#حبوب سفن سيز لعلاج تساقط الشعر والأظافر Seven seas capsules
#حبوب_سفن_سيز_لعلاج_تساقط_الشعر_والأظافر
#Seven_seas_capsules
صباح الخييير عليكن ❤
السفن سيس أو زيت كبد الحوت دا كان اول فايتمين استعملو في حياتي لعلاج تساقط الشعر اللي كنت بعاني منو قبل فترة طويلة .. وبعديهو استعملت أنواع تانية من الفايتمينات لأنو كان بيقطع كتير في الشركات والصيدليات..
يمكن انا اكتر زول بلع فايتمينات للشعر ههه
الصراحة ما كنت بلقي كل احتياجاتي في الأكل .. واكلنا زاتو ميت 😁
أهم حاجة حددي سبب تساقط شعرك ولاحظي لأي حاجة جديدة تعمليها لشعرك مثلا أو لو انتقلتي لمكان تاني شوفي الاختلف شنو في البيئة حولك .. الأكل أو الموية أو الطقس...الخ
زيت كبد الحوت وزيت السمك من الدهون النافعة تعتبر.. غير انو للشعر والأظافر الا انو ممتاز جدا لسلامة المخ بشكل عام ..وأهم حاجة بيعتبر مضاد للإكتئاب بمعني انو بيملك خصائص ملطفة للمزاج وبيساعد علي الإحتفاظ بذاكرة قوية 😊
أعتقد انو انا الأيام دي ذاكرتي اتحسنت كتيير 😄
زيت كبد الحوت من المكملات الغذائية المهمة جدا لأجسامنا اللي ممكن ما ناخد كفايتنا منها خصوصا في ظل الحياة السريعة اللي عايشنها ..
الجميل فيهو انو فوائدو بتوصل لكل خلية في الجسم عشان كدا بنلقاهو بيشتغل في حاجات كتيرة واللي أهمها بالنسبة لي حاليا الشعر والأظافر والبشرة 😊
لكن بنجد انو كمان مهمة لصحة القلب والمفاصل والتهابات الجلد والدماغ.. لأنو بيحتوي المواد دي
EPA ( Eicosapentaenoic Acid ), DHA ( Docosahexaenoic acid )
وديل من المواد الأولية للاوميغا omega 3 واكيد سمعنا بفوائد الاوميغا علي الصحة العامة ولوظائف الجسم عموما..
كمان بيحتوي علي نسب من فايتمينA و E وفايتمين D
زيت كبد الحوت من خلال تجربتي ليهو قرابة الأربعة شهور
اقدر اقول انو بيقوي الشعر والأظافر بشكل ملحوظ جدا
بيوقف التساقط من الشهر الأول.. والتقصف كمان ..
وبيعزز نمو شعرك ..
كانت عندي مشكلة جفاف شديد واظافر متكسرة بإستمرار والحمد لله ماشة في تحسن ملحوظ..
خيار ممتاز كمكمل غذائي وكمعالج ليك..
بالنسبة لزيادة الوزن زيو زي فايتمين ناتجة من انو بينظم عمل الجهاز الهضمي بشكل كويس..دا لأنو الأغلبية الاستعملوهو بيعانوا من زيادة الوزن لو ما عملوا حسابهم في الأكل 😁
السفن سيز seven seas هو الأشهر وصناعتو انجليزية ممتاز خالص.. لكن كمان اي زيت كبد حوت من شركات تانية بيؤدي الغرض..بس نحن اتعودنا علي السفن سيز 😊
بيجي تراكيز مختلفة .. اللي عندي دا تركيز 525 mg وكبسولة واحدة يوميا كفاية جدا بعد الأكل طبعا ..فيهو 60 كبسولة..
في عبوة تانية تركيزها تقريبا نص التركيز الفوق دا وفيها 120 كبسولة بتاخدي 6 كبسولات في اليوم بمعدل كبسولتين كل وجبة.. انا كنت ياخد 4 كبسولات ما تميتها 6 ونتيجتها كويسة شديد..اصلا في وجبة كدا رايحة مننا 😂
في فترات كتيرة ببلع معاها الفوليك اسيد 5 مجم يوميا وتأكدي انو النتيجة مضاعفة 😊
بيتلقي في الصيدليات بس ما متذكرة سعرو ..
عيبو الوحيد انو كتير كان بيقطع في الصيدليات..
لكن لو اتلقي جميل جدا جدا 😊
دا خيار امامك وفي خيارات لفايتمينات تانية اذا ما اتلقي ح ابقي احكي ليكم تجاربي معاها واقارن بينهم..
#كسرة_بموية
المصادر الطبيعية للفايتمين ممكن تلقوها في السمك زي السلمون وفي البيض وفي المكسرات كمان والخضروات ذات اللون الداكن زي الملوخية.. 😊
قبل اني اخد هده الفيتامينات هل لزم استشير دكتور يعني هل فيه اعراض جانبيه بليس جوابني اريد ان اخد هده الفيتامينات بدون استشرة دكتور لني اعراف انه عندي نقص في الفيتامينات
ردحذف