ماسك الموز للشعر

صباح الخيرات يا بنات 😊

كتير بيطلبوا مني بوستات للعناية بالشعر ..لكن بلقي نفسي ما بميل ابدا لبوستات العناية بالشعر ماعارفة لييه 😄
في البداية ثبتي مفهوم انو مفتاح جمال شعرك هو التغذية السليمة..لازم شعرك ياخد كفايتو من الفايتمينات والمعادن وكمان البروتينات أكيد..
اذا ما قدرتي توفري التغذية السليمة سواء كان نتيجة لظروف شغلك مثلا أو لأنو اخوانك في البيت النوع البياكل الفواكه والحاجات السمحة البتجيبيها 😂
المهم حاولي وفري لنفسك فايتمين يعوض ليك النقص أن شاء الله فوليك اسيد مع فايتمين B complex وديل ارخص حاجة في الصيدلية ومتوفرة جدا 😊
كمان من الفايتمينات الجميلة للشعر ( بيرفيكتيل..بايوتين بلس.. هيرفينيتي..هيرتون .. سفن سيس .. ات ويركس..هيرتون ) وديل عن تجربة طبعا
انا بي قعادي في الصيدلية السنين الفاتت دي اشيل وابلع هههه
خلونا نخش في موضوع الماسك طوالي..
الموز ياجماعة 😁..انا مدمنة موز من اكل لتطبيقو كماسك للوجه وللشعر ..  بالجد  رهيب

#مكونات_الماسك
موزة + صفار بيضة + حليب جوز الهند + كبسولة فايتمين E + بخاخ الترطيب
الموز بيحتوي علي كمية فيتامينات ومعادن وبيرطب وينعم الشعر بشكل جميل ..
البيض هو عبارة عن بروتين وبيحتوي علي كمية فايتمينات كمان ..
حليب جوز الهند غني بالدهون الصحية المشبعة وبعض المعادن زي المغنيسيوم بوتاسيوم فسفور حديد وبروتين كمان.. الحليب دا مغذي جدا من كل النواحي.. وعندو خصائص مضادة للجراثيم والفطريات ..
فايتمين E مهم جدا للشعر بيغذيهو ويساعد علي نموهو..

#بدائل
ممكن تستبدلي البيض بحبة افوكادو..
حليب جوز الهند ممكن تستبدليهو بزبادي ..
فايتمين E ممكن اي زيت متوفر عندك ..
الموز ياهو الموز ما تبدليهو 😄

#طريقة_تطبيق_الماسك
في البداية اخلطي المكونات كلها مع بعض وجهزيها..
انا عندي طريقة بتبعها في تطبيق اي ماسك لشعري
انو لازم اعمل الماسك وانا شعري رطب فقبل الماسك بعمل بخاخ الموية والزيت..
برش الشعر بالبخاخ بس يبقي مرطب مالدرجة البلل الشديد
بعد كدا قسمي شعرك لأربعة أقسام ..
طبقي الماسك من الجذور للأطراف
اعملي مساج للفروة حتي تضمني انو الماسك وصل للشعر كلو..
غطي شعرك بكيس بلاستيك وفوق ليها منشفة مبللة بموية دافئة..
الماسك مدتو من نص ساعة لساعة ونص البريحك طبعا 😊
بعد كدا بيتغسل الشعر تماام وبخي البخاخ تاني في شعرك انا بعتبرو بلسم ظريف خالص ..
اذا مساميتك منخفضة ممكن تعرضي شعرك لبخار أو تكتفي بالمنشفة الدافئة..
اذا مساميتك عالية اكتفي بكيس البلاستيك وخلاص..
اصحاب الشعر الدهني ما بنصح بالبخار خالص..

#مكونات_البخاخ
كباية موية + ملعقة زيت لوز حلو + ملعقة زيت صبار  + 5 نقاط من زيت شجرة الشاي أو اي زيت عطري ..
الزيوت دي حسب الحاجة المتوفرة عندك أو حسب مسامية شعرك
البخاخ دا للترطيب ممكن تستخدميهو يوميا اذا انتي من النوع اللي شعرك جاف ..
الفكرة كلها في انو الموية بتحبس ليك الرطوبة الناتجة من الزيوت دي .. نفس فكرة لما تمسحي جسمك بالكريمة بتاعك بعد الحمام وهو رطب بالموية .. ودي طريقة فعالة لحفظ الرطوبة ❤

 #فوائد_الماسك
الماسك دا بيغذي الشعر بالبروتين و الفايتمينات ..
بيرطب وينعم الشعر وبتلاحظي النتيجة من اول استخدام..
ولفائدة أكبر استمري فيهو أسبوعيا..
ينفع للشعر الجاف التالف ..

#كسرة_جافة
الشعر الجميل هو الشعر الصحي الغير جاف بغض النظر عن طولو.. شوية من الاهتمام وعناية واجتهاد ح تتخلصي من جميع مشاكل الشعر من تساقط وجفاف وتقصف ونكيش وتبدي تتمتعي بشعرك 😉 

ودمتن بشعر صحي 😊