جهاز الديرمارولر للوجه
مساء الخير عليكن بنات 😊
بما انو أمس اتكلمنا عن المواضيع اللي ح تتطرح تاني في الأيام الجاية واي واحدة طرحت موضوع أو مشكلة معينة سواء بتخصها او لا ..
فكان معظمكم عايز حل للمسامات الواسعة
والبوست دا معظم الحل فيهو ومتمثل في الديرمارولر 😊
الديرمارولر وما ادراك مالديرمارولر
نحن يوميا بنفقد قدر من الكولاجين عشان كدا بالمقابل بتزيد مشاكلنا سواء للبشرة او الشعر من تساقط وشحوب للبشرة و مسامات وحب الشباب واثارو والندوب والبقع والتصبغات والسيلوليت..
لكن مع الديرمارولر تقريبا كل المشاكل دي اتحلت بنسبة كبيرة جدا وبشكل ملحوظ..
لأي واحدة عندها مشاكل في بشرتها ومالاقية ليها حل نااجع كدا يريح بالها نوعا ما ..
الجهاز دا الناس قاموا فيهو فترة وعامل ضجة ورجغ ورجغ ورجغ..لكن هل فعلا بيستحق الضجة دي ؟!!
هل بيستحق نتحمل ألم الإبر دا كلو والطعين وكمان في بشرة الوش والجضوم والعجب الجبهة ههههه ؟!!
كلكم بتسألوا نفس الأسئلة دي وانا كمان كنت بسأل نفسي قبل أقرر اجيبها ..وبعد مباحثات واستخارات وكدا جبتها وجربتها زي 4 مرات خلال شهر ونص وفعلا هناك فرق 😁
خلونا نتعرف علي الجهاز دا وبعد كدا اوريكم تجربتي ورأيي فيها..
الديرمارولر عبارة عن جهاز بيستخدم لنضارة البشرة وبرضو حل لبعض مشاكل البشرة او انا كمان بعتبر انو بتحل معظمها مش بعضها .. بيسموه
( collagen induction therapy )
يعني شغلها كلو علي الكولاجين..
وهي عبارة عن يد فيها زي بكرة صغيرة كدا مزودة بإبر صغنونة خالص لدرجة قياسها بالملمتر وبتعمل علي تحفيز الكولاجين والايلاستين في البشرة ..
الكولاجين ذكرنا اهميتو قبل كدا كبروتين او كمكون أساسي لأنسجة الجلد والايلاستين بيعمل علي تجديد الخلايا خصوصا اللي اتعرضت للتمدد بسبب الحمل او السمنة..
(راجعوا بوست الأكرتين )
كيف بتعمل الديرمارولر ؟!!
انتي بس بتمرريها علي البشرة في كذا اتجاه افقيا ورأسيا وبكم زاوية وهنا انا بفضل انك قبل تستخدميها احضري ليك فيديو طاارب كدا لأي يوتيوبر ح تفهمي اكتر وح يكون أوضح من الشرح بالكتابة هنا ..
كل البتعملو الديرمارولر انها بتعمل ثقوب في البشرة بتاعتك
الثقوب دي بدورها بتحسن إنتاج الكولاجين والايلاستين
يعني زي كأنك بتجرحي نفسك وانو في مشكلة حاصلة وبالتالي ح تنبهي انو الكولاجين يمشي للسطح ودي هي الآلية البتحفز إنتاج الكولاجين طبعا ..
غالبا الديرمارولر بتحتوي علي 540 إبرة
كيف اختار المقاس المناسب لي ؟!
ليها عدة مقاسات علي حسب المكان اللي ح تستخدميهو ليها
وبتبدأ ب ( 0.25 0.5 0.75 1 1.5 2 3 )
طبعا مقاس 0.25 غالبا للمنطقة تحت العين
ومن 0.5 لغاية مقاس 1.5 ديل للوجه
أما الباقيات للجسم
بالنسبة للوش دايما بنحاول نبدأ بالمقاس الاقل 0.5 ونتدرج فيهو شوية شوية لغاية نقدر نتحمل مقاس 1.5
#الخطوات
تكوني مجهزة مخدر موضعي سواء مسح او بخاخ عشان تعمليهو في وشك قبل نص ساعة من الجلسة بس تتفادي بيهو الألم ودا لمقاس 1 ملم او 1.5 ملم أما مقاس 0.5 ما بتحتاجي لأي مخدر موضعي..
عشان تزيدي امتصاص المخدر الصقي في وشك كيس نايلون زي كيس خشم البقرة بتاع الكرعين داك هههه
او اي كيس المهم عشان نسرع مفعول المخدر..8
برضو يكون عندك كحول للتعقيم يا اما بخاخ ترشي منو علي الجهاز أو تغمسي فيهو الديرما رولر نفسها لمدة ربع ساعة حتي تستخدميها ..
تكوني مغسلة وشك كويس جدا وخالي من اي مكياج بالتأكيد.. وكمان تكوني مغسلة يديك كويس لأنو مرات بتحاولي تشدي بعض الحتات عشان الديرمارولر توصلها ..
من الأفضل تكوني ماسحة وشك بكريم مرطب او حتي ممكن سيروم قبل تطبقي الديرمارولر.. كدا كأنك بتطبقيها علي بشرة رطبة أفضل من جافة طبعا 😊
بعد كدا تعالي أبدي الجلسة الخطيرة 😂
مرري الديرمارولر بضغطة عادية من يدك علي الوش بطريقة عمودية وافقية بحيث انك تكوني وصلتي الإبر لكل بشرة الوش ..
او طريقة تانية اسمها طريقة النجمة افقيا وعموديا وتاني بالجمبتين كدا .. يلا الافضل انك تحضري طريقة الاستخدام دي من فيديو علي اليوتيوب عدييل عشان الفهم يقع ليك
شغل الوصيف سااي دا ما بنفع 😅
لازم تشوفي بعينك أفضل طبعا
الجلسة تقريبا بتاخد من 20 دقيقة لي 30 دقيقة حسب الجرسة 😃
لكن بالتكرار ح تلقي نفسك اتعودتي علي الألم
طبعا الألم اكتر بيكون في الجبهة بالذات عشان مافيها لحم عاد 😅
بعد تخلصي غمسي الديرما رولر في الكحول لمدة 10 دقايق او ربع ساعة او رشيها بس اذا كحولك في شكل بخاخ وخليها تنشف ..بعد كدا ختيها في العلبة بتاعتها ..المهم تكون مغطية
#أهم_سؤال
ماذا أضع علي وجهي بعد الانتهاء من جلسة الديرمارولر ؟!
الخيارات كتيرة ممكن تكون بالنسبة ليك ..المهم انك تبعدي من الكريمات الحارة والمهيجة نوعا ما ..
في اللحظة دي اصلا المسامات بتكون مفتوحة والبشرة مستعدة لامتصاص أكبر قدر من فوائد الكريم او السيروم اللي ح تطبقيهو..
عندك سيروم الهياليورونيك اسيد دا افضل خيار إذا كان متوفر عندك
اذا ما متوفر ممكن سيروم فايتمين سي بس بفضل تركيز أقل من 20% عشان ما يهيج ليك وشك .. ما كل الناس بيتقبلوا التركيز دا ..
أو ممكن تستخدمي الجل بتاع فايتمين سي بتاع فير اند وايت ظريف شديد وبحسسك كأنك عاملة برتكانة في وشك 😍
فايتمين سي معروف انو محفز للكولاجين وبيشتغل علي النضارة والتفتيح والتجاعيد ..
لو ديل كلهم ما متوفرين عندك ممكن اي ماسك بتاع زبادي ولبن مثلا او اي كريم مرطب عندك عشان تستفيدي من خاصية الترطيب لوشك..
او ممكن تعملي فايتمين E بالذات الكبسولة لأنو قوامها اخف كتيير من الزيت وح تلاقي نتايج حلوة شديد ..
دي كلها خيارات ليك إذا ما اتوفرت عندك مستحضرات معينة المهم انك تستغلي شغف البشرة في الوقت دا لامتصاص أكبر فائدة 😊
يعني حسب المشكلة الانتي بتعاني منها بتحددي انك تمسحي شنو بعد الجلسة..
#ملاحظات_ونصائح
ما تستخدمي الديرمارولر لو عندك اي مشاكل أو أمراض جلدية او اذا وشك فيهو حبوب او النخل وحبات الخال او طابع الحسن والجروح المفتوحة كمان ..
ابعدي من الميك اب في نفس اليوم واليوم البعديهو خلي البشرة ترتاح عشان ما تخش ليها اي مواد ما ياها ..
فالافضل انك تعملي جلسة الديرمارولر في يوم الخميس مثلا عشان تكون تاني يوم مؤجزة ..
ابعدي من الشمس طبعا وإذا اضطريتي تطلعي فالافضل تعملي واقي للشمس..
يستحسن تكون الديرمارولر استخدام شخصي طبعا
ويستحسن انك توقفي اي تقشير للبشرة سواء كيميائي او بالكريم مثلا قبل استخدام الديرما رولر..
اثناء تمريرك للديرمارولر ماشرط إلا بشرتك تكب الدم يعني ما تضغطي علي نفسك لغاية روحك تطلع ههه
كل الحيحصل ح تلقي وشك محمر وشوية سخانة ووخز وأحيانا بعض نقاط دم فممكن تمسحي حبة كحول علي وشك تفاديا لأي التهاب وكدا .. ما تخافي دا كلو ح يروح في اليوم التاني ..
ما تتوقعي كل مشاكلك تنتهي من اول وتاني جلسة لأنو الكولاجين بياخد وقت عشان يتحفز ويتنشط لكن برضو بتلاحظي نتايج مرضية حتي من اول جلسة بس تستمري عليها عشان ما كل مرة تبدي من الأول..
ودا بيعتمد علي تغذيتك وبرنامج عنايتك ببشرتك عموما ..
الفرق بين الجلسة والتانية بتعتمد علي مقاس الديرمارولر
مثلا مقاس 0.5 ممكن في الاسبوع مرتين أو كل اسبوع
مقاس 1 ملم كل اسبوع او كل 10 يوم أفضل
أما مقاس 1.5 ملم انا بفضل تكون كل اسبوعين
دا كلو عشان نتيح للبشرة فرصة لتنشيط الكولاجين..
ديل مقاسات الوش
الجسم ح نجيهو في بوست منفصل للسيلوليت والتمدد 😊
مقاس 1 ملم ومقاس 1.5 ملم ديل اكتر مقاسين ممكن تلاحظي نتائج حلوة معاهم مقارنة بمقاس 0.5 طبعا ..
ابعدي من منطقة العينين كمان ( الحتة دي عندها مقاس معين طبعا فما ينفع تمرري اي مقاس )
ممكن عادي تطبقي الديرمارولر علي شفايفك بالمناسبة وبالمواظبة ح تديك احساس الامتلاء للشفايف ..😉
بعد يومين ممكن تستخدمي كريمك اليومي وروتينك عادي جدا حتي لو كان فيهم اكرتين وديفرين او ريتينول..
شنو هي فائدة الديرمارولر ؟!!
_نضارة الوجه بشكل عام
_تعمل علي تضييق المسام الواسعة بشكل ملحوظ جدا
_بتعالج الندب السطحية واثار حب الشباب (شوفوا الصور في التعليقات تحت )
_بتحفز نمو الشعر وبتعالج مشكلة التساقط( دا ح نجيهو في بوست منفصل )
_بتقلل علامات تمدد الجلد والسيلوليت
_بتقلل التصبغات بشكل كبير جدا بما فيهم الكلف
عشان كدا بنصح اي واحدة عايزة تعالج اي تصبغات يكون عندها الجهاز دا بيساعدك كتير..
مع الاستمرار ح تقضي علي كل المشاكل دي 😊
#افضل_نوع_للديرمارولر
تقريبا كل الإبر يا ما مصنوعة من التيتانيوم او استينليس استيل والاتنين مافيهم كلام
انا جربت نوع واحد بس اللي هو في الصورة وصناعتو كندية وظريف خالص عشان كدا مابقدر افيدكم في الحتة دي كتير..
شوفوا الناس التانية جربت اي نوع وفيدوا بعضكم واكتبوا ملاحظاتكم 😊
#تجربتي_ورأيي
كل الحاجات الفوق دي تقريبا طبقتها وانا بديت طبعا بمقاس 1 ملم وبستخدموا من دون مخدر..جعلية مش كدا هههه
من اول جلسة شفت نتيجة سمحة شديد من حيث النضارة وبالذات المسامات..
وكل ما تستمري بتشوفي نتايج احلي..
كنت بعاني من شوية تصبغات جمب العيون(بالجمبة كدا ) وحاليا اختفت نهااائي والحمد لله..
المسامات ما شة كويس خالص وفرق كبييير من اول..
الصراحة الجهاز يستاهل انك تشتريهو مهما كان سعرو مع انو بشوف سعرو زهيد بالنسبة لمفعولو السحري..
تقييمي ليهو 9 من 10 .. الواحد دا نقول للألم بس ههه
#مكان_تواجدها
في السودان بيجيبوها التاجرات من برة غالبا اسألوا منها في القروبات
في السعودية ممكن تطلبيها اون لاين من أمازون او سوق دوت كوم وفي صيدليات بوتس ووايتس والنهدي 😊
#كسرة_بموية
ناس المسامات ركزوا علي الديرمارولر عليكم الله ..
الليلة طولت عليكم بس الموضوع حالتو مختصر شديد
المرة الجاية ح نشوف مفعولها للجسم والشعر
ودمتن سمحات ومليانات كولاجين 😊
تعليقات
إرسال تعليق