تعطير الجسم والمنطقة الحساسة
مساء الخيير عليكن 😊
في سلسلة العناية بالمنطقة الحساسة ما اتطرقنا ابدا للتعطير بالذات للعروسات والمتزوجات وحتي البنات المامتزوجات المفروض يحافظوا علي المنطقة دي معطرة ع الاقل بشي خفيف والأهم من كدا المحافظة علي نظافة الحتة دي ودا الأساس طبعا..
اول حاجة امتنعي عن الصابون واستبدليهو ممكن بغسول مهبلي مخصص للمنطقة دي لأنو اي تغيير في ال PH ح يسبب ليك التهابات..
او اكتفي بموية الملح الفاترة للتخلص من اي بكتريا
موضوعنا اليوم هو عن تعطير منطقة البكيني لأنو كتير من البنات بيرتكبوا خطأ انهم بيحطوا ريحة مباشرة علي الحتة دي بالذات الخمرة 🤐
لااااا يا جماعة بلييز دا اذي والله ودا كمان سبب رئيسي لسواد منطقة البكيني ..
اذن وضع العطور ذات الكم الهائل من الكحول مباشرة هو السبب الرئيسي للسواد الأعظم 😄
ركزوا علي كلمة مباشرة دي لأنو العطور دي ممكن تخففيها حتي بعد كدا تتعطري بيها ..
طبعا انا بقصد الخمرة السودانية بالذات للعروسات والنسوان
بالتأكيد اي عروسة في يوم عرسها اول حاجة بيوصوها انها تخت الخمرة في المنطقة دي وهي بتكون شقية الحال محبوسة وتعبانة وتدخن كم شهر وتتمسح شي زيت لوز وشي سودو كريم وتكون ظبطت الحتة دي كويس من تفتيح لتنعيم والذي منو ..تجي بعد كدا تتريح بالخمرة وتخرب اي حاجة وبعد كم يوم ما ح تتعرفي علي المنطقة دي من السواد .. وغير كدا الريحة ما ح تكون ثابتة وبعد شوية مع السخانة والعرق تتقلب لريحة مامفهومة وكعبة شديد..
الدخان طبعا من اجمل المعطرات للجسم وللمنطقة الحساسة واعتقد انو لا يعلي عليهو ..بس كمان في ظروف معينة بتمنعك من موضوع الدخان بشكل مستمر وفي ناس اصلا ما بحبوه ..
اذن لابد من حلول أخري يا جماعة ..🤔
عندك المسك من اجمل الاختراعات ومن زمن طويل ..وشي اساسي في تصنيع البخور والخمرة.. لكن هنا ح نستخدمو بطريقة مختلفة شوية ..
في نوعين من المسك ..جامد وسائل والاتنين حلوين جدا للتعطير
المسك السائل ( غير مسك الطهارة ) جاهز طبعا وبتحطيهو مباشرة علي المنطقة الحساسة بكمية بسيطة جدا تكفي..
الحلو في المسك انو ريحتو ثابتة جدا وخفيفة وابدا ما مزعجة ودا غير عندو فوائد للبشرة وابدا ما بهيجها ..
ممكن تحطي منو علي مناطق النبض زي الرسغ وبين الفخذين ؛ خلف الأذن وبين طيات الأرجل وبين الثديين لأنو دي الاماكن الدافئة اللي بيثبت عندها أي عطر.. ونقطة منو علي الملابس الداخلية كمان ..وح تبقي ريحتك تجنن 😊
ابدا ما بنصح انو يتحط علي المهبل مباشرة ..
المسك الجامد موجود عندنا في محلات العطور السودانية ..
ناس عبد الصمد القرشي عندهم في شكل مكعبات وريحتو جميلة خالص وليهو عدة استخدامات سواء كان لتعطير الجسم او حتي تعطير الدولاب والخزانات وملابسك كمان 😊
كل البتعمليهو انك تبشري المكعبات دي وتحطيها باكياس شفافة غير مسربة زي اكياس التل مثلا اللي بتتعمل بيها الفال ديك ..😍 وتبدي توزعيها علي الخزانات وتعلقيها مع علاقات الملابس وبيت ملابسك المطبقة والملايات والمفارش وكدا ..
للمنطقة الحساسة بتبشري مكعب المسك وتخلطيهو مع اي زيت انتي بتحبيهو يكوم خفيف وانا بفضل جونسون لأنو ريحتو جميلة وترطيبو اجمل والبشرة بتمتصاهو سريع ..
ممكن زيت بايو اويل او زيت بالمرز بالكاكاو مثلا ..
#طريقتي
انا ببشر المسك مع زيت جونسون وبخلطهم تماام بحطو علي حمام مائي لغاية يدوب بعد كدا خليهو يبرد ح تلقيهو جمد بس قوامو اخف من الفازلين ( الخطوة دي اختيارية يعني ممكن تنقعيهو في الزيت وترجيهو كل ما تجي تتعطري وخلاص ).. بعد كدا بنقط زي 5 نقاط من خمرة المسك علي الخليط دا او اي خمرة بتحبيها بالتقدير المهم كمية الزيت تكون أكبر عشان الريحة ما تسبب اي تهيج.. وممكن تضيفي كم نقطة من اي مخمرية او عطر زيتي زي نورة واحلام . بالجد ح يظبط معاك خليط ريحتو تجنن ❤
دا للعروسات والنسوان.. اما البنات المامتزوجات ح تكتفوا بالمسك مع الزيت بس 😊
ممكن تتمسحي بعد تخلصي حمامك علي بشرة رطبة لجسمك كلو والنتيجة هي بشرة رطبة وريحة حلوة
ريحة نضااافة..
بالنسبة للمنطقة الحساسة بعد تمسحيها بالخليط دا ممكن تشطفي بموية بعد نص ساعة لو ما بتحبي إحساس الزيت او خليهو كدا البشرة اصلا ح تتشربو..
وليك الخيار انك تبشري المسك مع موية الورد وتصنعي منو بخاخ بعد الحمام لجسمك كلو .. بس الطريقة دي اقل ثباتا..
او تخلطي المسك مع كريمك اليومي او حتي الفازلين الواحد دا وتمسحي جسمك كلو بما فيهم منطقة البكيني .. ح تحصلي علي ترطيب مع ريحة حلوة وثابتة لكم يوم كمان..
ح تلاحظي انو الريحة ثابتة يمكن ٣ يوم حتي لو استحميتي..
المسك من افضل مزيلات العرق..ما تنسوا الحتة دي كمان وما بيسود ابدا عكس مزيلات العرق البخاخات والرول 😊
للعروسات ما تنسوا بعد التعطير تقيفي دقيقة علي بخور الصندل 😉
مع زيتك او خلطتك بتاعة الدخان اضيفي ليها مسك مع كم نقطة من الخمرة بتاعتك وامسحيها علي جسمك واقعدي في الحفرة وبعد تقومي تاني اتعطري بخلطة الجونسون العملتيها قبيل حاجة بسيطة جدا تكفي ماشرط تتجلبطي..ح تلاقي ريحتك تحفة ❤
#ملحوظة
هنا التعطير بيشمل الجسم كلو بما فيهم منطقة البكيني والابطين والمؤخرة كمان ..
اذا ما بتحبي المسك ممكن تكتفي بنقاط الخمرة والعطر الزيتي علي زيت جونسون وخلاص..
انا بحب الزيت لأنو بيثبت العطر اكتر..
ماينفع تتمسحي بزيت جونسون وتطلعي في الشمس..
ودمتن سمحات ومريحات 😊
تعليقات
إرسال تعليق