#فاونديشن_تروماتش_من_لوريال #True_match_foundation
ازيكن يا بنات وبالجد مشتاقين طالت الغيبة كالعادة 🤗
رمضان كريم وكل سنة وانتن طيبات 😊
عايزة أسألكم.. هو الوقت في رمضان دا ضيق ولا انا براي مضيعاهو في سواطة العصيدة ؟!
دا اول رمضان لي في بيتي ومتازمة الصراحة من العصيدة هههه
ماعلينا .. نخش في الموضوع طوالي
الريفيو الليلة عن فاونديشن تروماتش من لوريال
مع اني علاقتي بالمكياج ليست بوطيدة وقل ما تعجبني حاجة خصوصا كريمات الأساس 😃 دايما لما بعملها بحس انو وشي وسخان وما ناشترال..
الفاونديشن دا جميل جدا جدا وبيديك احساس بالطبيعة
تقدروا تقولوا انو احلي كريم اساس مر علي حتي الآن من حيث التجربة ..
قوامو سائل لكن ما مائي .. سهل جدا في الدمج والفرد
ممكن بالبيوتي بلندر او بالفرشة او حتي ممكن بيدك
في كل الأحوال بيطلع شكلو جميل و بيرفكت وبيخلي الوش في منتهي الجمال ..
اقدر اقول انو تغطيتو من خفيفة لمتوسطة وكمان قابل للبناء من غير ما يتكتل او يبقع يعني ممكن تعملي كم طبقة إذا عايزة تغطية اتقل..
ابدا ما بيأذي البشرة ..انا كان لي فترة يمكن 3 أسابيع بستخدمو يوميا وبشرتي الحمد لله زي ماهي 😊
درجاتو متنوعة جدا وفيها للأندرتون الدافئ والبارد والمتعادل..
يعني سهل جدا تلاقي الدرجة المناسبة للونك وللاندرتون كمان ❤
حجمو صغير جدا ما تغركم الصورة 😅 ممكن تاخديهو معاك اي مكان وبقعد معاك فترة ما هينة ..
العيب الوحيد يمكن يكون في التعليب بتاعو بما انو ما فيهو دواسة تتحكم ليك في الكمية البتاخديها..
صناعتو أمريكية USA ويقال انو ينفع لكل البشرات وبالذات الدهنية والمختلطة..
انا بشرتي مختلطة وحلو جدا معاي..
البشرة الجافة لازم ترطبي وشك اول حتي بعد كدا اعمليهو..
البشرة الدهنية الخفيفة اعتقد انو ممكن يناسبك
انا اذا بشرتك دهنية شديد ما انصحك بيهو 😊
ممكن تستخدميهو بالنهار للطلعات والزيارات وللشغل كمان مع تغطية خفيفة ظريف شديد ..
وإذا حابة تغطية تقيلة للمناسبات الليلية دبليهو عادي..وحلو جدا في التصوير( صديق الكاميرا 😉 )
مهما قعد في وشك لونو ابدا ما بتغير ولا بيتأكسد
من مميزاتو انو فيهو واقي شمس SPF 17
بيقعد علي البشرة اكتر من 6 ساعات حتي بدون برايمر ..
بتحسي بشرتك نضرة مع لمعة صحية كدا ..
وما يسبب اي تهيج للي بشراتهم حساسه لانو خفيف وتتنفس البشره منو..
سهل جدا إزالتو بأي مزيل مكياج.. يعني ما من النوع البترسب في المسامات..
#مكوناتو :
لا يحتوي على الزيوت والعطور، او المواد اللي تؤدي انسداد المسام، علشان كدا هو جميل، ويعطي لوك مشع وصحي وجميل وكأن البشره مصقوله ، والتوزيع فيه متساوي.. وكمان من محتوياته الفيتامينات A و C، و جنين القمح ومن الفواكه مستخرج العنب بيحافظ على بشرتك متغذية ومحمية وصحية اكيد 😊
الفاونديشن دا جاني هدية في صمة خشمي لكن بيتلقي في محل كلينيك او عند تاجرات الفيس .. المهم ركزوا على الأمريكي بالذات ..
#ملحوظة
لتحديد الدرجة المناسبة لبشرتك، لازم تعرفي الأندرتون (undertone) يعني شنو اندرتون ؟!!!
يعني درجة اللون اللي بتكون تحت البشرة وبتديها لون مميز ..
البشرات بتنقسم لتلاتة أنواع :
- دافئة Warm.
- باردة Cool.
- طبيعية أو محايدة Neutral.
من اهم الطرق لتحديد الأندرتون هو بالنظر إلى لون عروق الدم في اليد تحت الشمس عشان تكون واضحة .. شوفوا الصورة في أول تعليق ..
لو كان لون العروق بيميل للون الأزرق أو البنفسجي هنا البشرة تعتبر باردة Cool
وبالتالي ح تختاري درجات الألوان اللي بتبدأ بحرف C.
لو كان لون العروق يميل إلى اللون الأصفر أو الأخضر هنا البشرة تعتبر دافئة Warm،
وبالتالي ح تختاري درجات الألوان اللي بتبدأ بحرف W.
إذا كان لون العروق خليط بين درجات الأزرق ودرجات الأصفر فأن البشرة تعتبر طبيعية (محايدة) Neutral، وبالتالي ح تختارب درجات الألوان التي تبدأ بحرف N
#كسرة_بموية
اعرفي انو سر جمال المكياج هو جمال بشرتك بالأول
اعتني بيها وما تهمليها..
ودمتن سمحات ونايرات 😊
تعليقات
إرسال تعليق