كيف تتخلصي من مسامات الوجه

صباح الخير يا بنات 😊
دي اول تدوينة نبدأ بيها العام الجديد ويارب كل عام وانتو ببشرة  صحية ونضرة وبمشاكل أقل ❤
من الحاجات البتسأل منها البنات طوالي انو كيف اعالج واقفل المسامات الواسعة .. الحلول اللي ح اذكرها هنا عايزة منك تجربة وطولة بال وصبر عشان تلقي نتائج حلوة ومرضية ..
مسامات البشرة مهمتها انها تسمح بخروج إفرازات الغدد الدهنية والعرقية وتهوية الجلد .. في الوضع المثالي المفروض ما تكون المسامات دي واضحة ..بمجرد انها بقت توضح وتتوسع وحجمها يكبر معناها دي مشكلة وجب حلها وغالبا بتكون نتيجة لزيادة الإفرازات الدهنية وترسب وتراكم الدهون والاوساخ ..
أصحاب البشرة الدهنية والمختلطة هم أكثر عرضة طبعا
يبقي كيف نحل الموضوع دا ..لو ما بشكل جذري يبقي ع الاقل نقلل المشكلة دي ونخفف منها
التعرض للشمس بيساهم كتير في فتح المسام وبيضر بالكولاجين ودا بقلل من مرونة جدران قنوات المسام..
كمان البخار بتاع الفيشيال ممكن يديك نتائج عكسية لو ما حرصتي انك تقفلي المسامات كويس ..
العمر كمان ليهو دور فكل ما اتقدمتي في العمر بتقل مرونة الجلد يبقي نحن محتاجين نحافظ علي المرونة دي بالكولاجين او بمحفزات الكولاجين ع الاقل ..
كل ما كانت مساماتك واسعة وباينة انتي معرضة لمشاكل اكتر وكمان منظرها بيخرب ليك الرصة بالذات مع الميك آب وبتباني أكبر من سنك..
انا من الناس البشرتهم كانت دهنية وبعاني من المسامات وحاليا اتخلصت منها واقدر اقول بشكل نهائي لأني ببساطة مواصلة في نفس الحاجات اللي كانت سبب في زوالها وتقريبا كل الحاجات متوفرة عند اي بت او بتلقوها في اي حتة وما صعب تتحصلي عليها ..

#الديرمارولر
ياخ البتاعة دي عجيبة بمعني الكلمة وانا بعتبرها حل لكل مشاكل بشرتك بما فيهم المسامات .. انا متأكدة انو معظمكم اشتراها وجربتوها مرة وتاني الجدعة الياها 😂 يعني انتو عايزين اي حاجة من اول مرة طق تظبط معاكم مش كدا ؟؟
محتاجة وقت وصبر واستمراااار اهم شي مع انو من اول جلسة بتحسي بالفرق ..
الديرمارولر بتشتغل عن طريق تحفيز الكولاجين وبالتالي ح يحصل تحسن ملحوظ ملحوظ علي بشرتك من كل النواحي
فشنووو اي واحدة عندها ديرمارولر تقوم عليها لأنو دا خيااارك الاول لحل مشكلة المسامات الواسعة ..
لأي تفاصيل( راجعوا بوست الديرمارولر )..

#سيروم_فايتمين_سي
احرصي علي استخدامو بعد جلسات الديرمارولر بالذات
عندو دور في تحفيز الكولاجين برضو ..
ماشرط إلا سيروم ممكن كريم او جل بس السيروم امتصاصو بيكون أسرع ..

#الأكرتين
او مشتقات فيتامين A بما فيهم الاكنيلين والدرايفا جل او الديفرين وديل بيشتغلوا بتحفيز كولاجين البشرة والتقشير في نفس الوقت .. (راجعوا بوست الاكرتين )

#المقشرات_الكيميائية
بما فيهم احماض الفواكه وحمض السالسيليك كمان(الاسبرين مثلا ) وديل ممكن تلقيهم في الغسولات او الكريمات او التونرات يبقي ضروري بعد تغسلي وشك تعملي تونر ..
غالبا معظم التونرات بيكون فيها حمض الجلايكوليك زي تونر بيكسي او اورديناري او يكون فيها سالسيليك زي المنظف بتاع كلينيك ( ديل الأنا جربتهم )
ديل بيقشروا تقشير سطحي مفيد جدا لتنظيم افراز دهون البشرة وبالتالي بتمنعي اي تراكمات داخل المسام ودا مهم جدا في تقلص حجم المسام ..

#كريم_بايوديرما_بور_ريفاينر
الكريم دا كمان حلو شديد بس عايز وقت عشان نتايجو تظهر
والاهم من كدا بيتحكم في افراز الدهون بشكل فعال وبيشد البشرة  ..حتي ممكن تستخدميهو بدل البرايمر قبل المكياج ..(راجعوا البوست بتاعو)..

#موية_الرز
اتكلمت عنها قبل كدا .. عبارة عن تونر طبيعي ممكن تعمليها بعد تغسلي وشك او كماسك يومي ..
الرز فيهو كمية عناصر مفيدة بما فيهم النشا بمفعولو القوي في تقليص حجم المسام ..وبالتالي نشا الذرة او الكورن فلور ذات نفسو كمان فعال جدا جدا .. (راجعوا بوست ماء الارز )..

#قشر_البيض
البيض ذات نفسو بيشد البشرة وبيقلص حجم المسام
واهم حاجة فيهم بياض البيض وقشر البيض كمان
يعني لو خلطيهم مع بعض في شكل ماسك اسبوعي ح تلقي نتائج حلوة  ..

#خل_التفاح
كمان دا بمثابة توتر طبيعي بعد تخففيهو بالموية طبعا ..بيوازن ليك درجة حموضة البشرة وبيشد الجلد وبيقلل حجم المسام كتير ..

في البوست دا اتكلمت بس عن الحاجات الأنا جربتها حتي الآن وقد تكون في حاجات تانية لعلاج المسامات الواسعة بعيدا عن العيادات مثلا .. حاجات تكون في متناول يدنا  ونقدر نستخدمها في البيت  ..

وح اظل اقول ليكم انو الديرمارولر هي خياااركم الأول ومع الاستمرار ح تلاقوا نتائج حلوة شديد للمسامات وللبشرة عموما..والاهم من كدا انك تحافظي علي نضافة بشرتك وتقشريها بشكل دوري 😊