للأكسدة ؛عشان كدا بتلاحظي انو بيفتح اللون بعد الاستخدام المستمر لأكتر من شهر.. وكلنا عارفين فوائد التقشير.. عادة بيكون تركيزو 20% ودا تركيز حلو جدا للتفتيح في السودان بيتلقي في الصيدليات تحت اسم ازاديرم Azaderm أو ازيليك Azelec #أفالون_ألفا_بلس دا من اسمو فيهو مادتين مع بعض.. مادة الفا اربيوتين alpha arbutin ومادة اسمها جلابريدين glabridin الاتنين بيشتغلوا علي صبغة الميلانين وبشكل ...

أكبر مهدد لينا نحن النسوان والبنات عموما هي الشيخوخة وفقدان شباب البشرة بظهور بعبع اسمو التجاعيد سواء ظهورها بالذات في الوجه أو اليدين .. اليوم ح نركز علي حماية اليدين من التجاعيد والكرمشة وليه اليدين بالذات لأنها اكتر حاجة معرضة للعوامل البيئية واكتر من الوجه كمان زي الشمس وغسيل الهدوم وغسيل العدة وعدة رمضان بالأخص 😂😂 ولكن مع تعديل نمط الحياة ومنتجات العناية بالبشرة بتساعدنا كتير في استعادة شباب اليدين بدون جراحات او حقن وكدا .. طبقة الدهون التحت بشرة اليدين ما سميكة، عشان كدا بتلاحظي للاوردة بتاعتك بارزة ومع تقدم العمر بتبرز اكتر وكدا بتظهر اكتر تجعدا.. بس مجرد روتين وخطوات اتبعيها 1 2 3 وما بتجيك عوجة تب .. #الخطوة_الأولي الترطيب اكيد ودا بيكون داخلي وخارجي داخلي اشربي موية كتيرة لأنو خلايا الجلد بتتكون اساسا من الموية .. وخارجي بالكريمات واللوشنات المرطبة وبالتالي ح ترجع الخلايا لحجمها الطبيعي  ودا بيقلل من ظهور التجاعيد.. (راجعي بوست زيادة قوة ترطيب اللوشن ) وممكن تستخدمي زبدة كاكاو او شيا او حتي خلطات طبيعية من مكوناتها العسل او الزبادي مثلا .. #الخطوة_الت...

التقشير يعني نشيل طبقة الجلد الخارجية اللي ع السطح والخلايا الميتة ويجددها وهو من اهم اسباب النضارة  للبشرة سواء كان للوش ولا للجسم ..كلنا بنلقي نفسنا بنهتم بوشوشنا اكتر من اجسامنا ويمكن اكتر سبب بيخلي اجسامنا ما تستجيب لاي كريم انتي بتستخدميهو هو عدم التقشير الدوري ... دا غير انو النضارة والتألق والنعومة وبشرتك بتكون افتح يمكن بدرجة او درجتين بالذات اذا استمريتي عليهو .. بالجد قدر ما اوصف ليك مدي الفايدة البتاخديها من التقشير عموما ما ح اقدر اوفي ودا من تجربة شهور.. وحياتك الجمالية ح تتغير بدرجة كبيرة .. قبل كدا اتكلمنا عن الاكرتين او مشتقات فايتمين اي زي الدفرين والماربالين والاكنيلين كمقشرات بالنسبة للوش ..اما بالنسبة للجسم ما ح نستخدم الاكرتين واخوانو اكيد ولا ح نشتري مستحضر عشان تمسحيهو وكل الح تعمليهو انك ح تستفيدي من مكونات عندك في البيت وتعمليها كمقشر .. ما ح نكتر الكلام واديكم الزيت طوالي .. واعتبروا الماسك الجاي دا او الخلطة دي زي التقشير بأحماض الفواكه .. #المكونات : 3 معالق زبادي  ليمونة كاملة  ملعقتين خل تفاح ملعقة بن  ملعقة عسل نحل او سكر ...

#الجليسوليد_حبيب_الكل  #Glysolid_cream #خلطة_قبل_الحمام صباح الخير عليكن 😊 نأسف للغياب..اصلا انا عندي غتسات كدا بطوول ما اكتب شئ..المهم لما اغتس كدا اعرفوا انو نفسياتي ما تمام 😁 اجاركم الله هههه نخش في الخلطة التحت دي طوالي وزي ماشايفين أساسها الجليسوليد حبيب الكل 😌 انا زمان كنت بقول انو اي واحدة ماعندها كريم جليسلويد علي قول البنات 😅 يبقي تراجع انوثتها ولا كيف 😏 طبعا في النهاية اكيد ح تتمسحي بالحاجة البتريحك وتنفع معاك..لأنو كمان الجليسوليد دا بالذات ما اي زول بحبو قوامو تخين ولايوق خلاث 😁 لكن الصراحة سمح وعن تجربة شخصية في انو بيحافظ علي رطوبة جسمك واكتر من كدا ترطيبو عالي جدا من مكوناتو .. وبعدين الكريم مما تلقيهو لايوق وثقيل ما بيطلع بسهولة اعرفيهو ماهين 😎 انا عموما بستخدمو قبل الحمام بساعة او ساعتين أو حتي نص ساعة او اخليهو الليل كلو واستحم الصباح منو .. عشان ما احس اني ممسحة بصابون صابون وغير كدا مع الشمس اي حاجة فيها جليسوليد ح تسودك بلاشك.. نخش في مكونات الخلطة وغالبا حاجات متوفرة عندنا كلنا ومافيها صعوبة تتحصلي عليها .. #المكونات _علبة وسط جليسولي...

مساء الخيرات يا بنات 😊 تعالوا نغير ليكم من نوعية البوستات حبة .. وملاحظة الناس بتحب بوستات التعطير سواء للجسم او البيت او الدواليب ...الخ .. قبل كدا انا ذكرت في بوست طريقة تعطير المنطقة الحساسة ولسا كمان في طرق كتييرة مناسبة للحتة دي .. انا من الناس المابحب الخمرة بشكل بيور كدا لوحدها.. بحسها بتتفاعل مع الجسم وبتدي نتيجة ما حلوة سواء الريحة ذات نفسها أو كإعتبارها كحول بيسود الجسم ( طبعا دا رأي شخصي يا جماعة ما تزعلوا 😄) ..ما زي ما بشمها في فتيلا زاتو كدا .. أو يمكن مع الدخان مثلا بتدي ريحة جميلة جدا .. فشنوو في واحدة كدا وصفت لي كم عطر عشان اخلطو مع الخمرة واطلع بنتيجة وااو وبكدا عصفورين بحجر واحد .. العطور الزيتية بطبيعتها قوية وثابتة ولو اضفتيها لاي عطر بتثبتوا اكتر وبتضفي ليهو نكهة خاصة زي الصندلية لما نضيفها للخمرة .. #المكونات عطر نورة الزيتي + مخمرية أحلام + خمرة(اي نوع مفضل لديك ) طبعا المكونات دي ما اجباري يعني في ناس ما بتحب العطور الزيتية دي بالذات وممكن تستبدليها بالعطر الزيتي البيناسبك 😊 جيبي فتيل بخاخ فاضي ٥٠ مل مثلا وكبي نورة والمخمرية كاملين وتعالي كملي...

صباح الخير عليكن ❤ هنا الواحدة تسأليها يا هناية وشك دا بتعملي ليهو شنو ناااير كدا !! طبعا ديك النوع الغتيت تقول ليها :بري يا هناية ولاشئ دي موية الوضوء 😂😂 اهاا في الصين تسأليهن بيقولن ليك موية الرز 😂 لكن طلعن ما بكذبن.. ويمكن يجي يوم والأبحاث تثبت فعالية موية الوضوء 😂 موية الرز يا جماعة استفيدوا منها وما تدفقوها.. فوائدها عظيمة ومااهينة.. دي ثروة جمالية بالجد زمان حكوا لينا انو في قرية كدا تقريبا صينية القرية حتي مسمينها(قرية الشعر الطويل ) نسوانهم بشرتهم عحيبة وشعرهم عجيييب  وطلع السر انو بيغسلوهو بموية الرز المخمر وبيتحمموا بيها كمان 😂.. خلوكم من ديل ..في شركات كتييرة داخلة في منتجاتها الرز بشكل رئيسي وفعالة جدا وغالية كمان .. المهم اعتقد انو ماف ارخص من الرز وتجربتو ما ح تكلفك شي .. اهم شي تواصلي لفترة عشان تقدري تحكمي علي التجربة.. موية الرز مفيدة للبشرة والشعر .. #للبشرة بتحتوي علي كمية فايتمينات ومعادن واحماض امينية مفيدة للبشرة .. بيحتوي علي النشا والبروتين.. بيحتوي علي فايتمين C , B , و E بتحتوي علي حمض الفيروليك ferulic acid  واللي هو مضاد للتأك...

#العناية_باليدين_والقدمين_والأظافر مساء الخيرات بنات ❤ اعتقد انو كلكم ح تكونوا عارفين الطريقة دي ويمكن معظمكم بيطبقها.. انا بس ح اذكركم بيها تاني 😊 ابسط المكونات اللي موجودة في اي بيت هي البيكربونات أو الباكنج صودا (وماف فرق بينهم كبير يمكن بس في درجة القلوية) +الليمون (ملعقتين بيكربونات + نص ليمونة) جيبي اي وعاء فارغ وكبي فيهو ملعقتين بيكربونات واعصري فيهو نص ليمونة.. في البداية ح يفور ويكون رغوة نتيجة التفاعل.. خليهو بملعقة ح يهدأ شوية وتعالي امسحي الخليط دا كقناع علي يديك وقدميك وافركي برفق لمدة ٥ دقايق .. في كل مرة بنقول انو عدو البشرة السمراء الفرك المبالغ فيهو للمقشرات.. خليهو زي ١٠ دقايق تانية وغسليهو بموية ورطبي بعديهو كويس.. اهم شي بعد الماسك دا الترطيب عشان توازني والا ح تلاقي نتيجة عكسية نتيجة الجفاف.. طبقي الخلطة دي مرة الي مرتين في الاسبوع خصوصا لو كان عندك مناسبة مفاجاة .. انا شخصيا بفضل مرة اسبوعيا كفاية جدا .. #النتيجة نضارة ولون افتح بشكل ملحوظ من اول مرة ..بتحسي انو وسخ الدنيا دي كلو ماشي طالع 😄 احساس نضافة بالجد ❤ كمان الخلطة دي حلوة لسواد المفاص...