استخدام الباكنج صودا لتقشير اليدين والقدمين
#العناية_باليدين_والقدمين_والأظافر
مساء الخيرات بنات ❤
اعتقد انو كلكم ح تكونوا عارفين الطريقة دي ويمكن معظمكم بيطبقها.. انا بس ح اذكركم بيها تاني 😊
ابسط المكونات اللي موجودة في اي بيت هي البيكربونات أو الباكنج صودا (وماف فرق بينهم كبير يمكن بس في درجة القلوية) +الليمون (ملعقتين بيكربونات + نص ليمونة)
جيبي اي وعاء فارغ وكبي فيهو ملعقتين بيكربونات واعصري فيهو نص ليمونة..
في البداية ح يفور ويكون رغوة نتيجة التفاعل..
خليهو بملعقة ح يهدأ شوية وتعالي امسحي الخليط دا كقناع علي يديك وقدميك وافركي برفق لمدة ٥ دقايق .. في كل مرة بنقول انو عدو البشرة السمراء الفرك المبالغ فيهو للمقشرات..
خليهو زي ١٠ دقايق تانية وغسليهو بموية ورطبي بعديهو كويس..
اهم شي بعد الماسك دا الترطيب عشان توازني والا ح تلاقي نتيجة عكسية نتيجة الجفاف..
طبقي الخلطة دي مرة الي مرتين في الاسبوع خصوصا لو كان عندك مناسبة مفاجاة ..
انا شخصيا بفضل مرة اسبوعيا كفاية جدا .. #النتيجة
نضارة ولون افتح بشكل ملحوظ من اول مرة ..بتحسي انو وسخ الدنيا دي كلو ماشي طالع 😄
احساس نضافة بالجد ❤
كمان الخلطة دي حلوة لسواد المفاصل والمناطق الحساسة وح تحسي بالفرق
البيكربونات كمان بتبيض الاظافر وبتخليها لامعة.. التوم هنا للأظافر طبعا .. يمكن عيبو الوحيد ريحتو لكن غير كدا عشان اتكلم عن التوم وفوايدو عايز ليهو كتاب لحالو
مشكلتي دايما في تكسر الأظافر..ومن الحاجات النفعتني بشكل كبير هي فرك التوم علي الأظافر وفايتمين كبد الحوت أو سفن سيز seven seas قبل كدا اتكلمت عنها بالنسبة للشعر والبشرة كمان ..
وانتو بتعملو في الخلطة دي افركي اضافرك بالمرة بالتوم وبعد تغسلي يديك بالموية ؛ افركي الليمونة علي اضافرك عشان ريحة التوم .. (الخطوة دي اختيارية طبعا 😊)
مع الاستمرار ح تلاقي اظافرك طالوا وأكثر صحة .. #ملحوظة
البيكربونات درجة حمضيتها بتختلف عن درجة حمضية البشرة عشان كدا اعملي حسابك وما تزيدي عن الحد المسموح بيهو في الاستعمال.. اكيد ما ح تستخدميها يوميا 😊
كمان البيكربونات منظف قوي بالنسبة للرؤوس السوداء في الوجه وبالذات اللي علي الأنف.. ممكن تعمليها مرتين في الشهر ح تزيلها ليك ..
وكمان فعالة في تبييض الأسنان .. في كمية من الاستخدامات للباكنج صودا أو البيكربونات ح نتطرق ليها لاحقا ان شاء الله بالذات للشعر 😊
ودمتن سمحات 😊
تعليقات
إرسال تعليق