#التفتيح الآمن للحامل

#ماسك_الفحم_للرؤوس_السوداء_ونضارة_البشرة_باستخدام_الغراء_الابيض

الماسك دا قبل فترة كان عامل ضجة واظن ماف بت ما عملتو غيري انا .. دايما ما مواكبة الموضة انا 😅
واخيرا جربتو قبل 10 يوم كدا وقلت اشوف النتيجة كيف والمرة دي بدل الجيلاتين عملت معاهو صمغ او بالاصح غراء هههه ايوة الغراء الوااحد دا لكن بتاع المدارس البستخدموهو الطلبة تقريبا حتي مكتوب عليهو (اسكول ) وما تخافوا هو امن جدا وابدا ما سام ..
قبل فترة برنامج ذا دكتور كان جابوا تجربة الغراء دا لازالة الرؤس السوداء وتنقية البشرة  فما بالكم لو استخدمناهو مع الفحم كمان ..
الغراء زااتو خشم بيوت والنوعية دي وزنها خفيف ومسامية ( بيخترق اي مسام موجود علي اي سطح ) .. اصلا  هو احد اشكال الجيلاتين عبارة عن مادة بروتينية ناتجة عن غلي  بعض اجزاء الحيوانات (بيغلوا العظام والاوتار والقدمين والجلود ) .. بعد كدا قولوا لي كوارع عديييييل هههههه .. لكن دا ما بياكلوهو زي الجيلاتين اكيد لانو مضاف ليهو بعض المواد الكيميائية .. وبالنسبة للوش غير ضارة 🤗

خلونا نشوف لييه الفحم طيب ؟!!
هنا ما مقصود الفحم العادي او بتاع الدكان والزريبة ..هنا لازم يكون الفحم نشط وبيتلقي في شكل حبوب او كبسولات  في الصيدلية وانواع وشركات كتيرة المهم مكتوب عليها ( activated charcoal )
الفحم عموما عندو قدرة كبيرة علي امتصاص السموم والغازات ودا سبب انو اتعمل حبوب للمعدة .. لكن بالنسبة للبشرة  بيعمل زي المغناطيس بيجذب كل الاوساخ من المسام ..كمان عندو قدرة في انو يخلصك من الدهون الزائدة والخلايا الميتة..
يعني اكتر شئ الماسك دا بيناسب البشرة الدهنية وحتي المختلطة ..ممكن يتطبق علي منطقة التي زون بالنسبة للبشرة المختلطة ..

  #طريقة_الاستخدام
بتجيبي حبتين من حبوب الفحم وتهرسيهم او تفضي الكبسولة من البدرة الجواها وتضيفيهم لكمية من الغراء حاولي قدريها علي قدر وشك او المكان الفيهو الرؤوس السوداء او في حالة وشك كلو اذا عايزة نضارة وتشيلي اي شوائب علي السطح مثلا ..
واخلطيهم كويس وطبقي العجينة دي علي وشك واستنيها ربع ساعة او عشرة دقايق لغاية ينشف وتعالي طلعيهو براحة من تحت لفوق وبعد كدا ممكن تغسلي وشك بموية باردة او تمسحيهو بقطنة مبللة بموية ورد عشان المسام ..الخطوة دي ضرورية جدا ..
انا بضيف ليهو شاي اخضر مسحون ونعناع مسحون ..
في نوعية كبسولات فحم بتجي بخلاصة النعناع واليانسون ودي منعشة منعشة اسمها (نيوكاربون)..
الحلو في الغراء انو بيلصق طبعا لكن ما شديد يعني ابدا ما تتخيلوهو زي الحلاوة ..ما بيسلخ بالعكس احساس حلو انك شلتي كمية وسخ كانت لاصقة فيك ,,
وكل ما كترتي الغراء النتيجة بتكون افضل ..
ممكن تجربيهو في البداية علي يدك وشيليهو بتحسي احساس نضافة حلو .. 😏
الماسك دا بيتعمل في الاسبوع مرة كفاية جدا ..او اذا عايزة تحضري بشرتك للمكياج بالذات منطقة الانف ممكن يكون ليكي كبديل للصقة الانف ويخلصك من الدهون في الحتة دي ..

#بديل_للغراء
انا حبيت الغراء لانو سهل بس الصق واقلع والنتيجة مرضية شديد ..اما انتي اذا خايفة من موضوع الغراء دا ولا تزعلي نفسك عندك بديل اللي هو الجيلاتين (الجيلاتين دا كمان بروتين سمح شديد للشعر ح نجيهو في بوست براهو كدا ) واذا ما متوفر برضو ماتزعلي عندك البيض وطبعا انتو عارفين سحر البيض للمسام ,,
اخلطي الحبوب المطحونة مع بيضة وطبقيها علي وشك وتعالي لصقي مناديل وفوق المناديل اعملي طبقة تانية وتاني الصقي مناديل وخليهو ينشف وتعالي شيليهو برااحة وشوفي النتيجة ..وااااااو (علي قول واحدة كدا )
ممكن كمان تضيفي للفحم عسل او جل الوفيرا او حتي زيت شجرة الشاي للناس العندهم حبوب وبالجد الزيت دا مباالغة للحبوب ..
حبوب الفحم موجودة في اي صيدلية والغراء هنا في السعودية بيتلقي في اي محل ..انا لقيتو في (ياسلام وساكو )
ممكن يتلقي في المكتبات كمان ..

تحياتي ..
ودمتن سمحات  :)