تجربتي مع مديكيتيد كريم واكرتين في تفتيح البشرة وعلاج التصبغات الجلدية

#تفتيح_البشرة_وعلاج_التصبغات_الجلدية
(#الكلف_النمش_آثار_حب_الشباب )
 #تجربتي_مع_كلير_اسينس_ميديكيتيد_كريم + #كريم_اكرتين

من اغلب المشاكل البتواجه البشرة هي التصبغات الجلدية وعدم توحد اللون عموما سواء كان للجسم او للوش وتقريبا كلنا او معظمنا بيعاني من المشكلات دي يا ما نتيجة للتعرض للشمس بدون استخدام واقي منها او يكون كلف سببو الحمل ودا قد يكون مؤقت بينتهي بانتهاء فترة الحمل او يكون دائم ويبقي اكبر مشكلة في حياتك ما بتتعالج ابدا بسهولة ..او تكون اثار لحب الشباب مثلا او نتيحة اكزيما او التهابات جلدية ..
البوست دا وانا بكتب فيهو ماعرفت اسميهو شنو لأنو بيتكلم عن التفتيح من عدة محاور ..التفتيح كعلاج او كتفتيح تجميلي من اجل التفتيح نفسو ..
هنا ح اركز علي التصبغات البتصيب الوش بالتحديد واعتقد انو دا محور اهتمامنا المشترك .. الواجهة وكدا 😅
التفتيح اصبح هوس بالنسبة لينا ولا حظوا انا قلت لينا يعني انا زاتي معاكم عشان ما تقولوا انا بتهمكم زور 😂😂
لأنو التفتيح والفسخ والجلخ بقدر ماهو بقي مرغوب بقدر ما بقي زي وصمة العار ..اي والله في ناس شايفنو كدا
عندنا مرة جيرانا قدر ما يقعدن حريم الحلة معاها يحكن ويقطعن ويجيبن سيرة بت فلانة بقت سمحة ما شاء الله مابتقدري تعايني ليها مرتين تنط مرة جيراننا خانقاها العبرة رافعة اصبعها السبابة بانفعال كدا وتقعد تبخس البت وتقول ليهن فااسخة جسمها كلوو ودا ما لونا والبت كانت خدراااا )
العجب لما يجيبوا سيرة بتها بتغالطك طبعا انها ما عملت كريم في حياتها ودا لونها الطبيعي خلقة الله .. والله زول جايب خبرها ماف..ولما نجي نسألها لونك فتح بشنو تحلف انها ما عملت ولاشئ ..ديل ناس موية الوضوء طبعا ههههه
وانتو ماشفتوها بتعمل شنو لبنات الحلة بتمشي لمرة جيرانا التانية وتقول ليها عايني بتك دي اتفسخت شديد شوفي كرعيها بقوا كيف زي الضب اتكلمي معاها والمرة تقع في بتها كلام فارغ ..عليكم الله شفتوا زي جنس الفتن دي ههههه دا يسموهو شنو هسة !!
المهم ماعلينا منهم واصلا مسألة التفتيح دي في النهاية خيار شخصي وكل حد حر في نفسو .. لكن اعتقد انو بقي في وعي حاصل في مسألة التفتيح دي والناس بقت عارفة هي بتعمل في شنو او هي عايزة شنو ...
خلونا نخش في الموضوع يلا عشان ما اقعد احكي ليكم شمارات الحلة كلها ..
الليلة بس ح استعرض معاكم تجربة شخصية مع كريم كدا كعلاج للتصبغات وللكلف وللاثار او بالاصح لي  اي اختلال في افراز صبغة الميلانين ودي طبعا زي ماعارفين الصبغة المسؤولة من اللون يتاعنا والبتعمل كحماية لينا من الاشعة الضارة والسرطانات والكلام الكتير دا ..

#كلير_اسينس_ميديكيتيد_فيد_كريم
Clear Essence Medicated Fade Cream
 الكريم دا احلي حاجة فيهو ريحتو طبعا .. دا غير المفعول :)
 مصنع في امريكا ومن اهم مكوناتو هي مادة #الهيدروكينون 2% و #فايتمين سي
الهيدروكينون الاغلبية بيعرفوهو هو مادة مفتحة وفيها كثير من اللغط والسخط وفيها محاذير كتيرة ودا بالتحديد في التراكيز الكبيرة وعلي المدي البعيد ..اما اذا استخدمت بتركيز اقل فما فيها مشكلة لكن برضو لفترات محددة ودا الكلام البتقولوا هيئة الغذاء والدواء ..
والتركيز المسموح بيهو هو 2% او اقل و دا التركيز الامن اللي ممكن تشتريهو  بدون وصفة طبية لكن اكتر من كدا الا للحالات المستعصية شوية وعن طريق اسستشارة طبيب ,,
الكريم دا ينفع لحالات الكلف الخفيفة للمتوسطة والنمش واي تصبغات جلدية بما فيها اثار حب الشباب كمان ..
مناسب جدا للبشرة العادية والجافة والدهنية ..اما البشرة الحساسة عموما في احتمالية انو تتحسس من الهيدروكينون عموما ..فلو بشرتك حساسة وعايزة تستخدمي الكريم دا الافضل تجربيهو علي جزء صغير من وشك كاختبار للحساسية ..
الحلو في الكريم دا انو بيحتوي علي واقي شمس كمان ..
وبيحتوي علي فايتمين سي اللي هو معروف انو مضاد للاكسدة وليهو دور كبير في تحفيو الكولاجين وتفتيح ونضارة البشرة ..
الهيدروكينون حتي الان هو اقوي وا سرع مادة لعلاج اي تصبغات سواء كلف او نمش او اثار او حتي تفتيح
لكن ما الوحيد ..في بدايل تانية للهيدروكينون وامنة جدا بس عايزة حبة صبر واستعمال لمدة اطول والعيب فيها انها ما كتير متوفرة عندنا في السودان .. ولو وجدت بتكون بتراكيز تافهة جدا وغير فعالة ,..

#تجربتي_ورأيي :
زمان ماخليت كريم ما جربتو ..
 الصراحة هو الكريم الوحيد اللي عالج لي المشاكل الفي وشي من اثار وتصبغات لكن ما استخدمتو لوحدو عملت معاه الاكرتين ومرة جربت معاه كريم احماض الفواكه من فير اند وايت عشان عامل التقشير عموما بيجدد الخلايا وبالتالي  بيسرع المفعول ..                                                                                                                                        
جربت قبليهو افالون بس ما كان لوحدو كان معاه الاكرتين برضو وكان ظابط شديد ..
بالرغم من انو الافالون والميديكيتيد الاتنين فيهم فايتمين سي وطبعا في كلام بيقول انو فايتمين سي بيقلل من مفعول الريتينويد  عموما (الاكرتين).. لكن بالعكس نتيجتو كانت كفاية وحلوة ومرضية جدا بالنسبة لي ..والحمد لله نفسياتي ارتاحت هههههه..
يعني عادي ممكن تستخدمو الاكرتين او الدفرين مع الكريم دا لأنو  فايتمين سي عشان يشتغل كويس بيحتاج ل بي اتش حمضي وكذلك الريتينويد عشان تشتغل محتاجة لوسط حمضي وزي ماعارفين انو الب اتش بتاعة الوش هي اقرب للحمضية يعني ابدا الوسط الحمضي سواء كان فايتمين سي (اسكوربيك لسيد) او احماض فواكه او غيرها ما بيقلل من مفعول الريتينويد ..
المهم في النهاية المفعول حلو شديد وبيوحد اللون ..
في البداية بستخدم معاهم مرطب بيبانثين او جل بانثو ايفا وهم الاتنين نفس الشئ بس عشان اخفف من اثر القشرة البيعملها الاكرتين في البداية لكن تاني ما بتحتاجيهو وكل ما احتجتيهو اعمليهو وحتي لناس البشرة الدهنية والمختلطة عادي جدا او ممكن اي مرطب عندك انتي بتعمليهو مناسب لبشرتك ...

#ملاحظات_ونصائح :
لنتيجة اسرع ممكن تستخدمو معاه احماض الفواكه بدل الاكرتين والافضل معاه مرطب زي البيبانثين مثلا عشان التقشير ..
عندك خيارين لاستعمال الاكرتين بالذات مع كريم ميديكيتيد ..يا اما تستعمليهم مع بعض الاتنين او تستخدميهم منفصلين عن بعض اي واحد في زمن براهو خلال اليوم وح يديك نفس النتيجة ..
واقي الشمس طبعا اهم حاجة مع اي كريم  تفتيح والا ح تكوني انتي بتنفخي في قربة مقدودة لانو الشمس ح ترجعك لنقطة البداية وزيادة كمان ..
لو فكرتي تخلي الكريم عادي ممكن تخليهو بدون اي تحسس ولكن الهيدروكينون عيبو انو لما تخليهو لونك بيرجع اغمق من اول وبيحتاج ع الاقل شهرين عشان يرجع لطبيعتو ..
#طريقة_الاستخدام
 بتستخدمي الخلطة دي يوميا لمدة اسبوعين بعد كدا ما بتحتاجي تعمليها يوميا ..يعني يوم بعد يوم او مرتين في الاسبوع عشان تحافظي علي درجة اللون والطريقة دي امنة جدا وافضل طبعا ..
الأفضل انك ما تلخبطيهم في علبة يعني نقطي من اي كريم علي وشك وامسحيهم مع بعض..

#بدايل_للهيدروكينون :
#الفا_الاربيوتين : زي كريم الفا بلس وريكسول وكريم سكن سكسيس الترا  للبشرة الحساسة (ودا ما اظن عندنا في السودان بس ما متأكدة ) ..وبرضو بيتباع علي شكل بدرة ممكن تركبي منها كريمك عادي للوش وللجسم لكن بنسب معينة عشان تقدري تستفيدي منها ..

#الكوجيك_اسيد : زي كريم كوجي سان واستلمانز الاخضر عيبو انو غير ثابت كيميائيا بالذات لو خلطيهو مع حاجات تانية او احماض ولو بتتذكروا زمان لما تخلطوا الاستلمانز مع كذا كريم بتلقوها بعد كم يوم لونها اتغير ..

النياسيناميد او فايتمين بي 3 زي لوشن فازلين موحد اللون للجسم وكريم اولاي توتال ايفيكيت ..#
الريتينويد : زي الاكرتين والدفرين بتعالج التصبغات والكلف  بس محتاجة صبر والافضل تستعمليها مضافة لمواد تفتيح تانية عشان تزيدي المفعول زي المواد الفوق دي مثلا  ..

#احماض_الفواكة (الالفا هيدروكسي اسيد ) : برضو بتخفف كتيير من اي تصبغات عن طريق تقشير البشرة وممكن برضو تضيفوها لأي مركبات تفتيح عشان نسرع ونزيد المفعول .. ناس فير اند وايت عندهم واحد حلو شديد وكمان مجموعة الليمون للجسم ..وبرضو كريم سكن سكسيس للبشرة العادية والدهنية ..

#كسرة_بموية
 ..مؤخرا ظهر مفعول الكركم كمشروب في علاج الكلف والتصبغات واثار حب الشباب بصورة مبالغة
#مشروب_الكركم_الطازج : المشروب دا سمح شديد والله وكمضاد للاكسدة كمان وبينفع للتخسيس ولبعض مشاكل المعدة دا غير تفتيح ونقاء ونضارة البشرة بطريقة عجيبة ..
بتشتري كركم طازج وتبشريهو وتشيلي منو زي 3 ملاغق وتنقعيهو في لتر موية لمدة 10 دقايق او ربع ساعة وتشربي كباية صباح ومساء لمدة شهر وتعالي شوفي النتيجة ..
وممكن تستخدميهو مع كريمك عادي بيعزز ليك المفعول ..

دا موضوع انا بعتبرو مختصر جدا وهو بداية بس لمواضيع اعمق في التفتيح مع بدرة الالفا اربيوتين والكوجيك اسيد والنياسيناميد ان شاء الله .. انا بحب اجرب لفترة كافية قبل اكتب عن اي موضوع ..
وزي ما بقول كل مرة ممكن البناسبني ما يناسبك والعكس لكن ..بالتجربة بتكتشفي شنو البناسبك ..
#طيب_بيتلقوا_وين ؟!!
الكريم انا اشتريتو من صيدلية في امدرمان شارع الوادي اسمها الراعي الصالح في حي الروضة وبيتلقي في محل كلينيك في بحري أو محلات فيسيس والأسعار متفاوتة من 150 جنيه ولفوق 😁
وممكن تطلبيهو اون لاين من أمازون
الاكرتين والبانثو إيفا بيتلقوا في اقرب صيدلية

ودمتن بجمال :)