عطر مميز للمتزوجات
مساء الخيرات يا بنات 😊
تعالوا نغير ليكم من نوعية البوستات حبة .. وملاحظة الناس بتحب بوستات التعطير سواء للجسم او البيت او الدواليب ...الخ ..
قبل كدا انا ذكرت في بوست طريقة تعطير المنطقة الحساسة ولسا كمان في طرق كتييرة مناسبة للحتة دي ..
انا من الناس المابحب الخمرة بشكل بيور كدا لوحدها.. بحسها بتتفاعل مع الجسم وبتدي نتيجة ما حلوة سواء الريحة ذات نفسها أو كإعتبارها كحول بيسود الجسم ( طبعا دا رأي شخصي يا جماعة ما تزعلوا 😄) ..ما زي ما بشمها في فتيلا زاتو كدا .. أو يمكن مع الدخان مثلا بتدي ريحة جميلة جدا .. فشنوو في واحدة كدا وصفت لي كم عطر عشان اخلطو مع الخمرة واطلع بنتيجة وااو وبكدا عصفورين بحجر واحد ..
العطور الزيتية بطبيعتها قوية وثابتة ولو اضفتيها لاي عطر بتثبتوا اكتر وبتضفي ليهو نكهة خاصة زي الصندلية لما نضيفها للخمرة ..
#المكونات
عطر نورة الزيتي + مخمرية أحلام + خمرة(اي نوع مفضل لديك )
طبعا المكونات دي ما اجباري يعني في ناس ما بتحب العطور الزيتية دي بالذات وممكن تستبدليها بالعطر الزيتي البيناسبك 😊
جيبي فتيل بخاخ فاضي ٥٠ مل مثلا وكبي نورة والمخمرية كاملين وتعالي كملي الفتيل بالخمرة..
حاسبي انو الخمرة تكون صافية مافيها اي حبيبات فاهمني اكيد عشان ماتقفل ليك البخاخ بعدين لما تجي تتبخبخي😁
لو حصل واتقفل ممكن بعد كدا تدخلي اصبعك وتتعطري بيها عادي ما مشكلة بس كدا ما ح تقدري تتحكمي في الكمية..
التعطير زي ماعارفين ركزي علي اماكن النبض وكمية صغيرة جدا بتكفيك..
اماكن النبض دي الحتات البيكون فيها تدفق الدم بكثرة للجلد وبالتالي ح يكون امتصاص العطر اعلي وبيثبت لأطول فترة ممكنة..زي الرقبة والسرة وخلف الاذنين والمعصم وخلف الاكواع(مكان بيركبوا الدرب 😂) وخلف الركبة وتحت الصدر كمان.. (موضحة في الصورة شوفوهم )
العطر الناتج تحفففة وقوي وابدا ما بشبه الخمرة يعني ممكن تطلعي بيها عادي ..حاجة كدا الا تجربيها براك..❤❤العطر دا عندو علاقة بالتوب السوداني خاصة 😄😉
بتمني البتجربها وتعجبها تجي وتورينا انطباعها ..
#كسرة_بموية
دايما ميزي عطرك بإضافة لمساتك عشان تكوني مميزة
ودمتن مميزات 😊
صراحة ابدعت في انتقاء افضل الريحة زوينة شكرا لك على هذه المعلومات
ردحذف