زيادة قوة ترطيب اللوشن

الموية بتعتبر عصب الحياة وهي أفضل مرطب داخلي..وعشان نحافظ علي بشرتنا مرطبة من جوة وبرة..يعني شراب الموية واستخدام مستحضرات الترطيب عموما بتعادل بعض ومافي غني عنهم الاتنين .. ولو ما رطبتي نفسك من جوة بشراب الموية الكتيرة ما ح تحسي بفرق كبير حتي لو اتمسحتي ببرميل فازلين..😉
اللوشن عموما ترطيبو أقل من الزيوت والكريمات لانو مركب من قاعدة مائية لكن ح نظل نحب اللوشنات وقوامها لأنو البشرة بتمتصو اسرع بالذات للناس المابحبو الملمس الدهني للبشرة..وبرضو في ناس بحبو الحاجة التقيلة وترطيبها عالي ويكون أثرها واضح علي البشرة ..
عندي اختي لو ما اتمسحت بالفازلين ما بتحس نفسها اتمسحت كلو كلو حتي في الصيف بالرغم من عيوبو وسواد عيونو😂😂
المهم انتي كمان ممكن تزيدي من قوة ترطيب اللوشن بتاعك بإضافة زيوت غنية بمواد الترطيب زي زيت فايتمين E مثلا ..لأنو الزيت دا بالذات تقيل ومحتاج يتخفف عشان يكون سلس في المد علي البشرة وغير كدا فايتمين E معروف انو ترطيبو عالي جدا جدا.. او ممكن تضيفي نقاط من اي زيت ترتاحي ليهو .. عندك زيت اللوز الحلو او المر او زيت جوز الهند مثلا ..

في طريقة تانية ممكن تتبعيها هي انك بعد الحمام قبل تنشفي كويس تتمسحي بأي زيت زي زيت بايو اويل وهو زيت خفيف وبيتشربو الجسم سريع جدا او اذا عايزة حاجة اتقل شوية عندك الجل بتاع جونسون ودا رهيييب في الترطيب..وتستني انو بشرتك تمتص الزيت حتي بعد كدا تجي تتمسحي باللون كترطيب ثانوي مش أساسي وبالخطوتين ديل بتكوني زدتي من قوة ترطيب اللوشن بتاعك..

#تنويه
دايما حاولي رطبي جسمك وانت جوة الحمام لما تكوني مبلولة شوية كدا .. لأنو كمية الزيت الفي الكريم واللوشن او الزيت نفسو بيحبس ليك الرطوبة لفترة أطول وبكدا ح تستفيدي أكتر من اي منتج تتمسحي بيهو..
ناس البشرة الجافة محتاجين للحاجة دي شديد او للبنات البعملو كريمات تفتيح فيها كمية كورتيزون وبيحسوا بجفاف نوعا ما..

#ملحوظة
* زيت فايتمين E من مضادات الأكسدة القوية وبالتالي اقوي محارب للشيخوخة المبكرة وبيمنع التشقق والجفاف للبشرة والاظافر كمان وبيحمي من الشمس..
* مرطب عالي للجلد الجاف وبلين الجلد وبيقضي علي الخشونة..
* بيساعد علي التخلص من الخطوط البيضاء واي علامات تمدد في الجلد بأنك تدلكي يوميا لمدة دقيقتين في مكان التمدد والخطوط..
* بيقوي الاضافر وبيرطبها وبيرطبها الشفايف كمان..
الزيت دا بيعتبر معالج لمشاكل الجلد زي الاكزيما مثلا والحروق والتقرحات والجلد شديد الجفاف..
* لو عايزة تزيدي من فائدة اي منتج عندك سواء كان ماسك او  اي خلطة أو كريم او لوشن او حتي الشور جل البتستحمي بيهو ممكن تضيفي الكمية البتناسبك من الزيت دا ...
* البديل لزيت فايتمين E  هي نفسها الكبسولات المهم المتوفر عندك..

#كسرة_بموية
من اللوشنات الحلوة وترطيبها حلو شديد هي بتاعة فازلين وبالذات اللي بزبدة الكاكاو وموحد اللون..🤗

ودمتن سمحات ومرطبات ومنديات 😊