تجربتي مع صبغ الشعر بالبيت وسحب اللون مع صبغات مانيك بانيك
صباح الخيراات بنات 😊
بالمناسبة انا كنت اكتر زول ما بظبط الصبغات في البيت والسبب دايما في سحب اللون او المشقر بيطلع ضارب وبالتالي اللون بيطلع باهت عشان كدا طولت من تغيير اللوك فاول شي قلت اقص الشعر واصبغ لاني مليت من اللون الأسود ولف الكعكعة 😂
صبغات مانيك بانيك لقيت ليها تجارب كتيرة للبنات ع النت وتجارب ناجحة وجميلة جدا فقررت اخوض المعمعة ياصابت ياخابت 😁 والطريقة ساهلة وواضحة جدا جدا بتلقيها في الورقة المرفقة مع الصبغة وفي الموقع بتاعهم..
اترددت كتير في اللون طبعا لكن قلنا دي الموضة وكدا 😄
صبغات مانيك بانيك الوانها حلوة وجريئة في نفس الوقت مامحتاجة صالون او زول محترف عشان يعملها ليك.. انتي لوحدك بالبيت ممكن تظبطيها بس اهم حاجة المرحلة بتاعة سحب اللون.. ودي مهمة عشان اللون يطلع ليك زي ما هو..
من #مميزاتها
انها مؤقتة بتقعد في الشعر من 4 الي 6 اسابيع حسب عنايتك بشعرك وحسب الالوان وبتنزل (اصلا كل ما تغسلي شعرك بتنزل معاك) لانو اغلب الصبغات بيكون فيها نسبة من المفتح عشان اللون يدوم فترة اطول..
هي عبارة عن صبغة نباتية (vegan) خالية من اي مواد كيميائية ضارة وخالية من الامونيا والبرابين..
لم يتم تجربتها علي الحيوانات عشان كدا نقدر نقول عليها خالية من القسوة..
ريحتها حلوة ومقبولة نوعا ما.. ملمسها ناعم اقرب لقوام البلسم وحمام الزيت..
اكتر شي البنات بتخوفوا منو هو سحب اللون او البليتشينق وبما انك ح تصبغي الوان فاتحة وجريئة يبقي ضروري تسحبي اللون..
كونك تسحبي اللون في خطوة واحدة دي حاجة ماصحية للشعر وغير كدا ممكن النتيجة تكون لون مائل للبرتقالي ودا ممكن بعدين تاثر ليك شوية كدا ع اللون الاساسي بتاع الصبغة.. فالأفضل يتسحب اللون بالتدريج وتقريبا بيتعمل كدا في الصالونات المحترمة.. 😊
بالنسبة لي الخطوة دي ما كانت ضرورية لاني كنت مستعجلة وبعدين انا من عشاق الشعر القصير لو حرق كدا كدا ح اقصو هههه.. المهم صحة الفروة طبعا..
يبقي افضل اسحبيهو بالتدريج واهم حاجة الاهتمام بالشعر بعد الصبغة..
#التجهيزات
لون الصبغة الاخترتو بالضبط هو (فوشيا)
لون شعري اساسا اسود فاكييد ح احتاج سحب لون
في قوتين للبليتشينق اللي هي 30 و 40 فوليوم.. انا اخترت 40 لانو لون الصبغة عايزاه فاتح وبالتالي ح يكون واضح وقوي.. اما 30 فوليوم دا للالوان الغامقة..
افضل حاجة انك تعملي اختبار الحساسية للصبغة.. حطيها علي المعصم بتاعك وخليها 24 ساعة..
دايما اختاري الويكيند للصبغة عشان يكون عندك وقت كافي تضبطيها..
تجهزي عدة الصبغة كلها قدامك والبسي ليك قميص قديم عشان لو اتلتخطي وكدا 😄
جهزي الشامبو بتاعك وفازلين.. دا بتمسحيهو بالجمبات برضو عشان جلدك محل منابت الشعر مايتلطخ ويتصبغ..
واغلب الادوات متوفرة مع المنتج (فرشة المد، الجونتيات، كيس للتغطية، عبوة لمزج البودرة )
طبعا بتكوني مغسلة شعرك قبل يوم او يومين وبدون ماتمسحي عليهو اي زيت او كريم..
#الخطوات
#مرحلة_سحب_اللون
اول حاجة البسي القفازات
فرغي البودرة كلها في العبوة واضيفي نص عبوة الديفلوبر وابدي اخلطي لغاية يبدأ يتماسك بعد كدا اضيفي الكمية الباقية واخلطي.. ح يبقي ليك زي قوام الزبادي تقريبا
خليهو يرتاح شوية لمدة دقيقتين اول قبل تبدي..
قسمي شعرك علي 4 او 6 اقسام (حسب غزارة شعرك)
امسحي الفازلين حوالين منابت الشعر
وابدي مدي المقشر من الاطراف للجذور
#معلومة
( عشان الجذور ماتطلع فاتحة اكتر لانو الصبغة في الحتة دي بتتفاعل مع حرارة الجسم فبتتصبغ اسرع )
خلي مسافة 1 سنتمتر من الجذور حفاظا علي الفروة وعشان الالوان الفاتحة بتكون مزعجة في الحتة دي (انا بحب كدا غايتو)
اعملي مساج لشعرك كلو (الشعر مش الفروة) عشان تتاكدي انو الشعر كلو وصلو المشقر..
بعد كدا غطيهو بالكيس عشان يتفاعل كويس ويسرع ليك المرحلة دي باقل ضرر..
في المنتج كاتبين انك تخليهو من نص ساعة لساعة كاملة..
انا خليتو 45 دقيقة لانو شح لي في رأسي وحسيتو ح يتحرق 😂😂 ما متعودة طبعا..
للالوان الغامقة نص ساعة كفاية جدا..
بعد كدا غسلي شعرك بشامبو منقي وخالي من البلسم عشان توقفي مفعول المشقر..
استنيهو ينشف او ممكن تجففيهو بالمجفف عشان تبدي تمدي الصبغة بعد كدا..
من الحاجات الملاحظة انو مابتحسي شعرك زي البلاستيك بعد البليتشينق فكان عادي جدا مع حبة نفشة كدا بس 😄
#مرحلة_تطبيق_الصبغة
دي اسهل خطوة طبعا ..
نفس خطوة مسحة الفازلين ولبس الجونتيات..
وبتكوني مقسمة شعرك ل4 اقسام..
بتشيلي من نفس علبة الصبغة وبتمدي علي شعرك من الجذور للاطراف.. لغاية تتاكدي انو الصبغة وصلت شعرك كلو..
ممكن تمدي الصبغة بالفرشة او بيدك ما فرقت المهم تكوني لابسة جونتي عشان ماتصبغ في يدك..
بتخليها من ساعة ونص لساعتين ونص بعد كدا تغسلي شعرك بموية باردة ضروري وتكوني لابسة الجونتيات طبعا..
بعد كدا جيبي نص كباية خل + نص كباية موية واشطفي بيها شعرك خليها دقيقتين واشطفي بموية باردة طبعا وبس..
طبعا الخل بيحافظ علي اللون عموما..
بتغسليهو تاني بعد يومين عشان الصبغة تثبت ويتغسل بشامبو خالي من السلفات او شامبو مخصص للشعر المصبوغ..
بتنشفيهو بمنشفة مخصصة عشان الصبغة لسا ح تكون نازلة بتنقط مع الموية..
طبعا مع كل غسلة الصبغة بتنزل معاك في الحمام عادي جدا عشان ما تتخلعي.. زي ماقلنا هي صبغة مؤقتة 😊
والنتيجة زي ما انتو شايفين 😊💗💗
في الصورة الشعر بعد سحب اللون
هنا بعد تطبيق اللون الفوشيا
هنا في الصورة بعد الاستشوار
#بعض_الملاحظات
حتي الان ماف تغيير في السبيبة 😊
في كل غسلة بينزل جزء من اللون ودا عادي
#كيف_احافظ_علي_اللون_لمدة_اطول
غسل الشعر مرة في الاسبوع
غسل الشعر بموية باردة
شطف الشعر بموية وخل
ابعدي من شامبو القشرة
استخدمي شامبو خالي من الزيوت والسلفات
#مكان_تواجدها
انا اتحصلت عليها من السعودية من متجر بي بيوتي ع الانستجرام ودا حسابها @manicpanicc
كمان بتلقوها في اسواق طيبة..
هنا في السودان بتلقوها عند واحد بس ناسية اسمو ح انزل ليكم الكرت بتاعو مع الصور تحت..
طبعا العلبة الواحدة بتكفي للشعر القصير حد الاكتاف..
مجموعة التفتيح بي 90 ريال
والصبغة بي 85 ريال
في السودان ماعارفة الأسعار بالضبط
#كسرة_بموية
شكرا ليكم ع التعليقات والردود الجميلةالمحفزة...
اول مرة اتبسط لتجربة صبغة لانها نجحت ودا شفتوا في عيون الشفع والاطفال اللي لاقيتهم في المطار كانوا مبسوطين اكتر مني 😂😂😂😂
وشكرا للمدونة السعودية ارتوس لانو بستفيد من مدونتها وتجاربها دايما💗💗
اهم حاجة انك كيف تهتمي بشعرك بعد الصبغة وتغذيهو وابدا ما ح يتضرر..
روووعه عجبني اتحمست اجرب
ردحذفالسلام عليكم انا من موقع خرطوم ستار الالكتروني يا ريت نتواصل في أقرب وقت
ردحذفالسلام عليكم ورحمه الله وبركاته
ردحذفعايزه أسألك من اسم صبغه سوداء ظريفه كدا لماما اول مرة عايزه تستعمل، عايزه حاجه ما تأثر على الشعر وتقلب اللون اسود.؟ بتنصحينا بشنو؟ وياريت لو حاجه متوفره هنا في السعوديه؟