#التفتيح الآمن للحامل

كتير من الحوامل بتقلق من موضوع الكريمات أو اي مستحضرات تجميل أثناء مسيرة الحمل بالذات للناس العندهم مشاكل تصبغات وبقع وحبوب نتيجة للتغير الطبيعي للهرمونات.. ما ح أطول عليكم بالتفاصيل الكتيرة لكل الحاجات الممنوعة أو المسموحة بشكل عام للحامل لأنو ح نجيها في بوست لوحدو بالتفصيل ان شاء الله 😊

اليوم ح نتكلم عن تفتيح وتوحيد لون بشرة الوجه ع الخصوص للحامل وبشكل آمن جدا جدا في كل مراحل الحمل ..
كريم اسكينورين وكريم الفا بلس من افالون

#الاسكينورين
عبارة عن مادة الازيليك اسيد Azeleic acid  الحمض دا يستخلص غالبا من الحبوب زي القمح والشعير والأرز ..هو طبعا علاج لحب الشباب وكمان مقشر وضد التصبغ ومضاد للأكسدة ؛عشان كدا بتلاحظي انو بيفتح اللون بعد الاستخدام المستمر لأكتر من شهر.. وكلنا عارفين فوائد التقشير..
عادة بيكون تركيزو 20% ودا تركيز حلو جدا للتفتيح
في السودان بيتلقي في الصيدليات تحت اسم ازاديرم Azaderm أو ازيليك Azelec

#أفالون_ألفا_بلس
دا من اسمو فيهو مادتين مع بعض.. مادة الفا اربيوتين alpha arbutin ومادة اسمها جلابريدين glabridin
الاتنين بيشتغلوا علي صبغة الميلانين وبشكل آمن وبالتالي شغلهم تفتيح وإزالة بقع وتصبغات بدون أي آثار جانبية
الالفا اربيوتين مستخلص من نبات عنب الدب
تركيزو هنا 1% هو ما عالي شديد لكن بيؤدي الغرض 😁
والجلابريدين من جذور نبات عرق السوس .. يعني الاتنين مواد طبيعية وفي نفس الوقت عندهم فعالية ضد التصبغ والتفتيح ..
انا شخصيا بستخدمهم من بداية الحمل اما انتي اذا خايفة من التحذيرات البتتكتب عليهو لأنو كلاس  c ولسا عليهو ابحاث فممكن تبديهو من الشهر الرابع لكن ابدا ما منو خوف ودا عن تجربة كمية من الحوامل..

#طريقة_الإستخدام
ممكن تختاري اي واحد فيهم وتستخدميه لوحدو..لكن الافضل استخدميهم الاتنين مع بعض كخلطة بدون تخلطيهم في علبة واحدة.. يعني نقطي من كل واحد علي وشك وامسحيهم مع بعض مرة يوميا أو مرتين..

الخلطة دي كمان تستخدم لتفتيح المناطق الحساسة حلوة جدا 😊❤

الاسكينورين بي ٣٣ ريال تقريبا
الالفا بلس بي ١٣٧ريال.. موجودين في اي صيدلية في السعودية..
في السودان الالفا بلس بتوفروا بعض القروبات المتخصصة في بيع مستحضرات التجميل عموما..

دايما لما يكون في مقشر واي مادة مفتحة المفعول بيكون اسرع وافضل والنتيجة احلي مما تتوقعي..
الكريمات دي ما الا تكوني حامل بس يعني ممكن لأي واحدة عايزة تفتح بشرتها أو عندها بقع وتصبغات ..لكن اهم حاجة تصبر عليهم والنتيجة ما اقل من شهر..
ممكن كمان تستخدمي مقشرات احماض الفواكه زي حمض الجلايكوليك ودا موجود في كريم وسيروم بايوديرما للتفتيح كمان فيهو فايتمين سي يعني ممكن تدخليهو في روتينك اثناء الحمل 😊

ودمتن سمحات ونايرات يا حوامل ❤😊

#عناية_الحامل