ماسكات هملايا هيربالز Himalaya herbals masks
صباح الخيرات يا بنات ❤
بعتذر عن الغياب وعن عدم الرد لبعض الأسئلة والاستفسارات سواء في الخاص أو في الكومنتات.. لكن ح ارجع وارد ليكم بقدر الإمكان وبقدر المعرفة 😊
وبشكر كل واحدة بترد علي بعض الكومنتات بواقع خبرتها وتجربتها كمان .. اهم حاجة نقدر نستفيد من بعض ..
في كل مرة انا برجع للمواضيع اللي بعض البنات طرحوها كمشكلة بالنسبة ليهم أو للأغلبية ومحتاجين بعض الحلول وانها تتفصل اكتر .. وان شاء الله اقدر افيدكم..
اليوم ح اتكلم عن ماسكات هملايا .. واعتقد بتعرفوا مجموعة هملايا للعناية بالبشرة الدهنية بالذات غسول النيم
واللي ح نتطرق ليهو في بوست تاني..
ما ح اطول عليكم المرة دي 😁
تقريبا هم ٤ ماسكات اساسيات
ماسك الطين والجوز..
ماسك النيم
ماسك اللوز والخيار
ماسك الفواكه
#ماسك_الطين_والجوز
الطين الغني بالمعادن زي المغنيسيوم كالسيوم بوتاسيوم بتحد من ظهور التجاعيد والخطوط الدقيقة..
دا غير انو الطين معروف بخصائصه المنظفة ..
الماسك دا ينفع للبشرة الدهنية والمختلطة وماينفع للجافة أو الحساسة بشكل عام..
بينضف بعمق..بيمتص الزيوت الزايدة ..بيزيل الخلايا الميتة
بيغذي البشرة وبيرجع ليها حيويتها
لما نقول ينظف بعمق يعني اقلاها بيخلص المسام من الدهون واي شوائب..ونحن عارفين دي كلها مشاكل البشرة الدهنية..
بالاستمرار عليهو بتلقي بشرتك نضفت والرؤوس السوداء قلت بشكل ملحوظ..
الجوز كمان عندو خاصية إزالة الشوائب والخلايا الميتة
القناع دا لونو اصفر كدا وريحتو عادية اقرب الطين العادي ..
بعد تعمليهو علي بشرتك بتحسي وشك مشدود ..
خليهو زي ربع ساعة كدا وتعالي امسحيهو بقطنة مبللة بموية عادية او موية ورد أفضل طبعا..بعد كدا غسلي وشك عادي بموية باردة وأعملي تونر عشان المسام واهم حاجة ترطبيهو بكريمك المرطب.. الخطوات دي اعتمديها بعد أي ماسك تعمليهو 😊
ماسك الطين دا مرة واحدة اسبوعيا تكفي..
انا بنصح بيهو للناس البشرتهم دهنية شديد اكتر من المختلطة لأنهم اقل عرضة للجفاف..
المختلطة ممكن تحطي علي الحتات البتزيت بس ..
#ماسك_النيم_والكركم
دا بيناسب البشرة العادية والمختلطة والدهنية
بينقي البشرة كمان وبيتحكم في افرازات الدهون بدون ما يجفف ابدا ..بيحميك من ظهور الحبوب والبثور لأنو النيم معروف بخاصيتو المقاومة للبكتريا .. والكركم كمان بيلطف ويفتح وينقي البشرة..
لونو زيتي غامق وقوامو شبه كريمي بتحسي فيهو حبيبات صغيرة وريحتو كمان بعتبرها عادية وبتحملها..
بيتعمل بنفس طريقة ماسك الطين..
بالجد قناع جميل جدا وبينضف بإخلاص.. بعد كم مدة من الاستعمال المستمر بمعدل مرة اسبوعيا الي مرتين ح تلاقي نتايج تسعدك وح تلاقي الحبوب خفت كتيير 😊
#ماسك_اللوز_والخيار
دا أحلي ماسك وأنا بحبو لأنو بيذكرني ماسك الفحم بالغراء الأبيض.. نفس القصة بما انو فيهو صمغ
ما بيتغسل القناع دا ..مجرد ما ينشف بتطلعيهو برااحة زي كأنك بتطلعي في قشرة أو طبقة خارجية..
الماسك دا ممتع بالجد ونتيجتو حلوة جدا..
بينقي ويجدد البشرة بمكوناتو دي
بيزيل الشوائب من المسامات بالذات الرؤوس السوداء من علي النخرة..
احلي حاجة يتعمل بعد البخار وممكن قبل مكياجك لأنو بالجد بينضف بينضف وبتحسي بنعومة عجيبة..
بعد تزيلي القناع تغسلي وشك بموية باردة وتونر ومرطب وتستمتعي بالنتيجة من اول استخدام 😊
ينفع لجميع انواع البشرة..
ممكن تعمليهو مرة أو مرتين في الاسبوع..
#ماسك_الفواكه
مناسب لجميع البشرات دا كمان ..
قناع منعش بالفواكه اللي هم التفاح والبابايا
ماسك مغذي بمعني الكلمة وبالاستمرار عليهو بتلاحظي لونك فتح ومنور ..
مزيل للشوائب والخلايا الميتة ..بيشد البشرة وبينضف المسام ..
بالجد بيزيد نضارة البشرة..😊
مجموعة هملايا بتلقيها متوفرة في الصيدليات..
في السعودية سعر الماسك تقريبا 26 ريال
في السودان ما متذكرة سعرهم لأني جربتهم قبل ٣ سنين ورجعت ليهم تاني حاليا ..
#كسرة_بموية
ما سكات هملايا بالذات انا بسميها أقنعة التنظيف العميق
زي لما شعرك تتراكم فيهو الزيوت مثلا وتقرري تعملي ليهو تنظيف عميق سواء بشامبو قوي أو بيكربونات..
احلي حاجة في الماسكات دي غير فايدتها انو اسعارها في متناول اليد ومتوفرة..
تستاهل انك تجربيها لأنك بالجد محتاجة تهتمي ببشرتك بالذات لو دهنية.. وكل يوم بيمر عليك وانتي مهملة بشرتك ح تتراكم عليك الخلايا الميتة والشوائب والاوساخ والحبوب و ح يبقي صعب انك تتخلصي منها..
خلي شعارك دايما بشرة متألقة خالية من المشاكل
مهما عملتي من كريمات مفتحة ما ج تحسي بروعة بشرتك مالم تصقليها بماسكات غنية بالفايتمينات والمغذيات 😊
المرة الجاية ح نتطرق لغسولات نفس المجموعة والمناسب لكل بشرة..
منو الجربت اي نوع من الماسكات دي ؟؟!!
ورونا تجاربكم ❤
ودمتن متألقات 😊
تعليقات
إرسال تعليق