شامبوهات علاجية وتخفيف اضرار الشامبو

مساء الخييير عليكن ❤
بتمني انو بين يوم وليلة كدا اقدر استغني عن الشامبو نهائيا واستبدلو بحاجات طبيعية يستفيد منها الشعر وفي نفس الوقت تنضف كويس ..لكن لسا ما وصلت المرحلة دي ..فأي واحدة قدرت تتخلي عن الشامبو تورينا النتائج الوصلت ليها 😊
معظم الشامبوهات أو ع الاقل الشامبوهات اللي استخدمتها من فتحت عيوني علي الدنيا اقدر اقول عليها ضاربة وفيها مواد ضارة للشعر نفسو ودا بتلاحظي ليهو خلال مسيرتك للعناية بشعرك..
في فترة كدا لما كنا أطفال صغار كانوا بيغسلوا لينا بصابونة الغسيل الأسمها(حاجة فاطنة ) الله يسألني أفضل من الشامبو بكتييير وشعري كان حلاة الدنيا عليهو 😂😂

معظم الشامبوهات بتحتوي علي السلفات SLE والبرابين والسيليكون وديل من اكتر المواد الشائعة الضارة تكاد تكون في اغلبية الشامبوهات البتوفرها الشركات التجارية وكمان بأسعار غالية بقت ..
المواد دي بتجفف شعرك وتجردو من الزيوت الطبيعية اللي في شعرك ..دا غير انو في بعض انواع السيليكون اللي بيغلف الشعرة وبيعزلها من اي شئ حولها ..
بدون تفاصيل كتيرة انا شفت كم تجربة لبنات اتخلوا عن الشامبو نهائيا لفترة طويلة واستبدلوهو بحاجات طبيعية ونجحوا في كدا وشعرهم اتغير ١٨٠ درجة.. يمكن اصحاب الشعر الدهني هم اكتر ناس ح يعانوا من الطريقة دي ..
انا لسا ما قدرت اخش التحدي دا غلبني الصراحة 😂
فبقيت أضيف للشامبو بتاعي حاجات طبيعية واخففو بموية حتي يصبح اقل ضررا واكتر نفعا وشعري اتحسن من اول بالجد ..

#شامبو_العسل
اضافة العسل للشامبو من اجمل الحاجات الجربتها..
العسل مرطب قوي جدا ومضاد للأكسدة والبكتيريا وبيحافظ علي رطوبة الشعر بشكل ملحوظ جدا .. في اي قناع تعمليهو  للشعر بتمني تضيفيهو وما تستغني عنو .. ممكن كمان تضيفيهو للبلسم.. 😊
ملعقة عسل + كباية موية + ملعقتين من الشامبو
اضيفي العسل للموية ودوبيها كويس ممكن بالميكرويف واضيفي الشامبو بعد كدا ورجيها كويس وغسلي شعرك وممكن كمان تضيفي زي  5 نقاط من اي زيت عطري موجود عندك لفائدة أكبر.. زي زيت شجرة الشاي مثلا
بعد كدا اشطفي شعرك وطبقي البلسم بتاعك مع ملعقة صغيرة زيت جوز لوز حلو أو زيتك المفضل عشان تحافظي علي رطوبة شعرك اكتر وما بكون ناشف وهايش علي طول .. بيحميه من الجفاف والتقصف..
بيحافظ علي صحة الفروة ويحفز النمو..

ملعقتين بلسم + ملعقة صغيرة زيت لوز حلو
دا كلو للاستفادة من المواد الطبيعية بقدر الإمكان 😊

#شامبو_السدر
ملعقة سدر + كباية موية + ملعقتين شامبو
الشامبو دا لتغزير وتكثيف الشعر

#شامبو_الأسبرين
5 حبات اسبرين + كباية موية + 5 ملاعق شامبو
الاسبرين او حمض السالسيليك جميل جدا لعلاج القشرة
وممكن تحتفظي بيهو في التلاجة..

#شامبو_القرنفل
ملعقة زيت فايتمين E + كباية مغلي القرنفل + ملعقتين شامبو
القرنفل جميل جدا جدا للشعر من حيث التكثيف والطول وريحة الشعر بتكون جميلة ..
بتغلي كمية من القرنفل في كباية موية لغاية لونو يبقي بني غامق وتنزليها من النار وتخليها لغاية تاني يوم ..بعد كدا تصفي القرنفل وتستخدميه مع الشامبو أو لوحدو كبخاخ مع زيت فايتمين E ..

#شامبو_الترطيب_العميق
ملعقة زبدة شيا + ملعقة زيت فايتمين E + الشامبو بتاعك
سيحيهم مع بعض واضيفيهم لعلبة الشامبو بتاعك وليكي الخيار إذا ح تخففيه بالموية ولا لا ..
الطريقة دي جميلة كمان للناس البيعانوا من التقصف..

#شامبو_للشعر_الدهني
 5 ملاعق زيت الجوجوبا + في علبة الشامبو
أو 2 ملعقة زيت الجوجوبا + كباية موية + 2 ملعقة من الشامبو
زيت الجوجوبا خفيف وجميل جدا للشعر الدهني وبيوازن إفراز الدهون في الفروة ..

#كسرة_بزيت
ماتنسي تشطفي شعرك بخل التفاح المخفف في النهاية عشان توازني الpH وتضفي لشعرك لمعة جميلة ..
الشامبو بتركزي علي الفروة اما البلسم فهو للشعرة نفسها وابعديه من الفروة..
اضافة الزيوت عموما للبلسم كمان فكرة جميلة وممتعة ومفيدة جدا جربوها .. 😊