جل بذور الكتان كيراتين الشعر الطبيعي

ازيييكم بناات ومساء الخيير عليكم
كل الاشوااق ليكم ❤
وشكرا لكل واحدة فقدتني وسألت مني وان شاء الله ماتفقدوا عزيز
خلونا في البوستات الجاية نركز علي العناية بالشعر بالذات الشعر الافريقي بتاعنا ونديهو حقو بداية من المنتجات البتنفع معاهو والطريقة الح نطبقها بيهم سواء كانت منتجات طبيعية او مصنعة ودا من البوست الجاي ان شاء الله ..
الليلة ح نتكلم عن بذور الكتان واستخدامها وفوائدها للشعر وكيف تعملي منها جل سهل التطبيق علي شعرك
واعتقد كلكم بتعرفوها او ع الاقل سمعتو بيها
بالجد الاختراع دا جميل جميل وح يغير في شعرك كتيير من حيث الكثافة والطول وعلاج التساقط وملمس الشعر نفسو بس اهم حاجة المواظبة ع الاقل اسبوعيا ..
بذور الكتان بتحتوي علي كمية من العناصر المهمة لتغذية ونمو الشعر ..
#بتحتوي علي :
 بروتينات
 واحماض دهنية
 حمض الفوليك
الاوميجا 3 و6 و 9 (حيث تصل نسبة الاوميجا 3 بها إلى أكثر من 60% من زيت السمك)
وفيها 7 انواع من الفايتمينات ..فايتمين سي و أ و اي ب2 ب6 ب9 وفايتمين دي ..
فيها كالسيوم
حديد
زنك
بوتاسيوم
مغنيسيوم
فسفور
مضادات اكسدة
يعني ماف شي ما موجود فيها تاني دايرين شنو ..!!

طيب نجي نشوف #فوائدها شنو ..

اولا ..بتعالج الشعر الخفيف والمتقصف لانها بترطب الشعر بشكل فظيع  وبتعالج التساقط
تانيا .. بتقوي الشعر وتزيد من كثافتو وسرعة نموه كمان
تالتا .. بتنعم وترطب الشعر بالذات العر الجاف بدون اي اثر دهني حتي ..
رابعا ..بتغذي فروة الراس وبتحميها من القشرة والفطريات ..

#طريقة_تحضير_الجل ..
جيبي ملعقتين من بذور الكتان + كباية موية
اضيفي البذور للموية بعد تغلي وحركي بالمعلقة لغاية ما يتقل معاكي ويتكون سائل لزج كدا زي الجل ونزليهو من النار وصفيهو في علبة فاضية .. خليهو يبرد شوية بعد كدا ممكن تضيفي ليهو ملعقتين زيت ( اي زيت ينفع معاك ) انا شخصيا بفضل زيت جوز الهند او زيت فايتمين E  وتطبقيهو علي شعرك من الفروة لغاية الجذور ..
ممكن تحتفظي بالباقي في التلاجة وتطبقيهو في اوقت والافضل ما يقعد اكتر من اسبوع او 10 يوم ..
ممكن تخليهو علي شعرك من نص ساعة لغاية يوم كامل كماسك وتغسلي شعرك عادي ..حتي ممكن تغسليهو بموية بس او بلسم لأنو ماليهو اي اثر دهني علي الشعر وح تلاحظي النتيجة من اول استخدام وبعد فترة شعرك ح يتغير للاحسن بالجد ..
اعمليهو مرتين او مرة في الاسبوع كفاية جدا ..
جل بذور الكتان ممكن تستخديهو بدل الجل العادي لو عايزة تعملي شعرك كيرلي او كمثبت للشعر بشكل يومي  ..🙂
ينفع لكل انواع الشعر ولكل مسامية بالذات اصحاب المسامية المنخفضة سهل جدا يخترق الشعرة بدون اي حرارة ...
جل بذور الكتان كمان عندو فوائد للبشرة في محاربة التجاعيد وحب الشباب وتقليص المسامات ..
انا شخصيا تجربتي ليهو كانت مقتصرة علي الشعر بس ..
انتو جربوا وورونا النتيجة ..
انا اتحصلت عليها من كارفور بس ما متذكرة سعرها ..
في السودان ما متأكدة بتتواجد وين بالضبط تقريبا في العطارات ..

#كسرة_بموية
اتذكري دايما انو العناية بالشعر بتحتاج الاستمرارية والصبر عشان تحصلي علي نتيجة حلوة وتستفيدي من الحاجات البتعمليها ..
اعرفي كمان انو الترطيب هو مفتاح التقصف والجفاف 😊