#قناع_الموز_بديل_للبوتوكس

من أجمل وارخص الفواكه واعتقد متوفرة في اي بيت وفي اقرب لفة وعند اي فاكهاني..
ابدا ما كنت مصدقة انو حنك البوتوكس دا لايق علي الموز بالذات .. بس انا بحب اجرب بحب وإخلاص لغاية اجيب آخر اي شئ واقتنع في النهاية..وافيدكم بالتجربة اكيد 😊

الموز بيحتوي علي مضادات للبكتريا وبالتالي حلو جدا ومناسب للبشرة الدهنية بيحافظ ليك علي بشرتك من مشاكل الحبوب والبثور..
معظم المستخدمون لهذا الماسك أطلقوا عليهو بديل للبوتوكس علشان بيدي احساس بالامتلاء نوعا ما..
بتحسي كأنو في فراغات اتعبت بدون مبالغة وبتلاحظي للنتيجة دي بالذات من تالت ورابع استخدام للماسك بمعدل مرتين في الاسبوع..
اما بالنسبة للنضارة البيكسبها للبشرة فشهادتي مجروحة..
ح اخليكم للتجربة وخلوهو الماسك الأساسي بتاعكم وبالذات للعروسات ايام الحبسة..
بالجد الماسك دا عبارة عن توهج وحيوية تمشي علي رجلين 😂
كمان ترطيبو عميق جدا خاصة لأصحاب البشرة الجافة
المهم خلونا نشوف مكوناتو 😊

#المكونات :
نص موزة
ملعقة صغيرة عسل نحل
ملعقة صغيرة زبادي
نص كبسولة فايتمين E او نقطة من زيت فايتمين E (اختياري)

اساس الماسك دا الموز وباقي المكونات اختيارية..المهم المتوفر عندك وتقدري تستفيدي منو باي شكل ..

#الطريقة :
كسري الموزة بملعقة الشوكة واضيفي ليها باقي المكونات وممكن تخلطيهم ما مشكلة المهم الخليط يكون متجانس نوعا ما بالرغم من انو الموز لزج حبتين كدا ☺
عشان لزوجة الموز وخوف القناع ما يثبت ليك اعملي حركة المناديل..
امسحي الماسك علي وشك وياحبذا تكون طبقة تخينة عشان يقعد ليك أطول فترة ممكنة وتستفيدي منو ..
بعد تمدي الماسك لغاية رقبتك كمان تعالي لصقي المناديل علي وشك فوق لطاقة الماسك واستنيهو ينشف ..
بعد كدا طلعي الماسك برااحة واستمتعي بالمشهد 😉
غسلي وشك بموية باردة واستني نص ساعة علشان وشك يهدأ من اثر المناديل بس ..ح تحسي بالفرق في مظهر وملمس بشرتك  ..
بالاستمرار عليهو ح تخففي كتير من التجاعيد والخطوط الرفيعة ..
يعني كمان ما بين يوم وليلة تلقي نفسك منفخة زي هيفاء وهبي هههه
اذا فضل باقي من الماسك ما ترميهو
اعمليهو في شعرك طواالي ( دا ماسك الترطيب والنعومة كمان للشعر ) أن شاء الله ح نفصلو اكتر للشعر في بوستات جاية 😊
الموز هو وقشرتو حكااية ح نحكي كل شوية عنهم قصة 😍

العسل بيشد البشرة وبينقي المسام
الزبادي بيغذي البشرة وبرطبها وبيحمي البشرة كمان من البكتربا المسببة للحبوب لاحتوائه علي حمض اللاكتيك
فايتمين E مضاد للاكسدة اكيد وبيحمي من التجاعيد كذلك بتأثيرو علي الشوارد الحرة 😊

#كسرة_بموية
دايما وانتي بتفتشي عن النضارة والبشرة الصحية ما بتلقيها في كريمات التفتيح ولا الترطيب ولا الكولاجين ولا البروتين  ولا ولا ولا ....
صدقيني بتلقيها بس في الماسكات الطبيعية سواء كانت لوشك او جسمك او حتي شعرك ..ودا بإحتواءها علي كمية فايتمينات ومعادن ..
الماسكات دي ما تتخيلي مفعولها مع الاستمرار بيكون كيف !!
شفتوا صاحباتكم المفسوخات بفهم ديلك ..البتلقيهم ما شاء الله منورااات ولونهم موحد لامن يحيروك ديل هم ناس الماسكات والعروكات برضو .. 😅
لو عايزة تفتحي وشك بفهم مع كريمك بتاع التفتيح او خلطتك يبقي كتري من الماسكات دي علي قدر ما تقدري..
ما ننسي اهم حاجة شراب الموية 😊
وبما انو العيد قرب ونحن في رمضان وشراب الموية قليل فدا أكبر دافع لأنك تهتمي اكتر وتعوضي المفقود..

نأسف للنقة والرغي الكتير
تحياتي ليكن 😊