ماء الأرز المخمر للبشرة والشعر

صباح الخير عليكن ❤
هنا الواحدة تسأليها يا هناية وشك دا بتعملي ليهو شنو ناااير كدا !! طبعا ديك النوع الغتيت تقول ليها :بري يا هناية ولاشئ دي موية الوضوء 😂😂
اهاا في الصين تسأليهن بيقولن ليك موية الرز 😂
لكن طلعن ما بكذبن.. ويمكن يجي يوم والأبحاث تثبت فعالية موية الوضوء 😂
موية الرز يا جماعة استفيدوا منها وما تدفقوها.. فوائدها عظيمة ومااهينة.. دي ثروة جمالية بالجد
زمان حكوا لينا انو في قرية كدا تقريبا صينية القرية حتي مسمينها(قرية الشعر الطويل ) نسوانهم بشرتهم عحيبة وشعرهم عجيييب  وطلع السر انو بيغسلوهو بموية الرز المخمر وبيتحمموا بيها كمان 😂..
خلوكم من ديل ..في شركات كتييرة داخلة في منتجاتها الرز بشكل رئيسي وفعالة جدا وغالية كمان ..
المهم اعتقد انو ماف ارخص من الرز وتجربتو ما ح تكلفك شي .. اهم شي تواصلي لفترة عشان تقدري تحكمي علي التجربة..
موية الرز مفيدة للبشرة والشعر ..

#للبشرة
بتحتوي علي كمية فايتمينات ومعادن واحماض امينية مفيدة للبشرة ..
بيحتوي علي النشا والبروتين..
بيحتوي علي فايتمين C , B , و E
بتحتوي علي حمض الفيروليك ferulic acid  واللي هو مضاد للتأكسد  وعلي الالانتوين allantoin ودا مرطب ومضاد للالتهاب كمان
بما انو بتحتوي علي الحاجات دي بنلقاهو مفيد جدا في حالات حروق الشمس والتهابات وتهيج البشرة بشكل عام
موية الرز تعتبر منظف وتونر لكل أنواع البشرة
بدل تشتري تونر استعملي موية الرز أفضل طبعا ..
بعد الاستعمال اليومي لفترة ح تلاقي بشرتك منورة وفاتحة وموحدة ونضرة وناعمة بالجد ❤
بما انها تونر ح تقلص ليك حجم المسامات كمان ..
ناس حب الشباب كمان ركزوا علي موية الرز شديد مفيدة للعلاج ..
وناس الأكزيما برضو 😊

#للشعر
 أفضل حاجة استعملي ماء الأرز المخمر عشان ال pH.. مفيدة جدا لنعومة وتطويل الشعر واطفاء لمعة عليهو
ممكن تستخدميهو كآخر شطفة بعد تغسلي شعرك بالشامبو أو زي البلسلم اشطفي بيهو شعرك وياحبذا لو اضفتي ليهو زيت عطري زي اللافندر أو شجرة الشاي؛ ادلكيهو برفق وخليهو 5 دقايق واشطفيهو بالموية.. مرتين في الاسبوع كفاية جدا أو حسب توقيتك لغسيل شعرك 😊

#طريقة_تخمير_ماء_الأرز
في طريقتين لتحضير ماء الأرز بشكل عام
#الطريقة_الأولي (المخمر)
نص كباية أرز ( اي نوع ما مشكلة ) + كبايتين موية
اول حاجة غسلي الرز كويس من اي شوائب بعد كدا اضيفي ليهو كبايتين موية وخليهو منقوع كدا لمدة نص ساعة تقريبا ..
قلبيهو كويس لغاية تحسي انو معكر..
صفيهو في برطمان واقفليهو كويس وخليهو في درجة حرارة الغرفة لمدة ٢٤ ساعة أو يومين بالكتير عشان يتخمر ..
بعد كدا اغليهو في النار عشان توقفي عملية التخمير وما يبوظ ليك بسرعة..
بعد يبرد احتفظي بيهو في التلاجة لمدة أسبوع بالكتير ورجيهو عند كل استعمال سواء للبشرة أو الشعر..
ماء الأرز المخمر غالبا بيكون مركز فممكن تخففيهو بحبة موية لما تجي تستعمليهو..
جدديهو كل اسبوع أفضل 😊
باقي الرز الفضل اطحنيهو وأستعمليهو كاسكراب للجسم مع اي زيت  زي فكرة ملح الحليب..

#الطريقة_التانية_بالغليان
هي انك تغلي الرز مع الموية في النار لغاية ينجض ..
صفي الموية من الرز في برطمان وبعد يبرد دخليهو التلاجة لمدة أسبوع بالكتير..
أثناء الفترة دي استعمليهو عادي سواء للشعر أو للبشرة
هنا الغليان بيخلي الماء يكتسب كل العناصر الغذائية اللي في الرز زي عملية التخمير..
هنا ما بتحتاجي تخففيهو زي المخمر داك ..
انا شخصيا بفضل ماء الأرز المخمر  😊

#كسرة_مخمرة
ماء الأرز المخمر أفضل من العادي بالذات للشعر لأنو عملية التخمير هنا بتقلل ال pH بيكون اقل حمضية ..
بعد عملية التخمير بيكون غني بالمواد الغذائية وبالتالي بيغذي الشعر وبيحفز نموهو بشكل ملحوظ

نقدر نقول بإختصار انو فوائد ماء الأرز #المخمر هي :
_ شد البشرة
_ قابض للمسام يستخدم كتونر بعد التخفيف بنسبة ١:٢
_ تفتيح ونضارة البشرة والتخلص من البقع والتصبغات
_ تقليل الخطوط الدقيقة التجاعيد
_ يحسن مرونة الجلد ويقلل من الالتهاب
_ علاج فعال لحروقات الشمس
_ علاج فعال لحب الشباب و الأكزيما
_ بيستخدم لتلطيف البشرة بعد الديرمارولر
_ تطويل الشعر يستخدم كبلسم بعد التخفيف برضو
_ تنعيم الشعر بالذات الشعر المجعد

ودمتن جميلات ❤😊