غسولات بايوديرما للبشرة الدهنية والمختلطة
#غسولات_بايوديرما
اليوم ح اتكلم عن تجربتي مع منتجات #بايوديرما الفرنسية ..من الماركات العاجباني من زمان شديد وكنت خايفة اجربها في البداية وما تنفع معاي وبالذات لانو سعرها غالي .. لكن بعد حضرت كم فيديو كدا لمدونات اجانب وعربيات الصراحة يشيلو ويشكروا فيها فقررت اشتري مجموعة البشرة الدهنية ( علي العلم انو بشرتي كانت دهنية والان اصبحت مختلطة )
حاليا لي 6 شهور وانا بستخدمها .. ودا وقت كفاية جدا عشان اعرف احكم عليها واعرض عليكم تجربتي معاها .. من وقتها انا بشرتي بطلت الحبوب والبثور ولله الحمد .. دا غير انو المجموعة كلها ليها براءة اختراع بسبب تركيبة ال ( fluidactiv ) والتركيبة دي بتمنع انسداد المسام دا غير انو بتزيد من سيولة الدهون وبالتالي ح تسهل اذابتها وكمان بتمنع الاكسدة ..وبيتحكموا في افراز الدهون المسببة لمشاكل البشرة الدهنية والمختلطة ..
ح اتكلم عن تجربتي مع الغسولات الاتنين في البوست دا
وهم نوعين طبعا .. #السيبيوم_المائي sebium H2O
يعني موية (غسول مائي)
عبارة عن ماء مخصص لتنظيف البشره من غير ما يجففها , كمان يتحكم و ينظم كمية افراز الدهون من البشرة
بيحتوي علي املاح الزنك والنحاس اللي بتعتبر قاتلة للبكتريا.. بيستخدم كغسول منظف وتونر كمان .
خالي من البارابين واهم شئ خالي من الكحول
لطيف علي البشرة وما بتحسي باي حرقان او كدا علي عكس المنظف والتونر بتاع مجموعة كلينيك ..(كان كتبت عنها قبل كدا هنا)
وطبعا ما بحتاج لاي شطف او انك تغسلي وشك بالموية بعد استخدامو دا لانو تركيبتو مائية
يعني عادي لو ماشة اي حتة وشايلاهو في شنطتك وقررتي تغسلي وشك ما عليكي الا تبلي القطنة بتاعتك وتمسحي علي وشك ..
كويس جدا للناس الكسلانة تقوم تغسل وشها
مناسب للبشرة الدهنية والمختلطة
كمان ينفع كمزيل للمكياج لكن للعيون ما بنصح بيهو ..انا شخصيا بحرقني في عيوني يمكن لانو عطري شوية ..لكن في واحد تاني غير عطري للبشرة الحساسة ومزيل قوي للمكياج من بايوديرما برضو لونو بينك ودا بالجد رهيييب حتي للعيون والمكياج المقاوم للماء ( ح نجيهو تاني في بوست منفصل )
تقريبا بيجي 3 عبوات
صغيرو ووسط وكبيرة
250 مل و 500 مل و 50 مل
#الغسول_الجل gel moussant
الغسول دا انا بحبو جدا
بحسسني بالنضافة والانتعاااش .. قوامو خفيف خالص وعلي عكس المنظف المائي دا بتشطفيهو بالموية
من اكتر الغسولات اللي ناسبتني
خالي من الصابون والبرابين وابدا ما بيجفف البشرة وكمان بيساعد علي تضييق المسام
مناسب للبشرة الدهنية والمختلطة برضو
وكمان بيستخدم كجل للحلاقة
بيجي عبوتين واحدة كبيرة والتانية وسط
200 مل و 500 مل
طيب ح #نستخدمهم كييف ؟!! يوضع الجل على البشره المبلله وتدلكي عادي زي اي غسول لمدة دقيقه وبعدها تغسلي وجهك بالماء بشكل جيد وبعدها تطبطبي على وشك بمنشفه مثلا ..المهم طبطبه فقط تكفي
وبعد ينشف بعمل اسكرب وبعد كدا بعمل الغسول المائي كتونر ونعنشة كدا وبخليهو ينشف
وفي البرد دا من الكسل مرات بس الغسول المائي بقطنة ببللها بيهو وخلاص
وبكدا بكون جهزت بشرتي لاي كريم عايزة اعم
تقييمي للمنتجين ديل انا بديهم 10 من 10 بناء علي تجربتي الشخصية
هل يستحقوا انك تشتريهم وبالغالي كمان ؟!
انا في رأيي يستاهلوا ونص
دا غير انهم بيقعدوا معاك فترة طويلة
العبوات الوسط انا بتقعد معاي اكتر من تلاتة شهور وبستخدمهم مرتين يوميا
طيب وييين يتلقوا واسعارهم كيف ؟!
بتلقيهم في الصيدليات واسعارهم من 100 ولفوق ما متذكرة كم بالضبط لاني اشتريتهم من 3 شهور
#نصيحة اخيرة
افضل انك تستخدمي مجموعة البايوديرما للبشرة الدهنية كاملة عشان نتيجة افضل
عندهم منتج للمسام وواحد للحماية والتخلص من البثور الصغيرة وبالذات الفي المسام والاتنين ديل افضل منتجين ما بيخلوا بشرتك تزيت او تظهر لامعة حتي بيسخدموهم كبرايمر وبيز للميكياج ( ح نتكلم عنهم في بوست منفصل ان شاء الله )
هي مجموعة عناية يعني بعد علاج الحبوب بالذات الملتهبة بتستخدمي المجموعة دي ولو واظبتي فيها ع الاقل 3 شهور تعالي اساليني لو جاتك حبوب تاني
العناية اهم من العلاج لانها باعتبارها وقاية
تحياتي 😊❤
تعليقات
إرسال تعليق