كريم ميلانوفري لسواد المفاصل

مساء الخيير حبيباتي
كل سنة وانتن طيبات وكل الأشواق ليكن 😊
وكل الأمنيات محققة ❤
كمية من البوستات كان مفروض انزلها قبل العيد عشان تستفيدوا اكتر وتطبقوها قبل العيد بس معليش نحصل بيها عيد الضحية ان شاء الله بعد دا  😄
من اكتر المشاكل البيشكوا منها معظمكم هي سواد المفاصل سواء كانت مفاصل أصابع اليدين او الرجلين او الركب والاكواع ..
ما ح أطول عليكم في التفاصيل بس كمان في نصائح لازم تعملي بيها عشان نتيجة اي حاجة تستخدميها تظهر سريع ع الاقل ..
من أهم أسباب سواد المفاصل هو الجفاااف لذلك ركزوا اكتر علي الترطيب يا جماعة ودي اول خطوة  ..
الميلانوفري عبارة عن كريم مخصص اصلا لعلاج التصبغات والكلف والنمش وآثار حب الشباب بشكل عام ..
عبارة عن خليط من تلاتة مواد زي الخلطة الثلاثية بتاعة التفتيح لو بتسمعوا بيها ..
مكوناتو هي  هيدروكينون ٤% وتريتينوين 0.05 ومادة الفلوسينولون ..
خلونا نشوف اي مادة فيهم بتعمل شنو بالضبط 🤔
الهيدروكينون معروف انو مادة مفتحة وبتشيل اي تصبغات وبالذات هنا التركيز عالي فمناسب جدا لسواد المفاصل
كذلك التقشير مهم جدا للحتة دي عشان كدا مادة التريتينوين المقشرة دي الزيييت اللي هي نفس مادة الاكرتين والديفرين وكلكم عارفنو 😊
المادة التالتة اللي عبارة عن كورتيزون خفيف نوعا ما (الفلوسينولون Flucinolone  ) عشان القشرة وكدا  وعندها خاصية تفتيح كمان ..
في حاجة تانية مهمة لسواد المفاصل بس ما صورتو ليكم لأنو اتكسر للأسف 😕
هو زيت جنين القمح.. الزيت دا مهما اتكلمت عنو ما بوفيهو حقو ..الزيت دا غني جدا بفايتمين E

بعض الناس بيسموهو بزيت الحياة، ودا بسبب فوايدو الكبيرة..فهو بيعزز نمو الخلايا ويُجددها وبالتالي يُعطي النضارة لليدين والشد الطبيعيّ، ويُرطب البشرة ويُنعمها، وكذلك يُبيضها بشكل ملحوظ ..
فشنوو حاولوا وفروهو وخلوهو جزء من روتينكم بالذات لسواد المفاصل ودا عن تجربة ..
 الحاجة التالتة هي مهمة كمان لسواد المفاصل وتوحيد اللون اللي هي العروكة او الدلكة حتي لو يوم واحد بس في الأسبوع ح تصنع فرق كبيير في لونك عموما ..

#طريقة_الاستخدام
نقطي من كريم الميلانوفري علي المفاصل وادلكي براحة لغاية الكريم يتشرب .. بعد كدا تعالي امسحي زيت جنين القمح ..
الكلام دا كرريهو صباح ومساء لمدة اسبوعين .. في الأسبوع التالت والرابع يكفي مرة يوميا ..
بعد توحدي لونك وتوصلي لهدفك ممكن بعد كدا تعمليهو يوم بعد يوم او يومين في الأسبوع كفاية جدا للمحافظة علي النتيجة 😊
زيت جنين القمح ما توقفيهو خالص ومتي مايقع في عينك اتمسحي منو وح تعجبك النتيجة واذا ما اتوفر عندك الزيت ممكن زيت لوز او جلسرين ..
زيت جنين القمح من وادي النحل ولقيتو في صيدلية سليمان الحبيب في السعودية بس في السودان ما متأكدة يكون متوفر وين بالضبط..

#البدائل
اذا ما اتوفر عندك الميلانوفري ممكن كريم اسمو ترايلوما ( Triluma  ) او ممكن تفصلي اي مادة لوحدها وتخلطيهم مع بعض مثلا ( جيبي الدوكوين 4% واكرتين 0.05 واي كريم فيهو فلوسينولون ) وتعمليها خلطة لوحدك في البيت وتمسحيها علي مفاصل بما فيهم الركب والاكواع ..
تلاقيهم في اي صيدلية واسعارهم ظريفة جدا وفي متناول اليد 😊
الميلانوفري ما موجود في الصيدليات وبيتلقي في البوتيكات بس ما متذكرة سعرو..

ودمتن سمحات 😊