طريقتي في إستخدام كريم اليكا كماسك للمناسبات
صباحاااتكن يا حلوات ❤
من اكتر الحاجات اللي بتسبب لينا أرق انو كيف ابان منورة في اي مناسبة تحصل لي سواء عرس اختك ..بت خالتك او حتي عزومة عندك في البيت ..سماية ..العيد مثلا او حتي عرسك انتي ❤
من اجمل الماسكات اللي نتيجتها سريعة جدا هو ماسك خليط بين الكيمياء والطبيعة 🤔
ماسك كريم اليكا ومعاهو قناع الموز في شكلو البسيط 😊
قبل كدا اتكلمت عن ماسك الموز وجمالو..من احب الماسكات الي قلبي 😍
يمكن انا لي اكتر من سنة مواظبة علي الماسك دا كروتين أسبوعي ع الاقل ..الصراحة بيحسسني بالراحة النفسية ..😄
اليكا عبارة عن استيرويد موضعي يعني عائلة الكورتيزون وكدا.. من الحاجات الممكن تتصرف بدون وصفة طبية (OTC ) ..بيستخدم اصلا لتخفيف أعراض الأكزيما والصدفية وبعض الالتهابات الجلدية ..
احلي حاجة فيهو انو عندو خصائص مضادة للالتهاب وبالتالي بتساعد في تخفيف اي هيجان في البشرة سواء كان تورم او احمرار او حكة او حتي قشرة مثلا 😊
يعني ممكن تستخدميهو لصالحك بس بحذر شديد وبفترات متباعدة جدا كإستخدام تجميلي..
اما كعلاجي بيستخدم لفترة ما اكتر من ٣ أسابيع تحوطا لأي اثار جانبية للكورتيزونات عموما..
الليلة ح نشوف كيف نستعملو كماسك مع ماسك طبيعي عشان تطلعي لمناسبتك منورة ولا قمر ١٤ 😉
#طريقة_عمل_الماسك
الماسك عبارة عن ٤ نقاط من كريم اليكا نقطيهم علي وشك وامسحيهم علي كامل الوجه..
بعد كدا تعالي اعملي فوق ليهو الماسك بتاع الموز اللي هو هنا عبارة عن نص موزة مع ملعقة صغيرة زبادي واضربيهم مع بعض ويكون في التلاجة وباارد أفضل طبعا..
يعني ما تخلطي الكريم مع الماسك في نفس الإناء اكيد ..
ح تمسحي اي واحد فيهم علي حده لكن ورا بعض في نفس الوقت..
الخطوة التالتة هي خطوة المناديل وكلكم عارفنها..
تعالي لزقي المناديل علي وشك بعد تكملي توزيع ماسك الموز .. طبعا دي خطوة اختيارية يا بنات بس انا بحبها لأنو بتشيل ليك اي قشرة حايمة وبتريحك من غسيل الموز من وشك لأنو لايوووق 😄
الماسك دا كلو شامل الرقبة كمان..
الرقبة كمان محتاجة عناية منك ما تهمليها لأنو دي اكتر حتة بتغزوها التجاعيد بدري بدري..
خلي الماسك دا لغاية ينشف واقلعيهو برااحة وغسلي وشك بموية بااردة وامسحي وشك بمرطبك الخاص وياحبذا لو اخدتي ليك نومة كدا 😄
المهم ح تلاحظي النتيجة من اول ثانية واكيد ما ح تتعرفي علي نفسك ..والله انا خايفالكن من الخلعة 😂
بالمناسبة ممكن تستبدلي ماسك الموز بأي ماسك طبيعي تاني يعني ماشرط الموز .. الحاجة البتناسبك ما اكتر
يعني ممكن تكتفي بلبن بدرة وزبادي 😊
وممكن كمان تستبدلي كريم اليكا بكريم بيتنوفيت او بيتاديرم او بيتازون كلهم مسميات لنفس المادة..يعني المتوفر عندك بس ونتيجتو كمان ظريفة شدييد ..
الماسك دا مناسب لكل أنواع البشرة ولاصحاب البشرات المرهقة جدا لكن ما طوالي كمان .. وللبشرات الحساسة وبتحمر شديد وللتخلص السريع من القشرة وبعض الخلايا الميتة 😊
لو مناسباتك كمان يوميا يبقي تكتفي بمناسبة واحدة وتضحي بالباقيات 😅
دا باعتبارو ماسك عند اللزوم 😉
#كسرة_ناشفة
الكريم دا كمان ممكن تستخدميهو بعد جلسات الليزر او بعد تشيلي شعر الوجه او الجسم او حتي المنطقة الحساسة 😊
الكريم موجود بكل الصيدليات ..
بنصح بيهو للحامل في شهرها الأخير ومافيهو اي خطورة علي المرضع ..
ودمتن منورات 😊
تعليقات
إرسال تعليق