#عروكة_الحلو مر
في اي روتين عناية دايما خلي في بالك موضوع العروكة دا ..
يلا اتنفضوا وبطلوا كسل يا جماعة 🤗
وكلنا عارفين أهمية العروكة للبشرة من حيث التقشير والنضارة والاستفادة من المواد الطبيعية الفيها..
وبما انو رمضان غني بالحلو مر او الآبري فما تضيعي الفرصة دي واستفيدي من التفل حقو 😁
وبالتالي نكون استفدنا من خلاصة الذرة المخمرة..
والطريقة تكاد تكون معروفة للجميع مع بعض الاضافات من حاجات عندك في البيت وبالتالي تكون الفايدة أكبر ..
#المكونات :
تفل الحلو مر بعد تصفيهو (قدر طرقة تقريبا )
3 ملاعق أرز مسحون
3 ملاعق عدس مسحون
3 ملاعق كركم
3 ملاعق سكر
ملعقة بيكربونات
ليمونة
كل المكونات دي اختيارية طبعا ..المهم الحاجة المتوفرة عندك ..
#الطريقة :
تصفي الآبري كويس ويكون مبلول من بدري تحاشيا لأي باقي بهارات ..
تختيهو في الخلاطة مع حبة موية قدر تخلط ليك..
القوام ما يكون تقيل شديد ولا موية كمان ..
تختي الخليط دا في حلة وعلي نار هادئة وتسوطي عشان ما يتكتل ليك ..
وأثناء التحريك دا ضيفي كل المكونات دي وحركي لغاية تنجض وتصلي للقوام التقيل 😊
خليها تبرد واحفظيها في التلاجة عشان ما تعفن او تخمر ليك ...كل ما تكوني عايزة تتعركي شيلي منها جزء بسيط قدر يكفيك واخلطيهو مع حبة زبادي واتعركي.. وح تشوفي النورة والنضارة براك ..
كمية السكر حاولي اتحكمي فيها وما تكتربها عشان ما تتلصق فيك بعدين ..
كل ما كان السكر كتير في اي عروكة ح يكون صعب انها تطلع ليك وح تفضلي تفركي لغاية زيتك يطلع وتسببي لنفسك قشرة وجفاف..وكدا كأنك يا ابو زيد ما غزيت 😁
#كسرة_ناشفة
اي عروكة او حتي سنفرة..دايما بنعتمد علي الفرك اهم شيء عشان نتخلص من الجلد الميت .. فلما تكون غنية بمواد ذات فائدة زي المكونات الفوق دي معناها دي عروكة ملكية والفائدة ح تكون مضاعفة اكيد..
دي من العروكات المفروض اي عروس تجهزها من هسة وتبداها بعد تخلص الدخان..
وانتن افتكر العيد قرررب والجيهة والنورة لازمااكن 😊
ودمتن نايرات يا بنات 😊
تفل الحلو مر مافهمت ايش هذا زيت او ايش بالضبط
ردحذفالحلومر او الابري عبارة عن مشروب سوداني بتعمل في رمضان بشبة الفطيرة في شكلة بس فيه كميه من البهارات...بتبل في موية وبعدين يتصفي البفضل بعد ما يتصفي دا هو تفل الحلومر
حذفالسلام عليكم اختي حاب اعرف منك هلا مدونتك دي فيها نسبه زياره عاليه ولا لا
ردحذفاعجبني
ردحذف