الإنفيرجن ميثود أسرع طريقة لتطويل الشعر Inversion method

منو المابتحب شعرها يكون طويل ؟! ومنو البتحب الشعر الطويل ؟!
الاغلبية ح يقولوا الشعر الطويل الحووووب 😍
اليوم البوست دا عن طريقة لتطويل وتكثيف الشعر
هي طريقة بسيطة خاالص وغير مكلفة بالمرة..كل العليك انك تجربيها وتحكمي بعداك
طريقة الانفيرجن او الطريقة الانقلابية او الانكشاحية بالترجمة وكدا 😁 وتقريبا معظمكم بيكون سمع بيها
من اسمها واضح انها بتعتمد علي شئ مقلوب ودا ح نعرفوا هسة من خلال التفاصيل
هي طريقة ماليها اي اثباتات علمية تذكر وكل القاموا بيها وجربوها يوتيوبرز وبلوقرز أجانب ( حتي الأجانب مهتمين بتطويل الشعر ) وبعديها قاموا فيها العرب والافارقة وهكذا انتشرت واشتهرت لدرجة انو في تيشيرتات مخططة ومرقمة بقياسات لإثبات مدي فعالية الطريقة دي وللمتابعة والقياس كل اسبوع وكل شهر زي ما شايفين تحت في الصورة..
الانفيرجن ميثود من اسرع الطرق الممكن يطول بيها شعرك
واصلا كدا كدا شعرك طبيعي بينمو وبيطول بس دي بتسرع من الشغلانة دي ..
التفسير المنطقي للميكانيزم بتاعة الانفيرجن ميثود في انو القلبة بتاعة الرأس دي بتحفز الدورة الدموية وبالتالي تدفق الدم بيكون بغزارة لمنطقة الرأس والفروة والبصيلات وبالتالي اكيد الشعر ح يستفيد من الزيوت المطبقة علي الفروة وبكدا ح يتحفز نمو الشعر ..

#الطريقة
جيبي اي زيت للشعر..المهم يكون بينفع معاك ولازم تختي في  اعتبارك مسامية شعرك برضو.. لأنو ما اي زيت بيقدر يخترق الشعرة بتاعتك .. (راجعي البوست بتاع المسامية )
كمية الزيت بتكون قدر كمية شعرك ..
وأهم شئ تدفي الزيت في حمام مائي او في الميكرويف وخلي بالك ما يتحرق الزيت في الميكرويف  .. يعني تسخنيهو لدرجة انك لما تدخلي فيهو أصبعك تقدري تتحمليهو
بعد كدا تجي تطبقيهو علي شعرك وتخلليهو كويس من الجذور للأطراف يعني غرقيهو تب ..
تعالي بأطراف أصابعك واعملي مساج للفروة بنعومة بالزيت الغرقان بيهو شعرك اصلا لمدة دقيقتين _4 دقايق بحركات دائرية لكل الفروة..

بعد كدا تجي اهم خطوة اللي هي تنكشحي ههههه
بمعني انو تقلبي راسك في اتجاه الأرض (رأسا على عقب 😅) زي في الصورة تحت .. وفي كذا طريقة طبعا المهم اختاري الطريقة البتريحك..
وتفضلي ع الوضع دا لمدة 4 دقايق وبعد كدا ارجعي لوضعك  الطبيعي براااحة كدا عشان ما تحسي بانو الواطة دي بتدور بيك 😅 او ع الاقل عشان ماتصدعي ..
خلي الزيت علي راسك من ساعتين لغاية ليلة كاملة حتي تغسليهو ..
بتتكرر العملية دي في الشهر الواحد يوميا لمدة 7 ايام وبتوقفي لغاية الشهر الجاي وبتعمليها وهكذا..
يعني 7 ايام متتالية في الشهر الواحد..
بالنسبة لغسيل الشعر ما شرط يوميا ممكن يوم بعد يوم او بعد يومين لكن ما اكتر من كدا عشان ما يتراكم الزيت علي شعرك ويسد ليك الفروة ..
قيسي شعرك كل اسبوع والمفروض يطول بمعدل ٢سم _ ٤سم في الاسبوع علي حسب طبيعة شعرك
ممكن تجيبي تيشيرت ابيض وكل اسبوع  تقيسي ترسمي خط بقلمك او ممكن تقيسي كل شهر ما مشكلة ..

#ملحوظة
إذا كسلتي منها كل يوم ممكن تعمليها في فترات متباعدة خلال الشهر لكن اهم شيء الانكشاحة دي وبرضو شعرك بيطول لكن بمعدل أقل 😊
ح تلاحظي انو شعرك بدأ يكثف ويغزر برضو وحتي الفراغات في شعرك بدت تنمو ودا لو واصلتي فيها طبعا ..
ح تلاحظي كمان شعرك صحي اكتر المهم تختاري الزيت البيناسبك ..
ممكن اول مرة بعد تعمليها تحسي بصداع خلال اليوم لكن عادي وشوية شوية ح تتعودي عليها وتاني ما ح تحسي بشئ ..
لكن لو عندك مشكلة بتاعة دوار او مشكلة في الضهر والرقبة انا ما مسؤولة عاد 😁
باقي الايام ممكن تستعملي كريمك اليومي وماسكاتك واستشوارك وحاجاتك كلها بطريقتك المعتادة ..
الطريقة دي مناسبة لكل الأعمار بما فيهم الأطفال..

#تجربتي_ورأيي
انا كنت قاصة شعري حد اضنيني وكنت باخد في علاج كدا يكاد يكون بيوقف نمو الشعر  بيزيد التساقط ودي الطريقة الوحيدة التي أعادت الحياة لشعري وبقي عندي شعر زي البنيات لحدهن  🤗😅
انا بطبعي مابحب غسيل الشعر الكتير لأنو الغسيل الكتير بالذات بالشامبو بينتهي ليك بجفاف الشعر لذلك ممكن تغسلي شعرك مرتين بس في السبعة ايام دي وانا شخصيا بعمل كدا ..لكن في ناس مابحبو اي ملمس دهني اكتر من يوم في شعرهم وديل ليهم الحرية في طريقة غسلهم لشعرهم سواء يوميا او غيرو..

#كسرة_بموية
اي واحدة جربت الطريقة دي ياريت تعرضها لينا ويا حبذا لو كان بالصور قبل وبعد.. وانا ان شاء الله في الأيام الجاية ح اكون اكتر حرصا علي التصوير قبل وبعد كمان عشان نقيس مدي فعالية الانفيرجن ميثود..

تحياتي
ودمتن سمحات بشعر طويل 😊