ماسك الأسبرين كماسك للطوارئ
صباحاااتكم بنات 😊
الاسبرين زي ماعندو فوائد علاجية عند البلع كمان عندو فوائد واستخدامات تجميلية ممكن تستفيدي منها ..
الاسبرين هو نفسو حمض السالسيليك او الصفصاف الموجود في معظم المستحضرات التجميلية سواء صابون او غسول او شامبو او كريم ..المستخدمة بكثرة لعلاجات حب الشباب عبارة عن مقشر ومضاد للالتهاب ..
انتي ممكن تستفيدي من حبوب الاسبرين الموجودة عندك في البيت او الصيدلية وسعرها زهيد جدا ونتائجها ممتازة وتفي بالغرض في كل الأحوال
استخداماتو للبشرة كالتالي :
مقشر للبشرة
قابض للمسام
فعال جدا لحب الشباب والبثور
نضارة وتفتيح البشرة
لخطوط التجاعيد الدقيقة
الانتفاخ تحت العين
قشرة الشعر
#طريقة_استخدامو
ممكن تستخدميهو كماسك او تضيفيهو لغسول الوش بتاعك اليومي لو كنتي بتعاني من حبوب في بشرتك خصوصا لو دهنية او مختلطة ..
٣ حبات اسبرين + عسل طبيعي + كريم مرطب
اهرسي حبات الاسبرين تماام واضيفي ليهم حبة عسل ومعاهم حتة صغنونة من كريمك المرطب وبكدا بتتكون معاك عجينة طبقيها علي بشرة وشك وهو نضيف .. خليهو ربع ساعة وغسليهو بغسولك عادي واهم خطوة بعد الماسك ترطبي وشك بكريمك المرطب..
الترطيب اهم حاجة بعد اي ماسك خصوصا لو كان مقشر عشان ما يديك نتيجة عكسية ..
ممكن تستغني عن العسل لو ما بينفع معاك او اذا ماعندك ..بدليهو بزبادي مثلا او موية ورد او جل صبار..
انا شخصيا بحب العسل لأنو هو نفسو فعال لعلاج الحبوب ومرطب في نفس الوقت .. بس بعدين اي واحدة والحاجة البتنفع معاها ..
الماسك دا دايما بسميهو ماسك الطوارئ لأي حبة بتقوم فجأة بدون مقدمات خصوصا ايام البيريود 😊
الماسك حلو جدا جدا للمسام الواسعة كمان ..
بما انو مقشر ح تلاحظي بشرتك فاتحة وكلها نضارة ..
اي انتفاخات تحت العين ح تلاحظي انها قلت كتيير لأنو مضاد للالتهاب ..
فعال للحبوب والبثور كمان ..
ممكن تزودي كمية الاسبرين حسب حالة الحبوب اللي عندك لكن ما اكتر من خمسة حبات .. ( تركيز ١٠٠ ملجم )..
أو تاخدي حبة واحدة بس مع حبة موية وتطبقيها علي مكان الحبة وبس ..دا اذا كانت حبة واحدة طارئة كدا 😄
اما لو وشك كلو حبوب فالافضل ٣ حبات ..
لتقشير الخلايا الميتة من ٣ _ ٥ حبات كفاية جدا ..
ممكن تضيفي ٣_٥ حبات من الاسبرين للغسول اليومي بتاعك ح تلاقي تحسن كبيير في بشرتك مع الايام .. (لكل ١٠٠ مل من الغسول )
بالنسبة لقشرة الشعر اضيفي ٣ حبات اسبرين مهروسات للكمية البتغسلي بيها شعرك وح تتخلصي من القشرة خلال اسبوع بالكتير ..
كمان بيرجع ليك اللمعة لشعرك وإذا كنتي صابغة شعرك بيثبت ليك الصبغة .. 😊
كمان ممكن تستخدميهو لتقشير القدمين بالذات من تحت عشان نتخلص من الجلد الميت في الحتة دي
٨ _١٠ حبات اسبرين + ملعقة ليمون + عسل + زبادي
اخلطيهم تماام وطبقيهو علي رجليك ولفيهم بكيس لمدة ربع ساعة بعد كدا غسليهم ورطبيهم كويس بأي كريم للجسم ..
كل الماسكات دي مرتين في الاسبوع كفاية جدا ..❤🌷
المهم جربوا ووروني 😊
الحوامل افضل يبعدوا عن اي حاجة فيها سالسيليك اسيد
ودمتن سمحات ❤
تعليقات
إرسال تعليق