#التفتيح الآمن للحامل

#العناية_بالشعر_حسب_المسامية
#العناية_بالشعر_منخفض_المسامية
في البوست الفات قدرنا نقسم نوعية شعورنا علي حسب المسامية بدل ما كنا سطحيين وبنقسموا عل حسب الفروة من دهني لجاف ..
طيب وبعد عرفتي شعرك ونوعو بعد كدا يجي دورك في انك تعرفي كيف تعتني بيهو بطريقة صاح بدل تسوطي سااي وتسمعي كلام صاحباتك وجاراتك علي قول الفنان :D لانو يمكن البنفع معاها ما ينفع معاك يبقي كوني خبيرة تجميل نفسك يختي ولا كيف ؟!!
نخش في الموضوع ع طول ونتعرف علي الشعر منخفض المسامية والحاجات البتناسبو والحاجات البتتجنيها عشان ما تبوظيهو وبكدا تكوني رفستي النعمة الكنتي فيها ...
في الاختبار بتاع التعويم العملناهو المرة الفاتت في شعرة كانت طافحة في السطح دي هو الشعر منخفض المسامية .. يعني شنوو؟؟!
دا بيكون فيهو الغلاف البرة المغلف للشعرة (الكيوتكل ) بالكاد مقفل يعني الحراشف متقاربة لبعضها بدرجة كبيرة وبالتالي نوعية الشعر دا ما بيمتص المواد والرطوبة بسهولة وممكن تحسي بيهو دايما ناشف ..
هو شعر صحي نوعا ما لكن فاقد لحبة مرونة ..
وزي ما صعب ترطيبو لانو مسامات الشعر شبه مقفلة كمان صعب انو يفقد المواد المرطبة البتخش ليهو وبالتالي النوعية دي معرضة لتراكم المواد عليهو وزيادة الطين بلة ..

والحل طيب ؟؟!!!
* اول شئ شعرك محتاج لحرارة بس بطريقة غير مباشرة يعني ما تجيبي استشوار او مجفف وتقولي كدا عرضتو لحرارة ..لاااا بس كفاية انك تغسليهو بموية دافية او تعرضيهو للبخار عشان تساعدك علي فتح المسام شوية  والاهم من كدا ترطبيهو وهو مبلل كدا بعد الحمام لانو المسام لسا فاتحة وبكدا الشعر ح يستفيد من المرطب سواء كان زيت او كريم او الموية نفسها..
كمان ابعدي من الزيوت التقيلة لانها صعب تخترق المسامات دي وح تفضل عايمة كدا بفوق وململس الشعر بيكون زيت زيت وملصق مع بعضو ,, يبقي تركزي علي الزيوت الخفيفة لانها ممكن تخترق الشعرة زي زيت الارغان واللوز مثلا ..
* لما تجي ترطبي شعرك بزيت او كريم مثلا رطبيهو وهو مبلول لسا قبل ينشف  وما تخافي ما ح يلسلس علي قول امهاتنا ..لييه؟!! لانو المسامات لسا بتكون فيها فاتحة ولانو الزيت زااتو محتاج لموية عشان يحبس الرطوبة داخل الشعرة ..
زي ما لازم ترطبي جسمك وهو مبلول كمان.. وما تتخيلوا الطريقة دي مهمة كيف ..
لاحظي لما تعملي زيت وشعرك ناشف بتحسيهو قاعد فووق يلمع ويراري بس 
* في بنات يقولوا ليك بنعمل ماسكات بروتين في البيت لشعرنا بطريقة مستمرة واسبوعيا لكن شعرنا ناشف وجاف وما بيتسرح وماف اي فايدة ( زي البيض او اللبن والزبادي او ما يونيز او جيلاتين او زيت جوز الهند نفسو ) ودا لسببن اولا لانك كترتي البروتين ودا بينشف ليك شعرك حتي لو اخترق المسام  او انك ما بترطبي شعرك وهو محتاج للترطيب زي ما محتاج للبروتين فلازم توازني بين البروتين (المواد المغلفة للشعرة) وبين الزيوت (المواد المرطبة ) لانو اي شئ يزيد من حدو بينقلب ضدو..
لكن دا ما معناه ما تعملي بروتين لشعرك نهااي اعمليهوبكمية بسيطة و بفترات متباعدة يعني كل شهر او كل تلاتة اسابيع كفاية جدا وبالتالي ما تركزي علي منتجات الكيراتين كتير حتي لو بلسم ..
ودا كمان بيفسر انو ليييه بعض الشعور ما بيناسبها زيت جوز الهند لانو بيحتوي علي بروتين ..
* كمان ابعدي من المنتجات البتحتوي علي السيلكون حتي لو كان النوع البدوب في الموية لانو برضو بيتراكم علي النوعية دي من الشعر ..
* لما تجي سيرة الشعر منخفض المسامية طوالي ح يجي علي بالنا المواد القلوية بالذات لانو دي هي البتعري الشعرة وتفتح الحراشف بطريقة بتسهل لينا دخول اي حاجة للشعرة ولكن ؟؟ وختو خطين تحت ولكن دي ..لانو لو كترتي من المواد دي وكمان بدون ما تعادليها بوسط حمضي يبقي تقنعي من شعرك ..
مثلا زي بعض الشامبوهات او  بيكربونات الصوديوم (الباكنج صودا ) او تقومي باضافة البيكربونات دي للشامبو كمان , دي لو عملتيها لشعرك ح تفتحي الكيوتكل والحراشف علي مصراعيها وبالتالي شعر عالي المسامية وبمرور الزمن واستعمالك ليها ح يبقي تاااالف .. طيب ح نعمل شنوو في الحالة دي ؟؟
موية + بااكنج صودا = PH 9 + تنضيف عميق وتعرية
لاحظي لل PH كم ؟؟ الرقم دا كبير جدا علي الشعر والفروة علما بانو ال PH  بتاع الشعر مايل للحمضي بين 4.5  و 5.5 ..
طيب مش ممكن نقفلو باستخدام حامض زي خل التفاح مثلا !! ايوة ممكن بس حكاية نفتح ونقفل الكتيرة دي ممكن تحلج لينا البلف في النهاية لانك ح تحتاجي لوسط حمضي عالي كمان :)
فشنوو ممكن تعملي الطريقة دي بحذر وبكميات بسيطة خالص وفي فترات متباعدة كمان ..
في بنات ما نفعت معاهم طريقة الباكنج صودا دي (يا اما شعرهم مساميتو كانت عالية وهم ماعارفين او كتروا كمية البيكربونات وكرروها كتير ) وفي بنات نفعت معاهم وديل تقريبا القدروا يتحكموا في ال PH  كويس بقياسو ..
(في شرائط لقياس القلوية والحمضية في الصيدليات ) لكن قبل دا مفروض تكوني عارفة ال PH بتاع شعرك كم بالضبط عشان تقيسي علي كدا ودا بيكون عند الطبيب افضل ..

#معلومة
(ال PH  هو قياس لمعدل الحموضة والقلوية للمواد عموما وبنشير ليهو بالارقام من 1 الي 14 .. اكتر من 7 هو قلوي واقل من ال 7 هو حامضي وال 7  هي محايد او متعادل )

#العناية_بالشعر_عالي_المسامية :
هنا  طَبقات الكيوتيكل بتَكون مُتفرقة وَ فيها فراغات وَكمان ممكن عادي يكون جزء مِن الطبقة دي مفقود (تالف )..
عشان كدا ح نحتاج لشيء يسد الفراغات دي وَ يحبس الرطوبة والموية والمواد المغذية للشعر بالداخل وَ يمنعها مِن الخروج يعني زي الحاجز..
روتين العناية بالشعر عالي المسامية هو عكس روتين العناية للشعر منخفض المسامية تمااما ..
يعني هنا ابدا ما بنحتاج حرارة عشان نفتح المسامات او الحراشف لانو هي هي اصلا مفتوحة وعايزين تقفلها وبالتالي الموية الباردة حلوة جدا للنوعية دي ..
ح تحتاجي لمغذيات وزيوت تقيلة لشعرك عشان تقعد اطول فترة ممكنة وما نفقدها سريع
مثلا زي زيت الزيتون والخروع وزيت الفول وزبدة الشيا والكاكاو ..
ح تحتاجي لمواد وماسكات محتوية علي البروتين كجزء مغلف للشعرة زي البيض والمايونيز واللبن او حتي لزيوت محتوية علي بروتين زي زيت جوز الهند ..
كمان المنتجات المحتوية علي السيلكون ممكن تستعمليها (افضل البتدوب في الموية) لانو السيلكون بيغلف الشعرة ..
ح تحتاجي تحافظي علي درجة حموضة الشعر بقدر الامكان ودا ممكن باستعمالك لخل التفاح
بعد تغسلي شعرك عشان يقفل ليك المسامات اللي ح تكون اتفتحت زيادة بالغسيل (ملعقة خل في كباية موية تكفي يعني ما تغرقيهو وتزيدي الطين بلة )..
ابعدي عن النتجات القلوية بما فيهم الشامبو ( درجة ال PH  فيها بتكون اعلي من 7.4 ) ..
البلسم ضروري استخدامو للنوعية دي من الشعر كمان ..

#العناية_بالشعر_متوسط_المسامية :
دا بيكون وسط في اي شئ ..يعني توازني في اي حاجة
توازني بين المواد البتغلف الشعر (زي البروتين) وبين المواد المرطبة (زي الزيوت والكريمات ) ..
اعرفي انو النوعية دي من الشعر علي الحااافة يعني اقل ضرر او خلل ممكن تصلي للمسامية العالية عشان كدا حافظي عليهو ...

#كسرة_بموية
الكلام في موضوع الشعر دا بحر عميييق وعايز ليهو كمية بوستات وشرح اكتر ..
لكن معرفتك للمسامية بتاعة شعرك هي المفتاح الحقيقي لبداية جيدة للعناية بشعرك ..

تحياتي ..
ودمتم بجمال :)