تقشير الجسم من مكونات داخل بيتك

التقشير يعني نشيل طبقة الجلد الخارجية اللي ع السطح والخلايا الميتة ويجددها وهو من اهم اسباب النضارة  للبشرة سواء كان للوش ولا للجسم ..كلنا بنلقي نفسنا بنهتم بوشوشنا اكتر من اجسامنا ويمكن اكتر سبب بيخلي اجسامنا ما تستجيب لاي كريم انتي بتستخدميهو هو عدم التقشير الدوري ... دا غير انو النضارة والتألق والنعومة وبشرتك بتكون افتح يمكن بدرجة او درجتين بالذات اذا استمريتي عليهو ..
بالجد قدر ما اوصف ليك مدي الفايدة البتاخديها من التقشير عموما ما ح اقدر اوفي ودا من تجربة شهور.. وحياتك الجمالية ح تتغير بدرجة كبيرة ..
قبل كدا اتكلمنا عن الاكرتين او مشتقات فايتمين اي زي الدفرين والماربالين والاكنيلين كمقشرات بالنسبة للوش ..اما بالنسبة للجسم ما ح نستخدم الاكرتين واخوانو اكيد ولا ح نشتري مستحضر عشان تمسحيهو وكل الح تعمليهو انك ح تستفيدي من مكونات عندك في البيت وتعمليها كمقشر ..
ما ح نكتر الكلام واديكم الزيت طوالي .. واعتبروا الماسك الجاي دا او الخلطة دي زي التقشير بأحماض الفواكه ..

#المكونات :
3 معالق زبادي
 ليمونة كاملة
 ملعقتين خل تفاح
ملعقة بن
 ملعقة عسل نحل او سكر
ملعقة كركم
حبة فايمين سي 1000 ملجم
شريط  اسبرين
ملعقة بيكربونات

زيادة او نقصان الكميات دي علي حسب حجم جسمك وكدا ..

الزبادي : بحتوي علي حمض اللاكتيك .. مقشر خفيف وبيفتح البشرة  وغني بالاحماض الدهنية المرطبة ..

الليمون : بيحتوي علي حمض الستريك ..كمان بيفتح البشرة بصورة جميلة جدا والليمون غني التعريف اكيد..
خل التفاح : بيحتوي علي حمض الماليك او حمض التفاح وليهو دور في تنعيم البشرة وكمان بيشتغل علي السليلوليت وبيحارب الشيخوخة ..

فايتمين سي : بيحتوي علي حمض الاسكوربيك ومعروف انو مقشر خفيف ومحفز للكولاجين وعامل مفتح للبشرة  ومضاد للاكسدة واييك من فوايدو التي لاتحصي ولا تعد .. هنا اخترنا الحبة الفوارة لانو الجسم بيقدر يتحمل حمضيتها ما زي الوش وغير كدا هو مجرد ماسك ما بيقعد لساعات علي البشرة ..

الاسبرين : هو عبارة عن حمض الساليسيلك وتقشير البشرة بحمض الساليسيليك يتم للطبقات العليا للبشرة ممّا يجعل البشرة أصغر عمراً من خلال تجديد بروتين الكيراتين في البشرة والحمض دا حلو جدا للشعر البينمو تحت الجلد لو اضفناهو مع حمض الجليكوليك بالذات ..ومعروف انو بيفتح المناطق الحساسة والاكواع والركب

العسل : بيحتوي كمية من الاحماض كمان مفيدة جدا للبشرة دا غير انو بيحفظ الرطوبة وبيحتوي كمية من الفايتمينات والبروتينات ..ممكن نستخدم بدليهو سكر اذا ما اتوجد عسل نحل..

البن : حبيباتو بتعمل زي الاسكرب ومعروف انو البن بيحتوي مضادات اكسدة و بيقلل السيلوليت بنسبة كبيرة بتقشيرو للبشرة وهو مكون رئيسي في مقشر فرانك المعروف

الكركم : هو مفتح للبشرة بنسبة مية بالمية وبيزيل اي بقع سوداء وتصبغات جلدية واعتقد انكم بتعرفوا سحر الكركم في علاج الكلف كماسك او كمشروب للكركم الطازج بالذات وان شاء الله ح نتكلم عن الكركم في علاج الكلف في بوست منفصل  ..

بيكربونات الصوديوم : مقشر قوي جدا كمان بيعادل لينا شوية من الاحماض الفوق دي بما انها مادة قاعدية او قلوية ..  وهي من المركبات البقولو عليها (امفوتيرية) يعني عنها قدرة القواعد والاحماض الاتنين .. بتشتغل اكتر علي السواد الفي الكوعين والركب بالذات ..البيكربونات فوائدها واستخداماتها كتيرة جدا للبشرة والشعر والاسنان والاضافر بس كمان بحذر وماتكتروا المحلبية .. كمان حبيباتها الصغيرة بتعمل زي الاسكرب او السنفرة ..

المهم كل المكونات الفوق دي كلنا او معظمنا عارفين اهميتها للبشرة او بالكاد سمعنا عنها ,,, ولو ملاحظين كلها مقشرات وبتفتح البشرة ..
ما تسمعوا احماض وتقشير وتقولوا خلااص جلدكم ح يتفسخ !!
كل الاحماض دي تقشيرها خفيف وعلي السطح بس بتشيل الجلد الميت وتدي فرصة انو خلايا الجلد تتجدد وبالتالي بشرتك ح تكون افضل بكتيير وبلاستمرار عليها يتلقي لونك فتح وما اي تفتيح بل ح تفتحي بفهم وكلك نعومة وترطيب والترطيب اهم شئ للمحافظة علي نتايج التقشير عموما .. يعني عملتي تقشير لاي منطقة في جسمك بما فيهم وشك يبقي لازم ترطبي ترطبي ترطبي ان شاء الله بزيت فول ..

#طريقة_الاستخدام
اول شي بتسحني حبة الفايتمين سي وحبات الاسبرين وتضيفي ليهم المكونات دي كلها مع بعض ..وبكدا ح تكون عندك خلطة كريمية جااهزة .. وهي تقريبا نفس فهم الماسك او عروكة خفيفة كدا ..
بتطبقي الماسك دا علي جسمك بتمديها كأنك بتعملي مساج لنفسك ..
تستنيها لغاية تنشف او شبه ناشفة وبعد كدا تبدي تفركي زي الدلكة بس براحة براحة ح تطلع معاك بكل سهولة ..
ما تكتري العسل او السكر لانو ح تتلصق عليك وح تلقي صعوبة في الفرك وما ح تتطلع ليك بسهولة ..
بعد تخلصي من تدليكك دا خشي تحت الدش واتمصمصي من باقي الماسك ..
بعد كدا تعالي اتمسحي بزيت جوز الهند او زيت زيتون او زيت لوز حلو او اي زيت انتي بتحبيهو ونافع معاك او ممكن تعملي خلطة بتاعة زيوت المهم تتمسحي من الزيت وتتجلبطي زييين وبرضو كأنك بتعملي مساج لنفسك لغاية تحسي انو خلاص الموية نشفت منك زي 5 دقايق تقريبا  .. بعد كدا خشي تحت الدش واتمصمصي من الزيت بدووون صابون طبعا والا ح تفقدي اي حاجة ..
اطلعي من حمامك عادي وبعد تنشفي ح تشوفي النعومة والترطيب من غير ملمس زيتي واذا عايزة تتمسحي تاني بكريمك اليومي ممكن عادي واذا ما حابة ولا بتحتاجي ..
في حركة تانية ممكن تعمليها باستخدام ملح الحليب من يوكو وهي انك بعد تتمسحي بالزيت اعملي فوق ليهو الملح دا وافركي براحة براحة وركزي في الحركة دي علي المؤخرة بالذات محتاجة دعك شديد الصراحة 😂😂 وصدقيني لو استمريتي علي الملح دا مع الزيت ما ح تتعرفي علي مؤخرتك تاني وح تنافسي نيكي ميناج في اللمعة والنعومة بس استمري فيها يوميا او يوم بعد يوم او باكتير مرتين في الاسبوع ..

عارفين فايدة الدلكة وحلاوتها في شنو (الفرك + الدهن او الزيت )  بالرغم من انها كلها ريحة في ريحة ومافيها مواد مفيدة تذكر لكن بتنعم والله وبتكوني مرطبة  لأنو لما  نجي نتدلك  اكيد بنفرك وبالزيت كمان ودا بيطلع الخلايا الميتة نوعا ما وبعديها بنستحم بدون صابون ونطلع حتي مرات ولا بنحتاج نتمسح بعد الحمام  والاهم من كدا الزيت او الدهن البنطلعها بيهو دا سبب الترطيب والنعومة .. ليييه طيب  ؟! لانو الزيت مع الموية بيحبس لي الرطوبة وبالتالي ما ح نفقدو ولا ح نفقد الموية بسهولة ودي افضل طريقة ترطيب لجسمك في الحمام.. بدل تطلعي ناشفة من الحمام وتتمسحي  كدا ما ح تستفيدي من كريمك او الزيت البتتمسحي بيهو  وح نجي نتكلم عنها بتفصيل اكتر ..

#بعض_النصايح
ممكن تضيفي اي مكون مفيد عندك من المطبخ زي النشا او الكستر او دقيق وبكدا بتزيدي فوائد الماسك دا ..
بالنسبة للفرك ما تفركي شديد لغاية تكبي الدم وزي ما بتفركي وشك بالمقشر كمان بنفس القوة افركي جسمك ولازم تختي في اعتبارك انو الفرك الشديد هو عدو البشرة السمراء يعني بس زي ما بقولوا الخواجات جينتلي كدا ..
الاستخدام للماسك دا 3 مرات في الاسبوع وبعد تحسي نفسك وصلتي لمرحلة من النضارة والنعومة وزهجتي من الوضع دا ممكن مرة او مرتين بالاسبوع هههه
بالنسبة للناس الشغالين او الكسلانين وشايفين انو الموضوع دا مرهق بالنسبة ليهم فكفاية عليهم مرة في الاسبوع يوم الجمعة يعني بس ما ح يوصلوا لنتايج سريع في التفتيح بالذات وممكن باقي الايام تستحموا بطريقة ملح الحليب يوكو مع الزيت كمان نتايجو حلوة شديد ..
الخلطة دي تنفع للناس العنهم ما يسمي بجلد الدجاجة او الاوزة واللي عنهم مسامات وشعر بينمو تحت الجلد ..بالجد دا ممكن يكون حل ناجع اذا استمريتوا فيها ..
البنات البستخدمو كريمات تفتيح فيها كمية كورتيزون وبيحسوا بجفاف فظيع وعدم توحيد في اللون بدل تعملوا الاكياس وتزيدوا امتصاص الكورتيزون للجسم كلو فالافضل انكم تعملوا الماسك دا والطريقة دي ..ح تلقي نفسك اتخلصتي من حنك الجفاف بالذات ..
ح تلقي انو الركب والكيعان وكل المفاصل بدت تفتح واللون اتوحد .. وبقيتي نايرة ومفسوخة ونضيفة بفهم وحتي ما بيكون واضح انك عاملة كريم تفتيح ..

طبعاً كُل أنواع التقشير البتعتمد على الفرك سواء بالاسكربات والسنفرات أو الليفه ، بتساعد على نعومة الجلد وَ التخلص من الجلد الميت بالإضافة إنها تحسن من مظهر الجلد وَ تحد من مظهر السيلوليت وَ تحسن الدورة الدموية وكدا...
يعني نفترض انو في اسكرب زي بتاع البابايا أو زي كريم كاب مثلا  مكوناتو فوائدها لا تذكر أو يكون عبارة عن سكر وَ زيت ويقولوا ليك انو بيفتح ويخفف من السيلوليت وَ يحسن من الدورةالدموية ..ورجغ ورجغ ورجغ
 يعني هل فيه مكونات خاصة ؟
لا أبداً فوائده كلها  بسبب الفرك ماُ المستحضر نفسو

#كسرة_بالدكوة
التقشير هو روتين العناية المحارب للشيخوخة وسر شباب البشرة يا بنات ..انا كلمتكن غايتو .. 😉

تحياتي ليكن
ودمتن سمحات ونايرات :)