مزيل مكياج طبيعي بالبيت

صباح  الخير يابنات ❤

اخطر حاجة علي بشرتك انك تنومي بمكياجك وكتيرين مننا بيعملوا الحركة دي بالذات لو كنا جايين من حفلة رااابة والتعب الشديد بعد الهجيج 😄
وانتي نايمة بمكياجك ح تنسد مساماتك والنتيجة هي حبوب ويصور وبكرة مرهقة واعتقد انك في غني من المشاكل دي 😊
خلي دايما عندك مزيل مكياج جاهز قبل تغسلي وشك ..دا بيساعدك علي انك تتخلصي من المكياج كلو خصوصا لو كان تقيل ..
اليوم ح نعرف كيف ممكن نصنع مزيل مكياج في البيت من حاجات متوفرة عندنا وفي نفس الوقت نستفيد من بعض مكوناتو..
اكيد في مزيلات مكياج جاهزة بعضها اسعارو معقولة وبعضها غالي جدا فالأفضل اعمليها في البيت وبالكمية المحتاجاها والاستفادة تكون أكبر..
في النهاية الخيار ليك طبعا ..
طيب نخش في الموضوع

#المكونات
كباية موية ورد
ملعقتين زيت جوز هند
ملعقتين شامبو أطفال
قطن مخصص للوجه

#الطريقة
اخلطي المكونات مع بعض في علبة فارغة أو برطمان واحفظيها في مكان بارد وأستعمليها كمزيل للمكياج سواء للوجه أو مكياج العيون وحتي المكياج المقاوم للماء 😊
لازم ترجي العلبة كويس قبل الاستعمال..
أو حطي قطن الوجه علي المكونات دي بعد تخلطيها تماام داخل البرطمان وح تلقي القطن اتشرب المزيل كلو وبكدا ما عليك الا تشيلي القطنة جاهزة مشربة بالمزيل وتمسحيها علي وشك وح تشوفي كمية المكياج اللي ح يطلع ..
بعد كدا تغسلي وشك عادي بغسولك وما تنسي الترطيب ..

#البدائل
اذا ما اتوفرت عندك المكونات دي بالذات ابدا ما تحتاري ممكن بدل موية الورد اي مياه معدنية
وبدل زيت جوز الهند ممكن زيت زيتون أو لوز أو زيت جوجوبا..
ممكن بدل شامبو الاطفال اي غسول للتنظيف العميق زي غارنييه أو غسولك العادي أو ممكن تبشري صابونتك العادية..

شامبو الاطفال بتاع جونسون لا دموع بعد اليوم كان أفضل خيار بالنسبة لي لأنو ما بحرق في العيون ودا الجربتو في كل الأحوال 😄

من مزيلات المكياج الجاهزة اللي جربتها كان بتاع بايوديرما وغارنييه وحلوين جدا جدا .. غارنييه يعتبر ارخص من بايوديرما بكتيير لكن الصراحة هو احلي لكن قطع جيبي هههه
مزيل المكياج دا مناسب لكل أنواع البشرة ..

يلا ورونا تجاربكم وكيف بتزيلوا مكياجكم سواء خفيف أو تقيل ؟؟!! 😊
تحياتي ❤