#طريقتي_في_تكثيف_الحواجب

من الحاجات الي كتير ناس بتسأل منها طوالي هي مشكلة الحواجب الخفيفة وكيف تخليها تبان كثيفة نوعا ما
الطريقة دي ابدا ما كنت مخططة ليها او حتي فكرت فيها إنما بالصدفة بس لاحظت ليها من خلال تجربتي للديرمارولر للوجه.. ( راجعي بوست الديرمارولر )..
وأثناء تمريرها بلقي نفسي عملت حواجبي معاي 😅
بعد فترة لاحظت انهم ما زي اول وأصبحوا أكثر كثافة
وانا اقوول ياربي السبب شنوو ههه
المهم كررت التجربة مرتين تاني وقصدت امرر الديرمارولر للحواجب من الاتجاهين علي مرتين بس وبعد اخلص بعمل ليهم زيت خروع وفايتمين E ..
تفرغي جزء من زيت الخروع في علبة صغيرة وكبسولة فايتمين E واخلطيهم مع بعض وبفرشة صغيرة تعالي امسحي علي حواجبك بعد جلسة الديرمارولر مباشرة وياحبذا تكون بالليل لغاية الصباح..
الديرمارولر اعمليها مرة او مرتين بالاسبوع..اما زيت الخروع وفايتمين E اعمليهم يوميا لمدة شهر .. بعد كدا ممكن تعمليهو مرتين في الاسبوع كفاية ..
ح تلاحظي للنتيجة من 10 يوم بالكتير 😊
كذلك الرموش اكتفي بالخليط دا مع الفرشة بتاعة الماسكرا
وطبعا اكيد ما ح تعملي لرموشك ديرمارولر هههه
زيت الخروع غني ببعض البروتينات والفيتامينات والاحماض الدهنية وبيعزز من نمو الشعر
وكذلك فايتمين E ..

#ملاحظات
ما تحاولي تمرري الديرما رولر لمنطقة العين بس ركزي علي عضمة الحاجب ..
ابعدي من أقلام التخطيط البتمعط الحواجب زي القلم بتاع قولدن روز ..
حاولي دايما لما تجي تخططي حواجبك القلم ما يكون النوع الجاف داك وما تضغطي علي الشعرة بتاعة حواجبك شديد..
حلاقة الحاجب بالموس بتكثفو برضو بس منو اللي ح يحلقو 😅
زيت جوز الهند غني بالبروتينات وحلو جدا للتكثيف ممكن برضو تعمليهو..
عصير البصل والتوم من الحاجات البتكثف الشعر طبعا بس مشكلتهم ريحتهم 😷
زيت الخروع الإنجليزي دا بيتلقي في اي صيدلية
والديرمارولر من محلات كلينيك والايام دي عاملين تخفيضات وحتي لو مخلصة بيطلبوها ليك عادي
او ممكن من تاجرات الفيس البجيبو بضاعة من برة 😊

ودمتن سمحات 😊