مجموعة بايوديرما للعناية بالبشرة الدهنية والمختلطة
من اجمل المجموعات اللي مرت علي واول مرة اواصل في حاجة كدا لمدة سنتين علي التوالي بدون كلل وملل..
بشرتي الدهنية كانت مطلعة زيتي الصراحة..حاليا اقدر اقول مع المجموعة دي قدرت اتخلص من كمية الزيوت والدهون بنسبة كبيرة جدا ونادرا ما تطلع حبوب أو بثور..
غير انها علاج اعتبريها وقاية في المقام الأول..
بايوديرما ليها براءة اختراع بسبب تركيبة ال ( fluidactiv patented formula) وقبل كدا انا اتكلمت عنها في بوستات سابقة ارجعوا ليها
التركيبة دي بتمنع انسداد المسام دا غير انو بتزيد سيولة الدهون بحيث تسهل اذابتها وفي نفس الوقت بيتحكموا في إفراز الدهون المسببة لكل مشاكل البشرة الدهنية والمختلطة 😊 يعني ح تحصلي علي افرازات دهنية شبيهة بما تفرزه البشرة العادية..
#الغسول Sebium gel moussant
قوامو بيشبه الجل حتي ممكن يستخدم كجل للحلاقة 😄
خفيف علي البشرة وابدأ ما بيسبب جفاف
مناسب للبشرة الدهنية والمختلطة
بيمنع ظهور الحبوب وبينضف المسام ويمنع انسدادها
خالي من الصابون والبرابين وفيهو نسبة من حمض اللاكتيك المقشر ..
#المقشر Sebium gel gommant
دا عبارة عن جل مقشر أو اسكراب فيهو حبيبات صغيرة لكن خفيف علي البشرة وفي نفس الوقت بتحسي ملمسها باين بالجد بينضف من قلب..
قوامو شكل جل سائل عشان يناسب البشرة الدهنية والمختلطة
ممكن تستخدميهو مع فرشاة التنظيف زي اولاي أو كلارسونيك مثلا مرة أو مرتين في الاسبوع
#المرطب Sebium hydra
دا المرطب بتاعهم مناسب للبشرة الدهنية والمختلطة
ضروري جدا ترطبي بشرتك بعد الغسول والتونر عشان توازني وترجعي بشرتك لطبيعتها..
كمية بسيطة منو تكفي عشان ما يدبق ليك..
#السيروم الليلي Sebium serum
بعد تمسحيهو بالليل برضو كمية بسيطة جدا تكفي ح تصحي الصباح وشك منور وما مزيت زي كل مرة ..
بيتحكم في إفراز الدهون أثناء النوم ..
بيحتوي علي حمض الجلايكوليك ومرطب البانثنول
#السيبوم_جلوبال Sebium global
دا اجمل حاجة البثور والرؤوس السوداء وحتي الحبوب ذات الرؤوس البيضاء.. فيهو كذا حمض منهم السالسيليك اسيد ..
بيقشر وبيزيل الخلايا الميتة من علي المسام
يعني تقشير وتجديد لبشرتك وفي نفس الوقت بينظم إفراز الدهون ..ما ح تحسي ببشرتك بتزيت نهاائي زي اول
ح تلاحظي للرؤوس السوداء الفي نخرتك بالذات اختفت 😊
#سيبوم_بور_ريفاينر Sebium pore refiner
اما دا بتاع المسام وممكن تستخدميهو زي البرايمر وكبيز للمكياج .. امسحيهو بعد المرطب بتاعك ما خ تلاقي وشك بيزيت يمكن لنص اليوم وعشان يقلل المسام محتاج انك تستعمليهو لفترة طويلة متواصلة عشان تحسي بالفرق
غير كدا ممكن تستخدميهو بعد واقي الشمس بيقلل من دهنية كريم واقي الشمس وتطلعي عادي
ما اكتر كريم انا بحبو ❤😊
دا بوست مختصر جدا عن المجموعة دي بالنسبة للبنات البيسألوا من مجموعات عناية للبشرة الدهنية وقبل كدا انا كتبت عن بايوديرما في بوستات منفصلة بتلقوها في القروب
أو علي موقع المدونة Maha_forawe_blog @ أو ع الانستجرام Maha forawe blog
من المجموعات الحلوة برضو( مجموعة كلينيك.. هملايا .. سيتافيل.. افين )
ورونا انتو تجاربكم مع المجموعات الاستعملتوها للعناية عموما 😊
تعليقات
إرسال تعليق