طريقتي في إستخدام ملح الحليب للتقشير

في كل مرة بنقول انو التقشير مهما كانت طريقتو كيف إلا انو سر من أسرار النضارة بل هو مفتاحك للدخول الي عالم الأنوثة والنعومة والطراوة والحلاوة هههه والله جادة معاكم
والتجربة ح تثبت ليكم 😉
كدي اي واحدة تكلمنا هنا عن طريقتها للتقشير او للحمام عموما وهل وصلتي للنتيجة الانتي عايزاها مثلا ؟!
او شايفة فرق بعد كل مرة انتي بتقشري فيها ؟!
بالنسبة لي انا بستخدم ملح الحليب للتقشير اليومي او بالاصح يوم بعد يوم وبالذات للمؤخرة وانا ذكرتو قبل كدا في بوست العناية بالمؤخرة ..
ملح الحليب من يوكو انا عندي في الحمام زي ملح الطعام في المطبخ 😅 لا يقل أهمية ابدا ابدا
كلنا يمكن عندنا الملح دا بس قد نختلف في طريقة استخدامو بالتأكيد.. المهم نوصل لنتيجة حلوة ونكون راضين عنها ..
من الطرق الحلوة لتقشير  الوجه لو بتتذكروا انك بس تجيبي سكر وزيت وتفركي برفق ..
كدا ح تشيلي كل الخلايا الميتة والقشرة وتهيأي البشرة انها تستقبل اي كريم او ماسك وتقدري تستفيدي منو ودي مهمة التقشير الأساسية 😊
نفس الطريقة دي حصل استخدمتيها لجسمك مثلا طالما نتيجتها حلوة جدا للوجه ؟ ؟!!

استخدامي للملح كان عبارة عن انو ابلل جسمي بالموية واوزع الملح علي كامل جسمي وابدأ افرك لمدة دقيقتين او تلاتة وبعديها اتمصمص واتمسح وابقي مارقة 😅
الطريقة دي ما كعبة بس بشوفها مرهقة شوية والفرك علي الجاف مؤلم وصعب مع انو نتايجو كمان حلوة شديد..
كمان لازم اتمسح بأي كريم وانا جسمي مبلول نوعا ما عشان احافظ علي الرطوبة لأنو الموية بتحبس الرطوبة ودي افضل طريقة للترطيب بالمناسبة 😊
فأنا قلت اضرب عصفورين بحجر اللي هو تقشير وترطيب في نفس الوقت مع الحصول على نفس النتائج ..
فقلت استخدم الزيت مع الملح
طيب تعالوا نعرف الطريقة كيف !!

#الطريقة
ح يكون عندك زيت بتحبيهو وأهم من كدا عندو فوائد جمة عشان تستفيدي منو .. انا شخصيا بحب زيت جوز الهند بانواعو سواء كان عضوي او نقي زي براشوت ونارجيل..
ويكون عندك طبعا ملح الحليب بالذات لأنو غني بفايتمين E
 وكمان لو عندك زيت جونسون كإضافة للزيت الأساسي عشان ريحتو حلوة ..دا اذا بتحبي ريحة جونسون بالذات اللي بالصبار
انا بخلطو مع زيت براشوت بتكون ريحتو جميلة جدا 😊
المهم تجهزي التلاتة ديل وتنوي الحمام
في البداية تبللي كامل جسمك بالموية
تجي تمسحي الزيت برضو علي كامل جسمك من قدميك تحت لغاية رقبتك فوق وح يكون مساج ظريف كمان 😉
بعد كدا شيلي من الملح شوية شوية وافركي جسمك كلو بنفس الطريقة واستمري في الفرك لمدة دقيقتين او تلاتة برفق كدا ( gently  ) كفاية جدا ..
اهم حاجة ركزي علي المؤخرة بالله ..حركة الفرك بالملح دا غير انها بتنعم وتزيل الخلايا الميتة كمان بتقلل من السيلوليت وبتصنع فرق كبير وح تلاحظي دا بالاستمرار ..

بعد كدا افتحي الدش فيك وشوفي لون الموية الح ينزل وكمية الوسخ تحلفي تقولي لي شهر ما استحميت 😂

ح تلاحظي للنعومة من اول استخدام بشكل مبالغ فيهو
ح تطلعي من الحمام وانتي مرطبة ومندية نتيجة لتأثير الزيت مع الموية قبيل لأنو زي ما قلنا الموية بتحبس ليك الرطوبة..
دا غير انك انتي بتقشري وبتفركي علي جسم رطب وبكدا ح تتحاشي الحرقة بتاعة الملح خاصة للمناطق الحساسة لأنو في بعض البنات بيشكوا من انو الملح حار علي أجسامهم فالطريقة دي ح تريحكم شديد ..
وكل ما كان جسمك رطب كل ما طلعت منك كمية القشرة والخلايا الميتة اللاصقة بكل سهولة..

الطريقة دي تنفع للناس البيتعرضوا لشمس كتير واتربة وبتحسي كأنو في طبقة فوق كدا لاصقة ليك ما عايزة تطلع 😅
بالطريقة دي ما بتحتاجي تستخدمي اي صابون والا ما ح تستفيدي من ترطيب الزيت وتطلعي ناشفة وكأنك يا أبوزيد ما غزيت.. والافضل دايما بعد اي فرك حتي لو كانت عروكة انك ما تستخدمي صابون  وصدقيني ما بتحتاجي ليهو لأنو ما ح يكون في وسخ وريحتك ح تكون منعشة زي الأطفال أو بالاصح بدرة جونسون بدرة جونسون 😍

ح تطلعي وكأنك ممسحة بكريمك العادي يعني ابدا ما ح يكون في احساس بالزيت ودا للناس اللي الما بتحب الملمس الزيتي في جسمها..فما تخافوا ح تلاحظي انك مرطبة وما غبشا دا كل الفهم وليكي الخيار إذا عايزة ترطبي جسمك تاني او لا ..

الحلو في الطريقة دي انها ممكن تتعمل كتقشير يومي بدون اي ضرر بس انا بفضل يوم بعد يوم او مرتين اسبوعيا عشان روتينك يبقي سهل وما ترهقي نفسك كتير وترهقي ميزانيتك كمان 😊

بعد توصلي لدرجة النعومة البتتطمحي ليها ممكن تكتفي بمرة أسبوعيا كمحافظة علي الوصلتي ليهو دا

ح تلقي لونك اتوحد بشكل كبير ونعومة مبالغة بما فيهم كفة يديك وقدميك كمان ..

#كسرة_ناشفة
دي أفضل طريقة لتقشير وتنعيم المؤخرة طبعا
واوعدك لو استمريتي عليها اسبوعين بس ما ح تتعرفي علي نفسك ولا علي مؤخرتك 😉
بالمناسبة انتو الموسخين بيوتكم وملاياتكم وحيطتكم وشارع بيتكم ونور بيتكم عشان كدا قوموا علي الملح دا يرحمكم الله  😁

ودمتن سمحات وناعمات 😊