فرد وتنعيم الشعر بالنشا وحليب جوز الهند

الليلة البوست دا ح يكون بإختصار لأنو لي فترة يمكن بكتب بتفاصيل عشان كنت في ترطيبة كدا لي زمن 😅 لكن خلااص جيت لمعمعة السودان وشمسو وسخانتو وكتاحتو 😁 يلا نخش في الموضوع عشان انتو زاتكم ما تسخنوا
يمكن كلنا سمعنا بالنشا للشعر يا جماعة وقدرتو علي التنعيم لكن اكيد ماكلنا ما جربو لاي سبب كان..يمكن اصلا تكوني ما مقتنعة بالحاجات الطبيعية مثلا او ما عندك وقت تضيعيهو في جلبطة فارغة وما منها فايدة .. انا زاتي كنت مفتكرة كدا
كنت ما مصدقة وعلي العلي كسلانة 😅
يلا يا جماعة انعلوا الشيطان دا وقوموا علي الخلطة دي سريع والاهم من كدا تواظبوا عليها ع الاقل أسبوعيا وتاني ما ح تحتاجوا لكريم فرد ولا استشوار بطريقة مستمرة..
هو ايوة صحيح ما لدرجة كريم الفرد بتاع أوليف داك او دارك اند لفلي او بوتينيكال وت ايفر يكون شنو لكن بالجد ح تلاحظي انو سبيبتك اتغيييرت ومن اول استعمال كمان 😊
الخلطة أساسها النشا وحليب جوز الهند مع بعض الاضافات

#المكونات
اعرفي انو المكونات دي علي حسب طول شعرك 👩
كوب حليب جوز الهند
ملعقتين نشا
ملعقتين زيت جوز هند( او لوز حلو او زيت ذرة  او اي زيت انتي بتحبيهو  ونافع معاك )
3 ملاعق عصير ليمون

#طريقة_التحضير
دوبي النشا في عصير الليمون واضيفيهو للحليب ومعاهم الزيت وحطيهم ع نار هادئة وخليك بتسوطي بالملعقة وما توقفي عشان ما تكلكع زي كأنك بتعملي في كستر.. ولغاية تاخد قوام تقيل زي كريمي كدا واطفيها ونزليها خليها تبرد حبة بعد كدا شيلي منها بيدك واجلطي في شعرك من الجذور لغاية الأطراف..
بتخليهو من ساعة لغاية أربعة ساعات وبعد كدا خشي الحمام غسلي شعرك وحتي يمكن ما تحتاجي شامبو ممكن بالموية بس .. لكن لو عايزة تعملي استشوار ولا مكوة مثلا في الوقت داك أفضل تغسليهو بشامبو عشان بعدين مع الحريقة ما تطلع ليك اي ريحة 😁

#بعض_النصايح
الأفضل الشعر يكون نضيف لكن كمان لو كسلانة من الغسيل في الوقت داك ما تتوقفي وعاادي ممكن تعمليها علي شعرك وهو ما نضيف خالص..واهو الكحة ولا صمة الخشم 😂
بعد تطبقيها علي شعرك الافضل انك تغطيهو بكيس او اي غطاء بلاستيكي وفوق ليهو منشفة حارة عشان تساعدي اي حاجة تخش لمسامات الشعر..
الخلطة دي تنفع لأي نوع شعر حسب مساميتو سواء كانت عالية او منخفضة..
وبما انو حليب جوز الهند غني بالبروتين اتوقعتو ما ينفع مع مسامية الشعر المنخفضة  إلا انو نفع معاي وانا مسامية شعري تكاد تكون منخفضة..فأنا عملتو 3 مرات والنتيجة اكتر من مرضية بالنسبة لي 🤗 واعتقد انو كمية البروتين فيهو مش وااو 🤔
لكن برضو جربو واحكموا ..
اعتقد انك ممكن تستخدمي الحليب العادي كبديل لحليب جوز الهند.. تتذكروا الخلطة بتاعة الجيلاتين بروتين الشعر المنزلي برضو كان معاهو نشا ولبن عادي ونتيجتها كانت حلوة شدييد وبتحسي شعرك مفرود وناعم..

#سحر_النشا
النشا من الحاجات الحلوة فيهو انو بينضف الفروة كويس جدا ..وبيعتبر معالج للفروة الدهنية بالذات ..
النشا بيحتوي علي تركيبة مضادة للاكسدة زي فايتمين سي والليكوبين ودا بيساعد في إنتاج الكولاجين وبالتالي اكيد بتمنع تضرر الخلايا ومن ثم ممكن جدا تمنع تساقط الشعر وفي نفس الوقت بتغذيهو وتنعمو بشكل ملحوظ كمان..
دا غير انو بيحتوي علي احماض اوميغا 3 و اوميغا 6 زي الموجودين في زيت الذرة البنطبخ بيهو وديل بيمنعوا فروة الرأس من اي جفاف او حتي اي التهاب..
إذا يوميا بتشربي كباية عصير نشا ح تلاحظي انو التساقط قل كتيير لانو بيحتوي كمان علي معادن وفايتمينات زي B5 و B1 وحمض الفوليك ..
بيحتوي كمان علي فايتمين k  اللي بيساعد في امتصاص الكالسيوم  وبكدا ممكن يمنع برضو تساقط الشعر..

لييه #حليب_جوز_الهند بالذات ؟!

هو حليب طبعا بيستخرج من جوز الهند المبشور
طيب كيييف ممكن يتحضر؟!
بتنقعي جوز الهند في موية مغلية لمدة كافية لغاية الموية تاخد لون جوز الهند بعد كدا بتصفيهو وتستمتعي بالطعم 😋 وممكن تخلطيهو حتي تصفيهو ..
الحليب دا غني جدا بالفايتمينات والمعادن وأهم شئ فيهو كمية احماض أساسية زي حمض اللورييك والكابريليك اللي عندهم اثر مضاد لتراكم البكتيريا والجراثيم ودا معناها بيساهم كتيير في علاج تساقط الشعر وكمان بتنعم الشعر وبتساعد في نموهو   .. حتي انو ممكن تستخدميهو كبلسم بعد تغسلي شعرك ..
او ممكن تضيفيهو للشامبو او البلسم بتاعك..
البتاع دا للصحة عموما مفيد جدا جدا وممكن تشوفوا عمو قوقل لتفاصيل اكتر..
الليمون خصايصو غنية عن التعريف بالنسبة للانتعاش والحكة والقشرة وتظبيط ال PH للفروة وبيخلصك من اي زيوت زايدة..
اما زيت جوز الهند غني عن التعريف وماشرط هو بالذات المهم زيت يناسبك ويناسب شعرك..

ودمتن سمحات وشعركن ناعم واملس 😊