تقليل تجاعيد اليدين

أكبر مهدد لينا نحن النسوان والبنات عموما هي الشيخوخة وفقدان شباب البشرة بظهور بعبع اسمو التجاعيد سواء ظهورها بالذات في الوجه أو اليدين ..
اليوم ح نركز علي حماية اليدين من التجاعيد والكرمشة
وليه اليدين بالذات لأنها اكتر حاجة معرضة للعوامل البيئية واكتر من الوجه كمان زي الشمس وغسيل الهدوم وغسيل العدة وعدة رمضان بالأخص 😂😂
ولكن مع تعديل نمط الحياة ومنتجات العناية بالبشرة بتساعدنا كتير في استعادة شباب اليدين بدون جراحات او حقن وكدا ..
طبقة الدهون التحت بشرة اليدين ما سميكة، عشان كدا بتلاحظي للاوردة بتاعتك بارزة ومع تقدم العمر بتبرز اكتر وكدا بتظهر اكتر تجعدا..
بس مجرد روتين وخطوات اتبعيها 1 2 3 وما بتجيك عوجة تب ..

#الخطوة_الأولي
الترطيب اكيد ودا بيكون داخلي وخارجي
داخلي اشربي موية كتيرة لأنو خلايا الجلد بتتكون اساسا من الموية ..
وخارجي بالكريمات واللوشنات المرطبة وبالتالي ح ترجع الخلايا لحجمها الطبيعي  ودا بيقلل من ظهور التجاعيد..
(راجعي بوست زيادة قوة ترطيب اللوشن )
وممكن تستخدمي زبدة كاكاو او شيا او حتي خلطات طبيعية من مكوناتها العسل او الزبادي مثلا ..

#الخطوة_التانية
ابعدي من الشمس يا اما بالواقي او البسي جونتيات 😊

#الخطوة_التالتة
المقشرات ومحفزات الكولاجين مثلا زي الاكرتين او الريتينول..برضو راجعوا بوست الأكرتين 😊
او اي منتج بيحتوي علي احماض فواكه زي مجموعة احماض الفواكه من فير اند وايت .. أو بيحتوي علي حمض الازيليك Azeleic acid زي سيروم الليمون..او بالأصح بيتكون من مادة اسمها KAD  أو PAD  ودي أختصار لمركب مستخلص من حمض الازيليك اسمو Potassium Azeloyl Diglycinate  السيروم دا انا بحبو شديد ..
عندو خاصية تقشير  وترطيب في نفس الوقت عكس حمض الازيليك الأساسي  ..وبالتالي بيفتح البشرة وبيزيل البقع والآثار  ..كمان مضاد لحب الشباب وممكن تستخدميهو للوجه حلو جدا ..
حمض الازيليك دا زي كريم الاسكينورين والازاديرم..
آمن جدا للحامل ❤❤😊
عندك برضو فايتمين سي اكيد دا الزيت وحلو جدا وكلنا عارفين اهميتو للبشرة عموما من حلاوة ونضارة وتفتيح ومحاربة تجاعيد..عارفنو غالي فما تبخلي بيهو ليديك او قدميك برضو ليهم حق عليك 😅

الخطوات دي كلها بتنطبق علي اليدين والقدمين كمان
والنتيجة تفتيح نعومة ولون موحد ومشدود 😊

#الطريقة
امسحي كريمك بتاع الترطيب عادي وبعد كدا تعالي امسحي كل سيروم براهو علي ايديك وقدميك تحت كفاية جدا
انا بفضل يكون بالليل وقت النوم ..

#ملحوظة
ماينفع تعملي السيروم دا وانتي طالعة الشمس سواء بتاع الليمون او بتاع فايتمين سي..
ابعدي من اي كريم تفتيح يحتوي علي كورتيزون بالأخص مادة الكلوبيتازول clobetasol لأنها السبب الرئيسي في جفاف بشرتك ودا من الآثار الجانبية للكورتيزونات عموما ودا بتلاحظيهو خلال استعمالك لمعظم كريمات التفتيح زي كريم ديفا او دودو او كاروتون او عرديب والصباعات سيفيك او موفيت او اورانجفيت  ...الخ
والجفاف بيعجل من التجاعيد..
دا غير انها بتخلي اوردتك بارزة برضو ..
إذا بتعملي واحد من الكريمات دي يبقي تضاعفي مجهودك للترطيب بشكل كبير عشان تتحاشي الجفاف وتكوني فاتحة ونايرة بفهم 😉

#كسرة_بموية
الليلة دا بوست مختصر جدا مع انو الموضوع مهم ويستاهل الواحد يتعمق فيهو اكتر وان شاء الله ح نفصلو في مرات جاية..
السيروم بتاع فايتمين سي والليمون ديل من احلي الحاجات الجربتهم مش بس لتجاعيد كمان بيفتحوا البشرة وبالذات للمفاصل  بس هنا ركزي علي اليدين والقدمين ما اكتر ومافيهم اي ضرر  😊
ح نجي لاستعمالاتهم التانية مرة تانية ..
صناعتهم ايطالية وبتلقوهم في اي صيدلية او عند ناس ميناماس في حدود 130 و160 وبيقعدوا معاك فترة طويلة قريب شهرين يمكن ..
البوست الجاي كيف تقللي من أضرار الصابون علي يديك من غسيل عدة رمضان 😂😂

ودمتن سمحات وما مجعدات ولا مكرمشات 😁