خلطة قبل الحمام بإستخدام الجليسوليد

#الجليسوليد_حبيب_الكل
 #Glysolid_cream
#خلطة_قبل_الحمام

صباح الخير عليكن 😊
نأسف للغياب..اصلا انا عندي غتسات كدا بطوول ما اكتب شئ..المهم لما اغتس كدا اعرفوا انو نفسياتي ما تمام 😁 اجاركم الله هههه
نخش في الخلطة التحت دي طوالي وزي ماشايفين أساسها الجليسوليد حبيب الكل 😌
انا زمان كنت بقول انو اي واحدة ماعندها كريم جليسلويد علي قول البنات 😅 يبقي تراجع انوثتها ولا كيف 😏
طبعا في النهاية اكيد ح تتمسحي بالحاجة البتريحك وتنفع معاك..لأنو كمان الجليسوليد دا بالذات ما اي زول بحبو قوامو تخين ولايوق خلاث 😁 لكن الصراحة سمح وعن تجربة شخصية في انو بيحافظ علي رطوبة جسمك واكتر من كدا ترطيبو عالي جدا من مكوناتو .. وبعدين الكريم مما تلقيهو لايوق وثقيل ما بيطلع بسهولة اعرفيهو ماهين 😎

انا عموما بستخدمو قبل الحمام بساعة او ساعتين أو حتي نص ساعة او اخليهو الليل كلو واستحم الصباح منو ..
عشان ما احس اني ممسحة بصابون صابون وغير كدا مع الشمس اي حاجة فيها جليسوليد ح تسودك بلاشك..
نخش في مكونات الخلطة وغالبا حاجات متوفرة عندنا كلنا ومافيها صعوبة تتحصلي عليها ..

#المكونات
_علبة وسط جليسوليد

_فتيل جلسرين

_2 ليمونة

_زيت فايتمين E او زيت لوز حلو او زيتون او ان شاء الله زيت صباح 😅 المهم نزيد قوة الترطيب ونخفف القوام شوية كدا باي زيت بتحبيهو

_زبدة شيا خام او مكررة(يعني ممكن اي كريم او لوشن فيهو زبدة شيا )

_زبدة كاكاو او بالاصح الكوكوبيتر الأصفر الوااحد دا بيتباع في السوق وقوامو قوام لوشن خفيف كدا بالجد حلو شديد

جيبي المكونات دي كلها واخلطيهم مع بعض في علبة كبيرة شوية عشان تشيل ليك كويس
زبدة الشيا حاولي سيحيها بحمام مائي او بالميكرويف عشان ما تكرضم ليك في الخلطة..
ح تلقي عندك خلطة لونها اصفر كدا وقوامها كريمي ظرييف مادهنية ابدا  وسهلة انها تتمد علي جسمك..يعني ما زي قوام الجليسوليد التقيل اللايوق داك 😅

#طريقة_الاستخدام
اتمسحي بيها قبل الحمام بساعة او ساعتين أو بالليل وخليها للصباح واستحمي واطلعي ( دا طبعا استعمالي الشخصي ليها )..
وانتي طبعا ممكن عادي خلال اليوم تستعمليها لكن احذري من الشمس لأنها كدا ح تديك نتيجة عكسية..

الغرض الأساسي من الخلطة دي بالذات هو الترطيب العميق  وفي نفس الوقت إزالة بعض من الخلايا الميتة ودا من اثر التقشير الخفيف للجليسوليد والجلسرين والليمون بالذات ..

بالمناسبة الجليسوليد زااتو اهم مكوناتو الجلسرين ومادة اسمها(  الانتوين  Allantoin) وهي مادة ترطيبها قوي جدا جدا بتستخدم لعلاج حالات الجفاف عموما وهنا زدنا كمية الجلسرين  لزيادة المفعول وتخفيف القوام برضو ( زيادة الخير خيرين ) ..
الجلسرين والليمون عندهم اثر تفتيح واضح جدا كمان وح تلاحظي دا لو استمريتي عليها ..
ولما تجي تستحمي انا بفضل ليفة الحمام المغربي او ليفة بودي شوب الزي الجونتي ديك ..ياخ دي بتطلع جنس وسخ ديشااااك 😂 كأنك ما استحميتي قبل كدا
وبعد تطلعي اتمسحي بكريمك او لوشنك الروتيني العادي وامسكي تلفونك واتصفحي في باقي البوستات دي وخلاص 😏
و لو حبيتي كمان تتمسحي بيهو بعد الحمام الافضل تكوني مبلولة كمان بيكون امتصاصو اسرع وغير كدا الموية بتحبس الرطوبة..
الجليسوليد الأصلي صناعتو المانية طبعا وبااين من قوامو وريحتو واي شئ..

#كسرة_بموية
الخلطة دي حلوة جدا للمناطق الحساسة والركب والاكواع وفظييعة لتشققات القدمين..
امسحيها لرجولك بالليل  والبسي شراب ونومي والصباح عادي غسليهم ويا حبذا لو كرشتيهم بالحجر ..
اسبوع بس وما ح تتعرفي علي رجولك 😏
الجليسوليد عندو كمية استخدامات وممكن تخلطيهو مع اي حاجة عندك وان شاء الله في كل مرة ح نعرف كيف ممكن نستفيد منو ..

ودمتن سمحات ومرطبات ومنديات 😊