#التفتيح الآمن للحامل

#مسامية_الشعر
#مفتاحك_للعناية_بشعرك
اليوم البوست دا تحت شعار #افهمي_شعرك واختبريه كمان :)
تخيلوا انو الشعر عندو مسام زيو وزي البشرة بتتحكم بدخول المواد للشعرة ..
يلا الماعارفين يعني شنو مسامية يجوا بيجاي لانو انا كمان ما كنت عارفة يعني شنو مسامية الشعر .. بس بتذكر زمان في دعايات منتجات سنسيلك بجيبوا الشعرة مكبرة كدا وفيها طبقات طبقات زي حراشف السمكة .. يلا دي طلعت المسامات
المسامية بتخص الشعرة ذات نفسها مش الفروة ..

#يعني_شنو_مسامية_الشعر
هي قدرة الشعر علي امتصاص الماء والرطوبة واي مواد سواء كانت طبيعية او كيميائية وما امتصاصهم بس كمان قدرتها علي الاحتفاظ بيهم ..يعني هي مقياس للمساحات الفارغة بالشعرة وماعندها علاقة بنوع الشعر سواء كان ناعم او خشن ..
يعني عادي ممكن شعرك يكون ناعم واملس لكن مساميتو عالية
وممكن يكون جاف وخشن لكن مساميتو منخفضة

الشعر بينقسم لتلاتة اقسام من حيث المسامية :
_شعر ذو مسامية عالية
_شعر ذو مسامية منخفضة
_شعر ذو مسامية متوسطة (عادية)

خلونا نعرف اول شئ الشعرة دي زااتا بتتكون من شنو والمسامات دي موجودة وين بالضبط؟؟
الشعراية بتاعتك دي بتتكون من عدة طبقات لكن هنا بالضبط بتهمنا الطبقة الخارجية المغلفة للشعرة (الكيوتكل) ودي هي اللي بتشبه حراشف السمك وبتظهر في شكل طبقات مترادفة والتصاق الحراشف دي وتفرقها هو البحدد لينا درجة مسامية الشعر .. بمعني كل ما كانت الحراشف دي متفرقة عن بعضها دا اقرب للمسامية العالية وكل ما كانت ملتصقة ببعض دا معناها اقرب للمسامية المنخفضة وهكذا ..(شوفوا الصورة تحت )

طيب لييه محتاجين نعرف نوع مسامية شعرنا ؟؟!!
لانو دا المفتاح البتبدي بيهو عنايتك بشعرك باعتبارها اول خطوة  وبتساعدك في اختيار المنتجات البتناسب شعرك
يعني ح تعرفي ياتو زيت بينفع معاك او ياتو كريم ينفع وهكذا
واعرفي انو الموية هي المرطب الاساسي للشعر وزي ماتعطشي وتشربي موية كمان شعرك بيعطش وبيحتاج للموية
ح تجي واحدة تقول الزيت دا والماسك دا او المنتج دا واااو نفع مع شعري لكن ممكن نفس الزيت او المنتج ماينفع مع صحبتك او اختك لانو اكيد مسامية شعرها بتختلف ..
حتي مع صبغك لشعرك ح تلاحظي في شعر بيلقط اللون بسرعة وشعر تاني العكس ..
الاسباب ممكن تكون وراثية وممكن تكون خارجية بسبب الصبغات والهايلايت وكريمات الفرد مثلا او تعرض الشعر لحرارة عالية زي التعرض لاشعة الشمس بصورة متكررة و المكواة والاستشوار الكتير للشعر والمجففات ..الخ
الحاجات دي بتضر شعرك وممكن تحول مساميتو من منخفضة لمسامية اعلي وبالتالي المسامية هي عامل اساسي في تقبل شعرك لاي منتجات عشان تلاحظي انو شعرك يبقي طويل او غزير وكثيف او يلقط الاصباغ سريع او لا ..

كيف اعرف مسامية شعري ؟؟!
الطريقة الصحيحة عشان تعرفو نوع مسامية شعرك طبعا عند الطبيب وفي المختير تحت المجهر وزي ما بجيبوا في الدعايات بالعدسة المكبرة ديك لو شفتوها .. :)
المهم انو في اختبار ممكن تعمليهو في البيت واساسو الموية وما بنقدر نقول عليهو انو دقيق بنسبة مية بالمية لانو اساسا الشعرة طبيعيا مغلفة بطبقة من الزيت  وممكن تشكل عازل نوعا ما .. لكن نقول الجود بالموجود وفي ملاحظات لو خليتي بالك منها ممكن تخليهو اختبار دقيق نوعا ما ..

قبل نخش في اختبار مسامية الشعر بتاع الموية لازم تلاحظي لشعرك لما تغسليهو وتطلعي من الحمام اذا بينشف بسرعة او لا ...
اذا شعرك بيجف سريع بشكل تام بعد تغسليهو بربع ساعة او تلت ساعة كمان معناها بيتبل سريع بالموية (بيمتص الموية سريع وبيفقدها سريع )  اعرفي انو مساميتو اقرب للعالية والعكس اذا بياخد زمن اطول في الجفاف ..
ولاحظي اذا شعرك بيلقط لون الصبغة اسرع وفي نفس الوقت ممكن يفقد اللون في فترة اقل (عالي المسامية) او صعب يلقط اللون (مساميتو غالبا تكون منخفضة ) وديل ممكن نعتبرهم اختبار اول ..
ملاحظاتك لطبيعة شعرك وسلوكو ممكن تغنيكي من اي اختبار
يعني انتي برااك ممكن تعرفي طبيعة ونوع شعرك وشنو الحاجات النفعت معاك والمانفعت معاك من خلال التجربة والملاحظة في نفس الوقت ..
حاليا ممكن ترجعي لتاريخ استعمالك لاي منتج شعر او زيت وتتذكري اي منتج كان سلوكو كيف مع شعرك ؟!!

#اختبار_التعويم
الاختبار دا بيكون بعد تغسلي شعرك.. لااازم ما يكون فيهو اي زيت او ماسك او كريم ..يكون شعر نضيف ..
جيبي كباية مفطحة او صحن شفاف غريق مليان موية (الافضل تكون فاترة ) وشيلي  كمية من سبايب شعرك اللي في المشط (لانو بيكون من عدة اماكن مختلفة من شعرك )  وغمسيهم في الموية وخليهم لمدة تلاتة او اربعة لخمسة دقائق عشان تشوفي النتيجة زي في الصورة تحت ..
اخترنا الاناء يكون واسع من السطح عشان تدي مساحة للشعر ياخد راحتو وما يحتك بالسطح خصوصا لو شعرك طويل ..
_اذا شفتي الشعر طفي علي الموية ..اذن مسامية الشعر منخفضة بمعني ما قدر يمتص الموية
_اما اذا استقر الشعر علي القاع ..اذن مسامية الشعر عالية بمعني انو بيمتص الموية بسرعة
_ اذا استقر الشعر في الوسط دا بنعتبر مساميتو متوسطة او عادية
الاختبار دا مالازم يطول اكتر لانو ح تلقي الشعر كلو غرق في الموية لانو من الطبيعي بعد فترة شعرك يمتص الموية..

#بعض_الملاحظات_والنصائح :
*اذا معالجة شعرك باي بروتين او كيراتين من فترة قصيرة فالاختبار دا غالبا ما ح يديكي نتيجة صحيحة ,,
*في الاختبار اذا لاحظتي مثلا انو جزء من شعرك طفا للسطح وجزء غطس للقاع هل دا معناه انو ممكن الشعر يكون بيحتوي عي اكتر من نوع للمسامية؟؟!!
وليه لا ؟؟
ايوة ممكن .. في حالة مثلا كنتي عاملة صبغة وهايلايت خصل او جزء من شعرك ..فقد يكون الجزء دا مساميتو اصبحت اعلي ..
*لو بتلاحظي لما تصبغي شعرك الجزء التحت من شعرك (الاطراف) بتلقيهو ناشف كدا وزي الزعافة عكس الجزء الفوق ودا يمكن لو اختبرتي سبيبتو تلقيها جزء طافح والاطراف غرقانة في الموية ودا بيدل انو جزء من شعرك تالف ومساميتو عالية وممكن يتعالج عادي وكتير ممكن نقص الاطراف كجزء من العلاج .. لكن للاختبار ماشرط تقصي جزء كبير من اطراف شعرك وفقط اكتفي بانك تقطعي طرف الشعرة وتختبريهو لوحدو وباقي الشعرة لوحدها ..
*او لو من النوع البيكوي شعرو القدام بس مثلا عشان دا الظاهر من الطرحة وبكترة الحرارة علي المنطقة دي من الشعر برضو اصبحت مساميتو اعلي وكل شئ وارد ..
يعني ( مسامية الشعر = مفتاح العناية بالشعر )
                            ...... يتبع

في البوست الجاي ح نشوف كيفية العناية بالشعر حسب المسامية بتاعتو ..

ودمتم بجمال :)