سيبيوم بور ريفاينر من بايوديرما
وداعا للمسام الواسعة ولمعان البشرة الدهنية والمختلطة
في البوست الفات اتكلمنا عن السيبيوم جلوبال لعلاج البثور وتنظيم افرازات الدهون ,, والليلة ح نتكلم عن مشكلة المسامات الواسعة بالنسبة للبشرة الدهنية وعن المنتج البيتعامل مخصووص مع المشكلة دي من بايوديرما لتضييق المسام اسمو :
#سيبيوم بور ريفاينر sebium pore refiner
المسامات الواسعة من اكتر المشاكل البتواجه البشرة الدهنية وبتسبب لينا ضيق واحراج لانو بيكون شكلها مزعج زي كانها علامات علي بشرتك ومهما حاولنا نخفيها بمكياج مابنقدر وبيكون منظرها ييييع
بالاضافة لمشكلة لمعان البشرة ...
المسامات بتظهر اكتر حاجة في منطقة الانف واعلي الخدين بشكل واضح وديل اكتر منطقتين بيكون افراز الدهون فيهم اكتر
طيب تعالوا نعرف كييف اصلا بتتوسع المسامات دي ؟؟!!
في البشرة الدهنية والمختلطة مع كترة افراز الدهون وتجمعها كنتيجة طبيعية ح يكون في ضغط من كتلة معينة مثلا علي البشرة وبالتالي من الطبيعي انو البشرة تستجيب للحاجة دي بانو تتمدد او يحصل ليها استرتش يعني ح تتمطي بالدارجي كدا.. وبالتالي سطح المسام ح يبدأ يوسع وح يبقي صعب جدا انها ترجع زي اول .. ومن اهم اسباب اللي بتؤدي لظهور مسام واسعة :
اهم عامل هو زيادة افراز الدهون اكيد ودا عند اصحاب البشرة الدهنية
عندك تاني التدخين والتوتر العصبي والعوامل البيئية زي شمس السودان الحارة مثلا او اي ملوثات
وممكن تكون عوامل وراثية و المسامات بتزيد مع تقدم العمر ومع نقص الكولاجين في البشرة .. يلا خلونا في المهم
طيب عايزين نعرف كيف ممكن المنتج دا(sebium pore refiner )ح يعالج لينا مشكلة المسام الواسعة دي وبأي الية مثلا ؟!!
اول شئ المنتج بيحتوي علي مادتين رئيسيتين
اولا مادة اسمها ال fluid active complex ودي المادة اللي ماخدة عليها الشركة دي براءة اختراع
ومهمتها انها بتذوب الدهون البتطلع علي بشرتك وبالتالي الدهون بدل ماتتصلب وتتجمع في المسام ح تكون بقت ساااايلة وبكدا بنكون خففنا الضغط علي المسام بسبب الدهون المتراكمة وما ح تتوسع تاني وكمان ما ح تشوفي لمعة علي بشرتك ,,,
المادة التانية عبارة عن stringents يعني مواد قابضة للبشرة وللمسام ودي اللي بتعمل علي تضييق او شد المسام و تبدأ ترجعوا لطبيعتو ..
الكريم دا حجمو 30 مل وكمية بسيطة منو بتكفي لوشك وبيقعد معاكي فترة طويلة .. انا بيقعد معاي اكتر من شهر ( يمكن لأنو وشي صغير هههه)
سعرو برضو مية وكسر ما متذكرة بالضبط كم..
تحياتي 😊❤
تعليقات
إرسال تعليق