الأكرتين أقوي مستحضر لتنشيط الكولاجين

#ضد التجاعيد_للتفتيح_والتقشير
الصراحة كنز لايقدر بثمن للناس البتحسن استخدامو :)
 ح اتكلم عنو من تجربة سنين وسنين عشان كدا اقدر اقول عليهو اقوي مستحضر بالعالم لمحاربة التجاعيد عن طريق تنشيط او تحفيز انتاج  الكولاجين في البشرة ..
اسأل مجرب واسأل طبيب كمان :)
طيب نخش في الموضوع طوالي عشان ما اطول عليكم واوريكم الكريم دا هو منو وساكن وين وجنسو شنو :)

#الاكرتين هو من مشتقات فايتمين A بيستخدم لعلاج حب الشباب والرؤوس السوداء والبيضاء كمان بيعمل علي تنشيط الكولاجين وبالتالي بشرة سمحة وصافية
كمان للمسام الواسعة والتقشير وازالة خلايا الجلد الميتة ..
 هنا ح اركز اكتر علي استخدامو كمقشر ومحفز للكولاجين وبالتالي بيشتغل اكتر علي تجاعيد الوش ..
انا بعتبرو سر من اسرار نضارة الوش بمفعولو القوي وسعرو اقتصادي في متناول اليد لشباب دائم وبشرة خالية من التصبغات والاثار والمسامات وضد التجاعيد
الحلو فيهو انو متوفر في جميع الصيدليات وفي متناول الجميع وباسعار بتناسب ميزانيتك ..

نجي نتعرف علي الكولاجين زااتو دا شنو لأنو بقي نقطة ضعف لينا لما نسمع اي منتج في الاعلانات بيحتوي علي اي حاجة اسمها كولاجين ..
#الكولاجين عبارة عن بروتين موجود في الجسم وضروري لصحة الجسم عموما هو المسؤول عن قوة العظام والاضافر والشعر والجلد وهنا بهمنا الجلد وبشرة الوش خصوصا .. وباستمرارية انتاجو في الجسم بيدعم خلايا الجلد لكن ح تواجهنا مشكلة التقدم بالعمر وبالتالي ح يبدأ يتناقص ودا بيتسبب في التجاعيد وترهل الجلد بمعني :
تقدم العمر = نقص كولاجين = تجاعيد ( دي المعادلة )
نحن ما ح نقدر نوقف العمر طبعا لكن بيدنا نحد من تناقص الكولاجين باستعمال تقنيات ومنتجات بتحفزو ..
زي مشتقات فايتمين A  وواحد منهم (التريتينوين )اللي هو #الاكرتين

 طيب كيف ح نستخدم الاكرتين ؟!
الاكرتين كمقشر محتاج تمرين للبشرة يعني زي التمارين الرياضية لما تبديها اول مرة بتلقي انو كل عضلاتك بتوجعك في البداية وشوية شوية لغاية تتعودي .. دا بينطبق علي الاكرتين واخوانو انو في البداية بيحمر ليك وشك وكمية من القشرة والهيجان وبالمواصلة عليهو بتقل كل الاثار الجانبية دي وبالكاد بتختفي

البداية بتكون كيف ؟؟
عشان تتجنبي معظم الاثار الجانبية للاكرتين وحدتها ابدي الكريم بالتدريج حبة حبة
عندك كم طريقة والخيار ليك ..
ممكن تمسحيهو يوميا وفي اليوم الاول كفاية تخليهو ساعة مع زيادة نص ساعة كل يوم لغاية ما تقدري تنومي بيهو الليل كلو .. او تعمليهو يوم بعد يوم بمعدل تلاتة ساعات وكمية بسيطة جدا بتكفي
او مرة كل تلاتة يوم لمدة كم اسبوع وتاني تلقي بشرتك اتعودت بشكل طبيعي

بعض #النصايح والتحذيرات ..
للناس البستعملوهو لحب الشباب عادي جدا انو في البداية يهيج الوش ويزيد الحبوب بس ما تخافي استمري وكل الحبوب المدفونة ح تطلع وتتخلصي منها وتنعمي ببشرة صافية
اتجنبي استعمال الاكرتين بكثرة في السخانة الشديدة في فصل الصيف ( خليكي مقابلة المكيف طوالي )
بعد استعمال الاكرتين اتوقعي انو بشرتك تبقي حساسة شوية لانو مقشر قوي يبقي تعملي حسابك من الشمس وتمسحي واقي شمس وانتي طالعة بالنهار
مادة التريتينوين اللي في الاكرتين مادة حساسة للضوء فالافضل تمسحي الكريم بالليل وتطفي النور وتنومي
الاكرتين ممكن تستخدميهو يوميا بعد بشرتك تتعود عليهو .. واذا بتستخدميهو للتقشير بس كفاية مرة او مرتين في الاسبوع عشان تتجنبي القشرة خصوصا لو كنتي بتحبي المكياج
لو عندك مناسبة خطيرة يبقي توقفيهو قبل اسبوعين من المناسبة افضل دا لو بتحبي المكياج برضو
ماتستخدمي الكريم ووشك مبلول بالموية لازم يكون جاف وتستني لغاية كل الموية تتبخر عشان ما تزيدي من الاثار الجانية لكن عادي ممكن تعملي مرطب بعديهو ( يعني ما تعمليهو علي بشرة رطبة استني تلت ساعة بعد تغسلي وشك )
الترطيب بعد الاستخدام ضروري عشان الجفاف مايدينا نتيجة عكسية
حتي الان ممنوع للمرأة الحامل ( لسا في ابحاث عن هل بيتم امتصاصو عن طريق الجلد للدم  ولا لا )

من #اثارو الجانبية :
 احمرار .. قشرة وجفاف للبشرة  ( دي الاثار الشائعة )
بعض الناس بيشعروا بشوية حكة ( احيانا )
الاحمرار دايما بيكون نتيجة التعرض للشمس وبيخف بالاستمرارية في استعمال الكريم

كيف اتحكم بالاثار الجانبية وامنع القشرة والاحمرار وجفاف البشرة ؟!..
اول شي زي ما قلنا قبيل بالتدرج في استخدام الكريم ,,
استعملي مرطب زي بيبانثين مثلا او مرطب بايوديرما  بتلقيهم في الصيدليات او اي مرطب بتحبيهو ( انا بعمل مرطب كلينيك )..
ممكن تعملي فايمين E كمان ( افتحي كبسولة من فايتمين E  وامسحي بيها وشك بعد تغسليهو من الكريم او ممكن مع الكريم زاتو تمسحيهو )..
ماسك الخميرة بالزبادي وبعد ينشف ادلكيهو براحة بتلقي القشرة طلعت ..
الصباح لما تغسلي وشك وهو مبلول لدلكيهو بسيط بتلقي القشرة بتطلع معاك  او تغسلي وشك بفرشة التنظيف (من اولاي او قرين) لانهم اخف من فرشة (الكلاراسونيك  )..
اذا انتي من النوع الوشو بيحمر(بالذات مع الشمس) ممكن تعملي كمية بسيطة جدا من كريم اليكا او بيتاديرم ( بيتاميزازون ) بعد تغسلي وشك من الكريم لكن ما يوميا اكيد عشان ما نخش في مشاكل تانية .. مرة اسبوعيا تكفي :)

هناك مستحضرات او مواد كيميائية #اتجنبيها مع الاكرتين ومشتقات فايتمين A عموما ..!!

اي مستحضر بيحتوي علي جلايكوليك اسيد واحماض الفواكه زي الافاهيدروكسي اسيد وغالبا بتلقوهو مكتوب بالشكل دا AHA
كمان ماتستخدمي فايتمين سي في نفس الوقت مع الاكرتين لازم ع الاقل يكون في فاصل زمني بيناتهم
البنزويل بيروكسيد ( مادة لعلاج حب الشباب برضو ) مع الاكرتين بالذات ما ينفع تعمليهو
حمض السالسيليك (الصفصاف) زي صابونة اكنيبار مثلا
حاولي اعملي صابونة ما تكون فيها مادة مقشرة  مع الاكرتين واخوانو
اي مستحضرات تجميل بتحتوي علي تراكيز عالية من الكحول اتجنبيها مع الاكرتين

مستحضرات تحتوي علي فايتمين A :
الاكرتين والاكنيلين والرتين A  ( المادة الفعالة تريتينوين Tretinoin)
الدفرين والماربالين والدرايفا جل ( المادة الفعالة ادبالين Adapalene )
اي مستحضر يحتوي علي مادة الريتينول ( دا الشكل الكحولي )
كلهم نفس الحنك والفعالية  :)

من الحاجات التانية الحلوة المحفزة للكولاجين :
فايتمين #سي بكل اشكالو سواء كريم او سيروم او حبوب او من مصادرو الطبيعية زي الليمون والبرتقال والطماطم
وتاني حاجة جهاز #الديرما رولر
 الديرما رولر هي حل لكل مشاكل البشرة وانا بعتبرها نمبر ون في العلاج وتحفيز الكولاجين والمفروض اي واحدة تتقتني الجهاز دا وممكن نجيها في بوست منفصل بكل تفاصيلها في حين انو ماشاء الله في بنات كتار اتكلمو عنها لكن لو كل واحدة استعرضت تجربتها لينا بكل محاسنها ومساويها  ح تساعدنا كلنا في حل حل جزء من مشاكلنا دا لو ما كلها واكيد ح نستفيد من اي تجربة ويا حبذا لو ناس الاختصاص قيموها لينا كمان ..

#معلومة :
ممكن تستخدمي الاكرتين بغرض تسريع التفتيح مع مستحضرات تفتيح تانية زي الكوجيك اسيد او الهيدروكينون
كريم (كوجي سان فيهو كوجيك اسيد 1% )
وكريم اسمو ميديكيتيد (medicated fade cream  ) كريم امريكي بيحتوي علي هيدروكينون 2%
الخلطات دي لاثار الحبوب وللناس البتعاني من الكلف او اي تصبغات جلدية ولتقشير وتفتيح المنطقة الحساسة كمان
ممكن كمان تستخدميهو مع كريم الديرموفيت ( Dermovate ) لتفتيح المفاصل والركب بس حاولي اتجنبي الاحتكاك زي مسح الارض وكدا 😁

بيتلقي وين وسعرو كم؟!
في كل الصيدليات
سعرو اخر مرة قبل 3 شهور كان بس 51
حاليا قالوا بقي بي 65

 #كسرة بموية
لكل عمر من مراحل عمرنا جمالو ورونقو الخاص ..حتي علامات الشيخوخة بتضفي لينا وقار علي قسمات الوجه وتعابيرو ...
اعرفوا انو الجمال ما محدد بمعايير معينة والوضعوا المعايير والمقاييس دي للجمال الا يكون عندهم اهداف ربحية وانا بشوف انها ما بتستند لاي حقيقة مطلقة
مافي شئ دايم لينا وكلنا ح نمر بمرحلة الشيخوخة والتجاعيد الماخمج عشان كدا نقبل نفسنا بكل مظاهر التغيير اللي ح نمر بيها ..

تحياتي
ودمتم بجمال :)