العناية بالمؤخرة

 مساء الخيير يا بنات 😊
يمكن دا بوست مكرر نوعا ما بس بصورة ابسط هنا وتذكير ليكم بس ولأنو كمية بنات سألوا عنو بالذات العروسات..
الحتة دي بالذات يا بنات ما تهملوها ..أحيانا بتكون اهم من المقدمة نفسها صدقوني هههه
بداية العناية بالمؤخرة هي التقشير ثم الترطيب .. ابدا الحتة دي ما بعتبرها منطقة حساسة لأنها قاسية يااخ بالذات أصحاب المؤخرات البارزة والكبيرة .. بحس بيها مكتظة بكمية دهون وملمسها خشن بسبب الحبوب الصغيرة الفيها وما تسألوني عرفت كيف مجرد احساس هههه يمكن مؤخرة لمؤخرة تختلف  .. المهم نتفق  علي انها  محتاجة عناية واقلاها تكرشيها وتقشريها بصورة مستمرة من حين لآخر عشان يكون ملمسها زي باقي جسمك ويمكن انعم لأنها منطقة مهملة ..
كل الحاجات المحتاجاها غالبا بتكون متوفرة عندك
قبل كدا اتكلمت عن استخدام ملح لتقشير الجسم وبما فيهم المؤخرة والعملوا بالطريقة دي لقوا النتيجة البتمنوها بالمواظبة واتبسطوا جدا 😊
الطريقة هسة ما بتختلف كتير
جيبي ملح الحليب وزيت فايتمين E مخلوط مع زبدة الكاكاو او زبدة شيا او اي كريم بيحتوي عليهم .. لأنو ترطيبهم عالي
الزيت هنا لمجرد زيادة ترطيب ما اكتر واحتياري او ممكن اي زيت غيرو ..
زيت زيتون او جوز هند او جنين قمح او لوز ...الخ
وياريت لو يكون عندك ليفة مغربية او بتاعة بودي شوب

ح تبدي تبللي المؤخرة بالموية في الاول (ياريت لو دافية) وتمسحي عليها اي زيت عشان تسهلي عملية التقشير بالملح وما يحرقك .. بعد كدا بتحطي شوية من الملح وتبدي تفركي بالليفة لمدة دقيقتين  وتوقفي اتنفسي شوية وتاني افركي لمدة دقيقتين وكدا كفاية جدا  ..
اتحممي حمامك عادي وبعد تخلصي رطبي بزبدة الكاكاو العملناها قبيل وح تلاحظي للفرق من الاول  😊
استمري يوميا كدا لمدة ١٠ أيام لاسبوعين وح تصلي لنتيجة حلوة جدا جدا جدا من النعومة والفرق حتي في اللون
بعد كدا ممكن تعملي الطريقة دي مرتين في الاسبوع كمحافظة علي النتيجة دي ❤❤
بكدا ح تتخلصي من الجلد الميت ومن الحبوب الصغيرة ومن غمقان اللون كمان ..
الطريقة دي كمان ممكن للجسم كلو بس ما بتحتاجي يوميا
يوم بعد يوم او مرتين في الاسبوع كفاية جدا ..
في طريقة تانية لتقشير المؤخرة غير الملح للناس المابتحبو ح انزلها ليكم قريب ان شاء الله ..

#كسرة_بموية
العروسات دايما حاولوا ابدو العناية  من بدري بالذات للمناطق الحساسة والمؤخرة عشان ترتاحوا بعدين وما تشيلي هم وفي نفس الوقت تكوني بتستخدمي حاجات آمنة بس نتايجها محتاجة وقت وما تضطري تلجأي للحاجات النتائجها سريعة وممكن تسبب ليك اي اثار جانبية فيما بعد .. وبعدين ما إلا تكوني ح تعرسي عشان تهتمي بنفسك
خليك عروسة في كل مرحلة من حياتك وعيشي الدور 😄❤
البوست الجاي ح نتكلم فيهو عن تفتيح المؤخرة بحيث تتوحد مع لونك ما اكتر ..  

ودمتن سمحات ❤