الجيلاتين بروتين الشعر المنزلي

مساء الخير ..

يمكن من الحاجات البتكسلنا من العناية والاهتمام بشعرنا انو بنحشروا جوة الطرحة والسلام ونطمن نفسنا بانو الشايفوا منو والدايرو منو لغاية يلحق الرقدوا.. او خوفنا من تجربة اي منتج خصوصا لو كان بينعم وبيفرد الشعر سبيبة سبيبة
كلنا او معظمنا بيطمح لشعر ناعم و املس في حين انو نحن الافارقة جيناتنا بتقول لا وطبيعة شعرنا ويفي او كيرلي منفوش كدا ..في يدنا نحسن من مظهرو ايوة بس كمان ما نكسر رقبتنا عشان يبقي زي شعر الممثلة او الفنانة الفلانية ذات الشعر الحريري المنسدل علي كتافينها ..
انا من الناس الشعرهم سبيبتو وسط و كيرلي ومن يومو ما طويل لكن مرات بحس انو قابل للزيادة .. يعني عايشة علي امل من سنين هههه ( لانو زمان امي بتقول لي شوفي صورتك حقت الطهور شعرك كان كيف . كان طويل فعلا لكن شكلو معنوياتي مرتفعة من قروش الطهور التحت المخدة ديك بس ههههه ) ..
يلا ابدا ما كنت بحبو كدا دا ع اساس انا من قمت كان الشعر المثالي هو المفروض يكون ناعم وطويل زي صورة البت الفي زيت دابر املأ ديك بتتذكروها شايلة مرايا كدا ؟!! او زي شعر حبوبتك السادسة عشر او شعر فاطنة السمحة  ( ديل في الحكاوي بس ما شفناهم وماعرفناهم صح ولا كضب )...
اها انا لما كنت بشم ريحة دابر املأ  دا سااي بحس انو شعري ح يبقي كدا 😂😂 وكنت اشيل واجلط فيهو النهار ما طال وبعد دا ما طال ..
والشعر يا كافي البلا ما تزحزح من محلو لغاية كبرنا وقرينا وعرفنا انو الشغلانة دي جينات في الاساس ثم يليها الاهتمام ..
 من زمان ونحن عندنا عقدة من الشعر الخشن والقرقدي ..تتذكروا المقطع بتاع الغنية دي ( جاني كديس يوم الخميس شعرو قرقدي ) النبي لاقاكم كديس شعرو قرقدي ؟!! المهم احضروا الفيديو كليب دا لانو فيهو رقصة مبااالغة .. الفيديو بيحكي انو البطل شاف البطلة اول مرة في الفيس خاتة صورة ليها سمحة وشعرها ناعم ونحيفونة كدا ..البطل اتكسر في البطلة واتفقوا يتلاقوا يوم الخميس..
يلا يوم الخميس البطل شاف البطلة واتصدم فيها وشبهها بالكديس الشعرو قرقدي ..اهاا ياجماعة هسة دي عقدة ولا ما عقدة !! ههههه في داعي لجنس دا !!
 اها الفيديو دا هو اللي لفت نظري لشعري ماعارفة ليه غايتو ومن هنا بدأت المغامرات والتجارب ...
دا ما موضوعنا هسة ..
خلونا نخش في الموضوع طوالي ونشوف فايدة الجيلاتين او الجيلي للشعر عموما وهل فعلا عندو فايدة ولا اشاعات ساااي!!
الجيلاتين هو شنو ؟؟
ياهو زااتو البتعمل في الحلويات زي الكستر لكن ارق حبتين كدا
الجيلاتين هو مادة هلامية  (يعني تخينة ولزجة ومتماسكة و دا بعد تديها نار طبعا )
الجيلاتين مشتق اساسا من الكولاجين يعني مادة بروتينية مكونة من كمية بتاعة احماض امينية ومستخلص من عضام وجلود الابقار    (الناس البياكلوا الكوارع وين انتو ياااخ ) يعني بروتين حيواني ومهم جدا لصحة العضلات والجهاز الهضمي والتمثيل الغذائي لكن هنا بهمنا اهميتو شنو للشعر .!!
بالمناسبة كمان مهم وسمح شديد للبشرة ( تتذكروا ماسك الفحم ؟؟ح نجيهو لاحقا  )
بيعزز من صحة البشرة وليهو خاصية البوتوكس .. لكن هسة خلونا في الشعر
الشعر بيتكون من اكتر من 80% من البروتينات .. يعني الشعر معظمو بروتين ..ومع البيئة الحولينا دي والحاجات البستعملها لشعرنا او حتي اهمالنا ليهو بيؤدي لينا لنقص او تلف البروتين في الشعر وبالتالي من الطبيعي انو الشعر يحتاج لبروتين والا ما كانت الدنيا قايمة وقاعدة علي ما سكات البروتين والكيراتين وماعارف ايه !!
الجيلاتين بيمنح الشعر رطوبة وحيوية ونعومة ولمعة كدا حلوة شدييد
بيخلي الشعر صحي اكتر من انو يطولو او كدا
في ناس همهم بس شعرهم يطول ان شاء الله لو يبقي ليفة سلك .. اعرفي انو مظهر الشعر وصحتو اهم من طولو وقصرو ..
الجيلاتين بيكثف ويغزر الشعر ويقويهو ودا بتحسيهو حتي من اول استخدام ليهو لشعرك ..
معالج ممتاز للتقصف والتساقط ...
الجيلاتين ممكن يوفر عليك البروتين البتعمليهو في الصالونات والكوفيرات وفي النهاية يطلع ماسورة ...

#طريقة_عمل_ماسك_الجيلاتين
ممكن تعمليهو باي طريقة تريحك المهم وصلي الجيلاتين لشعرك
يعني مثلا ممكن تضيفي منو للبلسم او للشامبو بتاعك وتغسلي بيهو شعرك وتخليهو زي خمسة دقايق كدا وتشطفي بالموية عادي .. الطريقة دي سهلة وبتوفر عليك زمن لو مافاضية ..
لكن انا شايفة انو الطريقة المثلي هي التسخين مع بعض الاضافات ..

#طريقتي_في_عمل_ماسك_الجيلاتين
ملعقتين جيلاتين
ملعقة نشا
ملعقة عسل
ملعقة صغيرة ليمون او خل تفاح (عشان نظبط ال PH)
ملعقة زيت لوز
ملعقة زيت جوز هند (الزيت البينفع معاك بس)
نص كباية لبن او موية

بتدوبي الجيلاتين والنشا مع اللبن او الموية وتختيهم ع نار هادئة وتضيفي ليهم الزيوت طوالي وتبدي تسوطي بالملعقة لغاية القوام يبقي كثيف زي كأنك بتعملي في كستر..
بعد كدا بتنزليهو وتخليهو يبرد حبة حتي تقومي تضيفي ليهو العسل والليمون وتسوطيهو ..
بعد كدا تجي تطبقيهو علي شعرك وهو بارد من الجذور للاطراف ..
شعرك الافضل يكون نضيف مغسل وجاف لكن ماشرط ..
لو عندك مجفف شعر او استشوار افتحيهو علي شعرك وبكدا يكون اخد حرارة ونشف بالمرة ..
عموما الحرارة بتخلي اي ماسك عندك يتغلغل للشعر كلو ..
مابيحتاج تغطيهو ..
الماسك دا ماشرط يوصل للفروة لانو هنا بتهمنا الشعرة نغلفها بالبروتين مش الفروة ..
لو وصل الفروة ماتخليهو يقعد كتير لانو ممكن تحسي بحكة ..
تعالي اشطفيهو بالموية بعد كدا عادي وغسليهو بالشامبو بتاعك واعملي البلسم واشطفي  ..
عشان شعرك يحافظ علي رطوبتو اعملي ليهو مع البلسم حبة زيت حتي اشطفي شعرك ..
طبعا ممكن تتخيلي انو جل وما ح يطلع بسهولة من الشعر بالعكس بيطلع اسهل مما تتوقعي ..
الماسك بيتعمل كل اسبوع او اسبوعين او كل10 ايام ..
بتخلي الماسك علي شعرك من 10 دقايق الي 60 دقيقة ودا علي حسب صحة شعرك  والافضل يكون التجفيف بحرارة ...
يعني ما تشوفي النتيجة سمحة وتقولي اعملو كل يوم لااااا كترة البروتين ممكن تتلف الشعر كمان ..ما تفرطي كمان واي شئ بيزيد من حدو بيقلب ضدو ..
الماسك دا بينفع اكتر للشعرهم خشن وجاف ومنفوش لانو بيملسو وينعمو .. فالشعر الاصلا ناعم شديد بيخليهو نايم كدا ..
بتلاحظي النتيجة من او استخدام وكل ما استمريتي عليهو كروتين النتيجة بتكون اكتر من فظيييعة..
انا جربتو مرتين وانبهرت الصراحة ..ما كنت متوقعة النتيجة كدا ..
كان عندي جزء من شعري سبيبتو خشنة من  شعري الباقي حاليا بعد التجربة دي بقت ناعمة زي الجلي هههه
انا استخدمت الجيلاتين بتاع الحلويات العااادي  المنكه دا واخترت الفراولة لانو ريحتو وااو ( الجود من الموجود عاد) لكن في المرات الجاية ح استخدم العادي بدون اي نكهات او اضافات لانو كتيرين بيقولوا هو الافضل ...
ممكن تستغني عن كل المكونات الفوق دي وتكتفي بالجيلاتين والموية بس ..
ما تحاولي تكتري الليمون او الخل لانو الجيلاتين صعب يشتغل ليك في وسط اكثر حمضية ..يعني ممكن تأثر علي قدرة الجيلاتين علي ارتباطو بالشعرة بتاعتك ..

#كسرة_بموية
الجيلاتين مهم لصحتك وصحة شعرك وبشرتك واظافرك كمان ..
اربعة معالق يوميا من الجيلاتين للصحة العامة في العصير او الشاي بتاعك وبيها تحتفظي علي شباب بشرتك كمان ووفري حق الكولاجين البتشتريهو بالشئ الفلاني ..لانو الكولاجين جزيئاتو كبيرة عشان الجلد يقدر يمتصاهو فالجيلاتين اخف ..
ممتاز جدا لصحة المفاصل (التهاب المفاصل )..
كمان بيساعد في عملية الهضم بصورة مبالغة ..
بالنسبة لناس التخسيس وفقدان الوزن بينشط من عملية الأيض وبينظم مستويات السكر في الدم  وكمان بيعمل على زيادة التمثيل الغذائي ودا بيساعد بشكل مباشر في عملية انقاص الوزن  ...    
                                     
ودمتن سمحات :)