#التفتيح الآمن للحامل

#تنظيف_وتقشير_البشرة_بفرشاة_وجهاز_التنظيف_من_اولاي
#اجعلي_التنظيف_العميق_خطوة_ثورية

 كلنا بننضف بشرتنا لكن بننضفها كيف ؟! وبالذات ناس البشرة الدهنية وتراكمات الاوساخ علي المسام وكل يومين تلاتة بتقوم لينا حبة او حبتين في الجضم والجبهة او تحسي وشك لسا ملسلس بالرغم من انك جايبة اجعص صابونة او غسول .. انا شخصيا حليت جزء كبير من المشكلة دي مما جبت الفرشة بتاعة التنظيف دي او زي ما بيسموها جهاز الفيشيال المنزلي ..
عموما هي بتجي شركات تحت مسميات مختلفة وكلها افضل بكتير من تنظيف وشك بيدك ..وهنا ح اركز علي جهاز اولاي  لانو دا الجربتو من 3 شهور تقريبا ..

 طيب انا ح احصر #فوائدها والنتائج الاتحصلت عليها والممكن انتي تتحصلي عليها كمان بإختصار :

_ اول شئ الفرشة دي بكل تأكيد بتخلصك من الاوساخ والدهون المتراكمة علي بشرتك وعلي المسام ..
_كمان بتقشر البشرة وتزيل الخلايا الميتة بالذات لو استخدمتيها مع مقشر خفيف وبالتالي ح تحضر بشرتك لاستقبال لأي منتج تمسحيهو بعديها واكيد الامتصاص والمفعول ح يكون اكبر بلا شك ..بالذات للبنات البقولو ليك الكريم الفلاني داك مانفع معااي وماعمل لي شئ وكأني بمسح في الحيطة 😅

#ريفيو_عن_الجهاز :
_ التنظيف بالجهاز دا افضل بنحو 4 مرات من تنظيفك او غسيلك لوشك بيدك ..👌
_ دوران رأس الفرشة بشكل دائري بيعمل علي تدليك البشرة (زي المساج وكدا ) وبالتالي تحفيز الدورة الدموية وتنشيط الخلايا وبكدا بتحسي بشرتك مظهرها عموما اختلف وبقي افضل بكتيير من قبل ...
_الفرشة مصنوعة من النايلون وشعيراتها رقيقة جدا وناعمة وبتوصل ليك لزوايا البشرة اللي ما بتقدر يدك براها توصل ليها (ودا سر التنظيف العميق ) بكدا تضمني كل حتة في بشرتك اتنضفت تماام ..
_ الفرشة رقيقة جدا لدرجة انها ممكن تناسبك لتقسير الشفايف كمان ..
_ الحلو في الجهاز انو حجمو مناسب وبيشتغل بحجار البطارية بتجي معاهو في الكرتونة يعني ما محتاج لاي شاحن .. وممكن تشيليهو في شنطتك وين ما ماشة..
_ فيهو سرعتين , واحدة اسرع من التانية وبتزيديها زي ماعايزة ..
_ بيجي مع الفرشة مقشر بتاع اولاي حلو شديد ..حجمو صغير بس في حجم اكبر بيتباع براهو كدا وبالجد المقشر بينضف باخلاص وما بتحسي بالحبيبات الجواه (ابدا ما مزعج )..
_ ممكن تستخدمي الفرشة مع اي منظف او غسول او مقشر انتي بتحبيهو ..
_ الفرشة بتاعة الجهاز بتغيريها كل 3 شهور او كل ما حسيتي انها بقت ما فعالة وما جايبة حقها وتحسي انو اليافها اصبحت بالية .. وبتلقيها متوفرة في الصيدليات ..
_ بعد تزيلي مكياجك بمزيل مكياجك المخصص ليهو ضروري جدا تغسلي وشك بالفرشة دي لانو بتخلصك من اي ذرة مكياج ممكن تتسبب ليك في سد المسام .. لانو في بقايا ميك اب ماف اي منديل او مزيل بيقدر يزيلها ..
_ الجهاز مقاوم للموية ..ممكن تستخدميهو تحت الدش عادي ..
_ سعرو في الصيدليات 149 ريال في السعودية .. في السودان في بنات بجيبوهو تقريبا لانو شفت كم بوست في القروبات عنو بس ما متذكرة وما شرط الا اولاي بالضبط...

#طريقة_الاستخدام :
_ كبي من الغسول بتاعك او المقشر علي الفرشة ووشك يكون مبلول واضغطي علي زر الجهاز البطئ اول وابدي , بعد شوية كدا ممكن تزيدي السرعة لغاية تتعودي عليها.. او ممكن تحطي الغسول او المنظف بتاعك علي وشك اول وبعد كدا تبللي الفرشة وتبدي وهكذا .. الطريقة البتريحك بس ..
_ بعد تخلصي ضروري تعملي تونر للمسام ولو ماعندك ما ح تلقي احسن من موية الرز المخمر او قناع النشا بالزبادي ( النشا عندو مفعول سحري علي المسام )...او موية باردة او تلج ..
_ ممكن تستخدميها مع الغسول بتاعك او المقشر بتاعك ولو عايزة تنظيف اعمق افضل مع المقشر ..
_ انا بعمل الغسول مع المقشر في نفس اللحظة وبنضف والنتيجة بتكون ظريفة خالص ..
_ ممكن تستخدميها يوميا بالذات لو بتعملي مكياج  او يوم بعد يوم والافضل بالليل ..
_ غسلي بيها لمدة دقيقة او دقيقة ونص كفاية جدا ..
_ ما تحاولي تضغطي علي الفرشة وانتي بتغسلي بيها ..خليها تدور براها بدون ضغط ..
_بعد تخلصي طلعي الفرشة من الجهاز وغسليها كويس بالموية والافضل لو تعقميها بكحول بس ما شرط يوميا ..
_ من اول استخدام ح تحسي بالفرق .. اما بعج اسبوع اسبوعين ما ح تقدري تستغني عنها ..

#كسرة_ناشفة :
تجربتي مع الفرشة دي اكتر من رائعة ..
تقييمي ليها 10 من 10  ..
لاحظت انو افراز الدهون قل بنسبة 80% ..
في نعومة حاصلة الصراحة وماف رؤوس سوداء والمسامات اتحسنت كتير..
لو عملت اي كريم او ماسك او اي منتج نتايجو بتظهر اسرع بالنسبة لي ..
تستحق انو الواحد ما يستغني عنها بالذات البشرتهم دهنية ومختلطة لانها ح تغير حياتك بالمرة وبدون مبالغة 😊..
في النهاية بقول انو اي بشرة بتختلف من التانية ..يعني البيناسبك ما شرط يناسبني والبيناسبني ما شرط يناسبك ..
وممكن بعض منتجات العناية البتستخدميها مع الفرشة  تسرع ليك النتائج اكيد ..

تحياتي
ودمتم بجمال :)